Danaska ću bit tužibaba. Ne znan je to zato aš mi j’ već sega dosti, zato ča nisan na ferijah kod i vas normalan svit, zato aš mi j’ već puna pipa tolerancije i vavek nahajanja nekakovoga opravdanja za neš ča se opravdat zaspraven ne more ale zato ča san već stara i njurgava. Bit će da j’ kombinacija.

Intanto ovako – najprvo me j’ razjadilo to ča na službeni upit niki ne odgovara ni službeno, ni neslužbeno, a kako san imela videt suha graja još vavek stoji na busnoj va Bačićih. Onput su me razjadili si oni ki čitaju portali ne da bi pročitali ča piše leh da bi komentirali ono ča nisu pročitali, odnosno pročitali su leh naslov s ken po običaju novinar nima nikakove veze, ma tu je da bi se po njemu pljuvalo. I ni problem ča nadležni za smeti nisu smeti zeli ća leh su se ulovili za kačku ka j’ tamo viđena.

E, pa volela bin videt ti silni šegavci da njin, doklen čekaju bus, ale njihovoj dece kačka pasa kraj nog. More bit onda da bi manje srali, oprostite na izrazu, a malo već mučali. Tr bar san ja selsko dite ko se j’ nagledalo kačak i znan da bin zavrisnula da san ju videla, a to ča turbo pamet pita – a, gdje će biti zmija ako ne u prirodi, e, to me j’ najveć razjadilo. Ako j’ prirodno stanište kačke najfrekventnija prometnica i busna stanica, onput saka čast.

To j’ ča se tiče smet, površneh ljudi i službi ke ne delaju svoje delo, a sada ča se tiče odgoja dece. Ki’vo večer sedin va oštarije i provevan z glavine otpustit se ča ne rabi bit nutre. Ma, pazi da ne bi. Stol do mane neka familja z dvoje dece. Ta dečina kriče, oceraju se, hitaju cjenik jedan na drugoga, prolevaju se kolun. Da skratin – neme. Mat i otac, saki svoj mobitel spred nosa i anke abado. Mislin si, ovi su kuleri kad najedanput manje dite nemeć okolo stola popikne se i tresne na kolena. Oceralo se j’ tako jako da mislin da ga j’ bilo čut do vrh Učki. Mat je skočila, počela plakat, otac je skočil, zove konobara da neka donese kutiju z prvon pomoći, stareje dite je isto počelo vriskat – uglavnon urnebes leh takov. Pogljedan malo bolje da vidin te rani, kad ono leh jedno koleno orusano i to va toj mere da ni krvi ni bilo. Samo san pomislela kuliko puti san ja pala i to puno huje leh je ovo dite, a da nisan ni suzi spušćala, a kamo doma rekla da san pala. To j’ va momu djetinjstvu bil normalan del odrastanja. Uglavnon, ditetu su sanirali to koleno i onput još zanjurgali da bi konobari morali malo bolje pazit kamo stavljaju ta postolja od suncobrani, a to ča bi oni morali malo bolje pazit na svoju decu, a malo manje na mobiteli i prčkanje po njimi i to ča bi deca na jedanajst ur večer već morala trdo spat, e to nikomu niš. Kad su šli ća, si smo odahnuli, a mane j’ bilo žal brižnoga konobara ki j’ moral počistit se ono ča su oni pušćali zad sebe.

Ma, nismo si isti pa ni konobari. Isto mesto, leh druga oštarija, odnosno fastfud. Okol deset i pol večer gren trudna i lačna kod pas po hotdog. Oni ki su bili s manun su večerali pa da bi sladoled. Dojden, zad pulta nekakova divojka od svojeh dvajsetak let komać da je promrmljala odgovor na moje dobar večer. Kad san rekla da bin hotdog, kroz zubi je zarežala – kuhinja radi do 11 i sad možete dobiti samo čiz ili burger. Bledo san ju pogljedala aš, rekla san van, bilo j’ deset i pol i pitala – oprostite, a zašto ne hotdog. A ona je kod govorni automat ponovila – samo burger ili čiz. Rekla san da neću i šla do frižidera z đelaton. Tamo seh vrst toga sakramenskoga đelata, ma na nijednoj padele ne piše ča j’ nutre.

I tako moraš pokazat prston na padelicu i pitat, oprostite ča je ovo, a onda ti mrgud odgovori i pokle dva pitanja, a što vam je ovo, mrgud je mrtav hladan rekal – požurite s narudžbom imam još posla unutra. E, pa da ti kurbu prasicu i pol – znan da j’ teško nać radnu snagu, znan da se ča j’ level iznad, dela po obale ale vane, ma ne moraš bit virtuoz, samo budi pristojan. Ovako nisan dobila hotdog, nisan zela đelato leh san mrguda pitala va koj smene dela drugi dan. Uzvratila je – a, zašto bi se to vas ticalo – na ča san ja odgovorila – da va tu dobu ne dojden simo. Ljudi na terase su se nasmeli, ona j’ gljedala va me kod telica va šarena vrata, a ja san lačna šla dalje.

Eto, to j’ bilo par sličic ke su mi sigurno pasanu šetemanu »dignule ionako visoko raspoloženje«. Vi komotno morete sad reć – tužibaba Reza pojila Kineza, ni njoj bilo dosti pa j’ pojila i kosti…