Snimio Marko GRACIN
»Molitva za te«, knjiga j' va ku je Mirjana na 180 stranic, kako poveda, poštivala celi svoj život. Klala j' nutar se i sih ki joj va životu znače ale su značili. Ki bar jedan sled poznaju Mimu, znat će ča jih va »Molitve« čeka. A čekaih vagun ljubavi
Za ki dan, točneje utorak, 8. devetoga Mirjana Bobuš će promovirat svoju knjigu pjesam. Ka je, ča je i s kud je Mirjana Bobuš, skoro pa da ni ne rabi povedat aš ki za Bobušicu, Mimu, Cucu ale kako je već zovu ne zna? Ki ju ne pozna? Intanto j’ ta majstorica od versi, not i pozornic sen va svomu zavičaju dobro znana. O knjige ku j’ nazvala »Molitva za te«, ma i o još čuda toga poćakulali smo z ovun Kraljevičankun, za ku će mnogi reć da nima dlaki na zajiku. A da ne da straha na se, da ni ne govorimo. Najprvo smo razrešili zač se knjiga zove tako kako se zove.
– Zove se »Molitva za te« po pobjedničkoj pjesmi jubilarnoga pedesetoga MIKa jer je taj MIK bil kruna moga stvaralaštva. Jer san to leto slavila dvajset let stvaralačkog rada i zato ča je to molitva za moju kćer. Knjiga je i posvećena njoj da jednoga dana more svojoj dici pokazat ča je to nona delala.
Muke po Christiane
Mirjaninu »Molitvu« izdala j’ crikvenička Katedra čakavskoga sabora »Kotor«.
– Urednica knjige je Christiane Jordan, moja prijateljica ka je celo leto brbala po mojimi teksti, i fajli, i škabelini da najde se ča se napravilo va dvajset let. Namučila se fanj. Naiskali smo se aš mi je jedanput, on sakramenski virus, sve pojil pa san iskala pjesme svagdi naokolo. Christiane je osmislila i korice, i slike na klapnami knjige tako da je to sad sve ispalo super. Inače zanimljivo je da je ona Njemica z Grobnika ka je urednica knjige na čakavici.
Kad je Christiane, Grobnička Njemica ale Njemačka Gromiščica prehitila se ča se j’ prehitit rabilo, odnosno preiskala sa ona mesta na ka bi Mirjana morda mogla pohranit svoju arhivu, nastala j’ nova muka – ča, kako i po ken ključu se to med korice spravit.
– Knjigu j’ Christiane podelila na osan deli. Zovu se – Molitva za te, Moja familja i del mene, Tribalo bi zakantat, Nevesta od soli, Prošeći se z manun po Kvarneru, Dešpet, U kamenu me nađi i Ča je – je. Gljedale smo kamo ča spada pa su pjesme o kraju, o familji, o semu ča san pisala posložene, recimo pa po nekakoven redu. Tu je i del pjesam z mojih prvih dva CD-i ki su bili na štokavici. Malo ljudi zna da i postoje ali su posebne.
Se ča treba bit
Mirjana govori da j’ zmed teh 180 stranic celi njeji život.
– Ja, ča se smeješ, veruj mi – knjiga ima 180 stranic i va njoj je sav moj život. Potpišujen to ča govorin. Nutri j’ ukupno 144 pjesme. Ako se zame va obzir da me dva MIK-a ni bilo nikako, onda je to puno za 18 let stvaranja. Ćeš statistiku? Ćeš? E onput slušaj – na Festivalu Melodije Istre i Kvarnera 37 pjesam – 19 nagrađenih, i puno pobjeda. Na Melodijami Kvarnera va četiri leta – 15 pjesam, 11 nagrajenih, i pobjede na tri. Onda su tu još i Čansonfesti, Grobničke skale, Splitski festival, Marko Polo fest i posebno delan CD-e za Mirka Cetinskog. Moraš priznat da su to lipe brojke. Ki put ni sama ne verujen da j’ tomu tako, a je. Intanto, va knjigi je sad sve. Ima ih par ke nisu uglazbljene. Prof. Car Ilić oduševila je pjesma »Moji taki« ka j’ nastala kod parodija na pjesmu »Moja štikla«… Ma, ča ću se nabrajat, leh ćuti ponovit – nutre je sve ča treba bit.
Da bi tomu bilo tako, ča će reć da j’ »nutre se ča treba bit« rabilo j’ fanj vrimena. Knjiga j’ nastajala dvajset let, ma ni pripravila se ni preko noći.
– Delale smo pomalo. Puneh šest miseci smo ju slagale. A kako san ja živac to je se Christiane slagala i selektirala. Ja sam pretežno njurgala i jedva čekala da sve to fini. Moran priznat da j’ to jedno velo delo i da ni bilo baš jednostavno to poštivat.
Naslovnicu knjigi osmisleli su, i opet Christiane. Uza nju još i AD Grafika d.o.o Rijeka.
– To ti j’ more, i samo more… A nutri na klapnami sve ono ča je meni bitno ili mi je bilo bitno va životu. Ča j’ to? To neka ostane iznenađenje za svih ki kupe knjigu. Kad je zameš v ruke osjetit ćeš mene i moj život od koric do koric.
Tri va jedan
Mirjana j’ va karijere najčešće pisala i kantala o ljubavi, ma ako j’ ki socijalno osvešten, e, onput je to Bobušica, tako da se zmed te ljubavi, s kun knjiga zrači, zatukla i ka i ka socijalna pjesma.
– Promocija knjigi bit će va Caffe baru »Nad Uron«, utorak, osmoga devetoga, na šest i pol večer. Za oni ki ne znaju, »Nad urun« je kafić na vrh Robne kuće Korzo. Alida i Žarko Diminić valje su rekli da će se promocija delat »Nad Uron«. Fala njin na tomu. Tu smo ionako slavili Dan Republike i Dan žen pa je bilo ludo. S manun će bit i moj Pape (Zoran Papić op.a.) aš ki je videl promociju od kantautorice, a bez da se kanta? O samoj knjigi govoret će profesorice Ksenija Car Ilić i Marija Gračaković Morda će doteć i dr. Rajka Jurdana i morebit i z manun zakantat. Vrata su simi otprta i neka dojdu. Ako ne arivaju v Riku, promocije će se posle još delat va Crikvenici jer je se i krenulo z njimi, va Kostreni aš je puno pjesam o pomorci i o moru, morda i va Bribiru…, nabraja Mirjana.
– Ja, ča se tiče socijalne poezije i toga ima. Imala san hrabrosti napisat i odkantat »Ki je upalil svitlo«, pjesmu o propalimi firmami i rasprodanoj zemlji. Ča više gremo naprvo to bin, nažalost, na istu temu mogla dodat još vagun kitic. »Ne pačajte moju dušu«, »Neka nan vnuki oproste«, pjesme kadi bi se rabilo zamislit nad sobun aš smo sve raskantali. Pa, i sama »Molitva za te« ni niš drugo ako ne ponos zad koga se skriva i vela tuga, veli očaj ča j’moje dite, uza se to ča j’ bila najbolji student moralo proć na drugi kraj svita da bi našlo svoju sriću, da bi našlo egzistenciju. Moje dite i još 25 tisuć takoveh, mladeh, sposobneh i šegaveh kakova j’ ona. I njihove materi ćute se ono ča i ja – ponos, ma nose i velu ranu na srcu. Se ovo o čemu govorin je žalosno.
Na pitanje ča j’ ona zaspraven – Mima od versi. Mima od not ale Mima od mikrofona, leh se j’ nasmela i odgovorila:
– Se to san ti ja. I glazbenica, i pjesnikinja, i izvođačica. Gledaš jednu, dobiš tri! Onda san još i neshvaćena va vlastitomu gradu, gradu koga san opjevala uzduž, popreko i tako ki zna kuliko puti. To je najžalosnije od svega ali san se s tin naučila živet. Lani, nakon jubilarnog MIK-a i titule kraljice MIK-a ni mi z Grada imel ki poslat čestitku, a kamo li stisnut ruku. Ma, oni se minjaju z leta va leto, a ja ostajen va kanconami, va grotami, med običnin pukon od koga i potičen. Ja ostajen va ovoj zbirki. Ostajen ljubav va kamiku isklesana… Pit će me va bevandi. Svitlet ću va lanterni. Kad zapuše vela bura del mene će bit va njoj… Kako god obrneš vavek dojdemo na onu moju pjesmu s početka 90-tih let pasanoga stoljeća aš ćeš nećeš pu mane vavek vredi ona »Zami me sobun sakamo«.
