Ako ste misleli da san se i ja prijavila na natječaj za direhtora Turističke zajednice Rike, grdno ste se prevarili. Nisan, i ne zato ča mislin da to ni zanimljivo i lipo delo nego zato ča znan kuliko je dela na tomu radnomu mestu, a i ka je to okapancija. Zato, ča se mane tiče – neka Škarpe tamo kade je, a i sen ostalen prijaviteljon želin se najbolje va utrke za čelnoga čovika turizma v Rike. Nadan se da će najbolji dobit, se drugo ni bitno – turisti su dohajali i dohajat će, manifestacij je bilo i bit će, a vavek će se neki nać ki će njurgat. Bilo i bit će. Kada smo već pu njurganja, moran van povedat kako smo na panelu ki j’ bil prirejen na opatijskomu Mikovskomu danu, si skupa njurgali da naša čakavica ni dovoljno zastupljena na državnoj razine. I panelisti, i publika naveli su mnogi primjeri ki su podržali ta zaključak – i da nan državna televizija ne prenosi MIK, a ako i da da ga klade va termin va komu ili si delaju ili si spe, da nijedna reklama ni na našoj čakavice, da su si drugi dijalekti već zastupljeni i naravno – da nimamo nijednu seriju va koj će se ako niš drugo, a ono bar sled provuć naš govor.

Ljudi moji dragi, kako ćemo ju imet kad niki od teh silneh čakavci ki pišu ni još napisal scenarij. Ni za ozbiljnu, ni za neozbiljnu. Kako ćemo ta čakavski rinut na državnu razinu kada va sakoj ankete ku delaju kolege z televizij po Rike od deset ljudi njih devet odgovara na standardu, mada se po mehkomu govoru vidi da su pravi čakavci. Ako nan samemi čakavski služi leh za po doma, onput ča se imamo ni jadit, ni žalit ča ta isti naš prelipi govor ni probil okviri mesta va komu se govori. Ala, recite sami, kada na televizije gljedamo nekakov prilog z Dalmacije kuliko od pitaneh govori standard? Ma nidan! Lipo da ih se sto anketira si će oni povedat na svomu dijalektu. Od diteta, preko težaka i delavca va škveru, do profesora va škole, dohtora znanosti i ča ti ja znan koga. Niki se od oneh ki kantaju neće pojidat će ostatak državi znat ča oni pjevaju ale ne, oni pjevaju po svomu, a pu nas je sasma obrnuto. Mi leh njurgamo kad smo na kupu i vavek nan je za se neki drugi kriv. Počinjen od sebe pa dalje. Lipo san na tomu panelu rekla da san prelena za pisat scenariji, ni da ja ne bin, ma mi se ne da. Primjer za to da iman pravo su Đurđa i Franko. Predstave su njin na čakavski, putuju ne leh po celoj Hrvackoj leh i šire i sagdere njin je – rasprodano. I zajedno da se pospen z popelon – ja još nisan arivala videt niti jednu jedinu. Kad god oni nastupaju, ja delan ili moran neš ča moran i aš moran. Neće bit druge nego šparat i šparat pa njin platit, prosit i molit da mi na Višnjevicu, na privrat dojdu od sake odigrat baren kvarat. Tako ću i ja moć reć da su mi Đurđa i Franko – najveći promotori čakavice – rasprodali dvorišće.

Lipo j’ bilo na tomu Mikovskomu danu. Utaknula san neki ljudi ke još od mladosti nisan videla, a ono ča mi j’ bilo najlipje med sen ten ča j’ bilo lipo – a se je bilo – je to ča su na opatijski Mikovski dan došli ljudići z cele županije. Videla san Hreljani, Zlobinjari, Praputnjarci, Krasičari, Kukuljančani, Škrljevčani, Bakrani, Gromičani, Gorani, Krčani, Kirci, a o Liburnije da ni ne govorin. More bit je bil i ki Istrijan, to ne moren tvrdit aš ne moren ni ja seh poznat. Intanto, bilo j’ to jedno lipo zapolne i jedna lipa mikovska opatijska večer. Dule mi j’ povedal mnogi vici i dobro me nasmel, kod i gospa ka je došla do Ferlina doklen smo sedeli na zidiću, fumali i otipali Maria, rekla – Robert, ča ti nimaš soldi za cele brageši leh komać za ove polovne. Nisan ni abadala va ča je Ferlin obučen, pogljedan i vidin da ima moderne brageši z škuljicami za ventilaciju. Avah je mane, gospa draga, ove brageši na škulji već koštaju leh da su cele, rekla san, a ona me ni ni pogljedala – njeji celi svit je bil Robert Ferlin. Ni gospa bedasta, aš moj prijatel Robi nikada ni bolje zgljedal leh ča sada zgljeda. Ta penzija mu očito jako paše, pa si smiron mislin kako j’ i mane vrime za jedan fejslifting ki se zove – projdeš va penziju pa se preporodiš. Javin van kada će to bit dočin se sama sobun dogovorin. Do onda, kuraja i pišite scenariji, a ne se po društveneh mrežah karat ka je fijumanska, a ka čakavska beseda. Se su one naše!