Ča da van rečen, osin – to san nazada. Te ferije čekaš i čekaš, a kako dojdu, tako projdu. Za iskreno reć – i neka su, aš da su još ki dan podurale, va novinah biste čitali o još jednoj obiteljskoj tragedije. Ne znan ki bi koga, ja nju ale ona mane, ma me par da smo obadve odahnule kad je došal kraj tomu dopustu. Šalu na bandu, ma da j’ s ten zmajon bilo lako zdurat tri šetemane po celi Božji dan – ni. Ona bi van rekla – ovoj telice, ne bi trebelo dat slobodno već od šetemane dan aš ki nju more potrpet ako ju ni ja, ča san njoj mat ne moren, zbilja ne znan. I tako smo nas dve zaspraven krive ča j’ ta prvi toplinski val bil još žešći leh bi bil da ni bilo nas.

Ono okol česa smo se natezale bile su turske serije, moje spanje do polna, moja dohajanja doma kad nidan ki se smatra poštenin svitom ne dohaja, okol njejega »važgaj klimu, zagasi klimu« i naravno – okol politiki. Da ju kolena ne bole i da more na nogi kako j’ nekada mogla, ovo ja nju citiran, bila bi va prvomu redu na Thompsonovomu koncertu.

Aš, »ako j’ dobro tulikemi ljudimi, zač bin ja bila iznimka.« Ni njoj promakla ni jedna emisija, ni jedan prilog okol toga koncerta ča j’ bil na sen TV postajami. Se je njoj bilo ćaro, i oni ki su za, i oni ki su protiv, i oni ki nimaju pojma ni zač su za, ni zač su protiv, jedino ni skopčala ti droni i ta nebeski del koncerta. Ča je dron to zna, ma kako su z dronimi mogli se to na nebu načinit, e to nikako da pokopča. Ja san njoj rekla da nisu to bili droni leh golubi pismonoše z krijesnicami na rite pa me j’ zvajznula šćapon bez puno mislet. Intanto, ni bilo dosadno.

Ono ča mi j’ za zbilja dosadno su ta silna zbrajanja i oduzimanja turisti. Ma, do kad ćemo brojit i gljedat kuliko ih je više, kuliko manje i slično. I kada ćemo konačno shvatit da ni stvar va broju oneh ki su nan došli leh va težine njihova takujina, odnosno kuliko će nan solad pušćat. Ako j’ verovat vlastitemi očijami, jadna nan palenta aš najveć ih vidin va trgovačkemi lancimi. Va oštarijah i restoranih na prste ih moreš pobrojit.

Mnogi govore da smo si za to sami krivi aš da smo ceni od sega i sačesa digli va nebesa, da smo skupi koda smo Dubai, a ja nekako mislin da j’ istina negdere na pol. Istina je da smo skupi, ma istina je i da nan dohajaju oni ki nisu već tako široke ruki, ki paze na saki euro ale dolar. Mislin i da su vrimena od rastrošneh Talijani tempi pasati. A i mi smo se razbahatili aš najraje bi da nan turisti dojdu, plate, obrnu se i projdu. Naslišan malo ovi neki ki imaju aprtmani ale kući za odmor. To njurga na saku, niki njin ni dobar. Jedni da su nesnažni, drugi da se preveć peru, treti da su štufi aš da ne zihajaju z apartmana, četrti da su glasni, peti da ne gase klimu od kada dojdu doklen ne projdu i tako bin mogla do jutra. A ja, za bavit se turizmon trebe imet fanj debeli živci.

Zato se ja ni ne bavin, mada san jako dobar turist – ne delan niš ča ne bin i doma. Zaspraven san još i puno pažljiveja. Recimo doma pušin, a va tujen gren na privrat fumat, čak i kada je pušenje dozvoljeno. Va te đakuzije, saune i slične nemotarije ne gren, va apartmanu ne kuhan aš ne dan ni doma, tulumi ne delan, jutro projden večer dojden, tako da oni kemin ja dojden va apartman nimaju nikakovoga problema. Ki bi rekal, sad si vi mislite. A ja bin rekla aš da ne daj Bog mat čuje da san va tujemu svitu bila bezobrazna i nepristojna bi me se preko novin odrekla. To ju opet citiran, aš upravo to mi reče saki put kad se kamo odbavin.

Nažalost, već se fanj vrimena nisan nikamo odbavljala pa čak ni na Thomsonov koncert tako da san već i pozabila kako to zgljeda bit turist. Sad mi j’ i va Bistricu poć koda gren na izlet, a kad dojden do Postojni to mi je va najmanju ruku koda san šla va London. A ja, tako van je to kad najedanput od diteta postanete roditelj. Ma neka je, tr ni njoj ni bilo lahko z manun pa zač bi mane bilo drugačje. Za ljubav se se potrpi, ča ne?