Zač se oružju daje naziv po blagu, pita mane mat ki’vo dan. Odgovaran – a, ča će mu dat ime po cveću, recimo baš bi bilo super da se tenk zove fijolica, a avion latica. Poslala me j’ vrit i to j’ bilo se ča smo imele reć na temu oružja i naoružanja. Se drugo ča ste o tomu oteli znat, a niste se nikada usudili pitat su rekla prva dva čovika od državi, a to je – niš. Ono ča mnogi više pojida od toga kuliko košta tenk ale avion je kuliko košta kilo odojka ale kilo purice. Tr i sami znate da j’ vrime od blagdani i da na stolu trebe bit se po peesu, a o teškomu naoružanju, kod i onomu lahkomu, letećemu i plovećemu neka se pojida on ki j’ za to zadužen. Ča se ostaloga tiče, bitno j’ znat da će skoro školske ferije, a i one saborske. Natrudili su se i jedni, i drugi pa j’ u redu da malo počinu. Uostalon kakovoga bi smisla imeli si ti silni adventi ako na njih nima ki doć aš dela. Kako san već rekla – ni sela va komu se neadventira, a ja baš zato ča delan va nedobu još se nisan adventirala ni na jednomu. Pratin se to preko slik i video klipići ki se vrte po društveneh mrežah i moren van reć da su si ljudi dali truda, pa mi ni jasno kako se još ni niki domislel birat najboljega. A va tomu bi izboru bilo čuda kategorij. Mogli bi birat advent z najveć lampic, onput onoga ki ima najviše ceni, pa onoga ki ima najmanje, pa advent ki ima podno grijanje, pa onoga ki ima umjetni sneg aš pravoga, najvjerojatnije nećemo videt. A va kategorije advent z najlipjin klizališten bila bi vela gnjeta za nagradu aš, ako slučajno niste primjetili, ovo leto su klizališta pravi hit. Ako nimaš klizalište, to ti j’ koda nimaš ni advent.

Moje mišljenje o klizalištu? Ma, ki voli nek’ izvoli, a ča se mane tiče, nekako najveć volin kad nisan na skliskomu terenu. Na sklizaljke va životu nisan stala, a na rit san fanj put pala pa se, poučena iskustvon, držin dalje od bilo kakovoga leda. Niman niš protiv da dečina uče sklizat aš bolje j’ da klizaju leh da surfaju po internetu. Ča se tiče roditelji, ale ne daj Bog non i nonić, e, to j’ kategorija ka bi trebela pripazit. Ni za njih led. Domišljan se puno primjeri kada j’ neki stareji od 40 let stal na klizaljki aš – trebe se provat, pa j’ šla mater ženit ruka, noga, nos, a najčešće rit. Jedna moja kolegica će delničku ledenu avanturu pamtit celi život aš je sirota fljusnula na trticu pa j’ to bilo leto dan Bogu dušu, Bog ju neće. Domišljan se kako si nigdere ni mogla mesta nać. Skucala je i na sedeć i na ležeć i na stojeć. Pa j’ onda dugo, dugo sedela po boku, a i dandanaska osjeti saku promenu vrimena. Zato, pamet va glavu i ne se rivat tamo kade ti ni mesto. A i inače ne se rivat aš kakovo j’ vrime došlo, to nikada ne znaš ki će te tresnut, a da ni ne trepne. Ljudi su baš postali blaga i opće ih ne dotiče duh Božića.

Ki’vo dan parkirevan spred Novoga lista i čekan da kraj auta pasa neki čovik da mu ne pačin opirajuć vrata. A on gre, sam sobun maši i otpeva i pasa kraj moga auta, pa mrtav hladan hrakne va šoferšajbu onomu ča j’ bil parkiran spred mane. I već san ćapala za kvaku od auta da ću mu reć kako to ni lipo i va redu, a onput stanen i mislin si – pušćaj, ki zna kako bi finilo. Ni ne trubin već nikomu na ceste kad to zasluži aš ne znan ima pištolj, pušku ale loš dan. Bolje j’ bit na miru. Svekrva mi pak poveda da j’ bila na place i komać živu glavu zvukla. Najme, ona i suseda su čekale bus i bus je došal, vrata su se oprla, a z nutra je zletel nekakov čovik kod furija porival seh ki su stali spred busa i čekali za poć nutar, ona j’ odletela na susedu, suseda preko klupice, a ta nesnaga je prošla koda niš ni bilo. Da nisu na busnoj bila tri dečka ki su podizali seh ki su pali, me par da bi ti penzići još i sad tamo ležali. A da ni ne govorin kako va 21. stoljeću postoji robovlasništvo. Da neki more držat nekoga kod roba, to j’ strašno. A eto, ni se to dogodilo ni va Tonguzije, ni na Marsu leh va Gorskomu kotaru. Škifo mi je se to skupa, i ovo vrime, i ovakovi ljudi. Pa, kad moja roditeljica reče – Majko Božja, kamo gre ov svit najraje bi njoj rekla – va tri materine, ma mi j’ neugodno.