Marina Česen, opatijska poetesa ka biva pul Pobar, vavek neš va svojen stile i po domaću napiše za Valentinovo, pak je tako bilo i par dan prvo ovoletnjega Dana od jubavi ki se je slavil 14. febrara. Simpatičnu štorijicu objavjujemo za seh ki su zaljubljeni va jubav, za seh ki su namorani, ale se pripravjaju za to… I za oneh ki bi se rada domisleli kako to zgjeda kada se judi vole i štimaju, a to je neš ča se ne sme pozabit…

– Čuda se vremena parićujen napisat par besed od onega, ča mi sako toliko pride napamet, ma se lih neš obavja i nekamo gre i tako dani pasuju. Fanj se puti domislin moje mame Mire, ka je delala va Slavije, kot šankerica, a skoro saki dan njoj je prihajal Drago Gervais i ni nanke zaprl vrata, zazijal je: – Mira, daj mi kafe i ono ča mi gre!«

Lepo boke oćali

I ja hodin na kafe i prižentan ono ča mi gre. Lepo se zaseden, zamen novine, kopan po boršice i išćen oćali, a njih ni. Ča sada?Vrtin se na kantride, pa pitan »ima ki kakovi oćali?« – počela je svoju štoriju Marina Česen. Morda se je neš takovega dogodilo još kemu, a kako je štorija šla naprvo, doznat će ki nastavi čitat…

– Natrat mi na stol pridu dva vela okrugla žmuja nakrcana z oćali. Kada san jih zagledala, veselo san se nasmela i na glas rekla »ko lepo boke z oćali« i to ne jeno, leh dva. Zajeno mi j’ napamet prišlo da moran napisat štoriju od njih – dožontala je Česen.

To je gospa ka ima rada se rožice, a sada nan je priznala i da ju najviše pijaža boke od črjeneh šipki.

Črjeni šipki

– Znan da postoji boke od rožic, mene se pijažaju črjeni šipki, ruže ke su se oveh dan jako prodavale za Valentinovo. Rekla bin, ako se poslože čokolatini, more se storit boke od njih, pa i od bomboni pride isto tako lepo boke. Jena moja poznata je storila svojoj prijatelice za rojendan boke od lukići. Na trdi karton va sredinu je stavila veli narančasti žurnad, a okolo njega je poštivala isto tako veli kafeni vrganji i stavila nekoliko per od hrasta, da se vidi da su va šume pobrani. Si ovisti oćali, boke od njih, saki more koristit kad najde svoju jačinu za videt… Lepo san pročitala novine, popila kafe i ono ča mi gre, platila i zadovojna šla ća, aš su me razveselili oćali va žmujeh, kot dva vela boka. Za daje računan, da je budi ka ženska dobila boke rožic, ale čokolatini, morda i ku drugu pikolecu, na Dan od jubavi. Srećno Valentinovo, magari je već pasalo – ma pravo za reć – neka van saki dan bude Valentinovo – poručila je Marina Česen.

Ni ča čekat

Za Valentinovo je Opatija obukla svečane sviti, a parki i Lungomare su bili okrunjeni z črjenemi srci. Reče se da kad nekega voliš, da to oćutiš z celega srca, pak je tako srce postalo simbol jubavi. Romantično…

Za Valentinovo je Marina Česen napisala i versi ki opišuju blagdan ki je jušto pasal, ma će prit još čuda puti, kako za kega i kako kemu… Zato – ni ča čekat, neka Valentinovo bude saki mogući dan ki nan je regalan!

– Za Valentinovo – otpret špinu besed lepeh i ne grdeh… Pustit oganj jubavi i bit srećan. Srećan! Zaplavat va more prijatelstva. Imet čuda jakosti i snagu za podnest, za drugega razumet i so zlo poslat h vragu!