Sopeta inflacija. Sopeta one grde besedi ke govore da takova od kada je osamostaljenja ni zabilježena. I sopeta mi se to skupa gre na živci.

Najveć da su krešile ceni od jida i pila, ma ne od alkoholne pijači leh od bezalkoholne. Pa i sami ste imeli čut kako već po zagrebačkemi oštarijami i kafićimi naplaćuju žmuj vodi. Najmanje da su šle vajer ceni od sega za obuć i obut. A ča j’ bolje bit zrihtan kad va trbuhu kruli. Do kada će ta inflacija pitaju novinari i si, a stručnjaci kod papagali leh odgovaraju da j’ teško prognozirat aš da sve ovisi o cenami energenti. Da pas mater kurbu prasicu i energenton. Moj se energent i dalje moči na privratu aš va ovoj zemlje se kreši leh daž pada i to kad ne rabi. A i auto mi gre na dizel pa san i po tomu pitanju da ne buden prosta neću reć kakova stranka. More bit san ja bedasta, ča j’ saki ki put pa moren i ja, ma mane ni ćaro zač je sad najedanput benzina jeftineja od dizela. Ča ne gredu kamioni, busi i sa druga transportna sredstva na naftu ale dizel, a brodi na plavi dizel i ča ne bi onput bilo logično da isto košta kod i benzina ako ne i manje pa ne bi morale krešit cene transporta ni robe, ni ljudi, a kad bi čovik došal va ribarnicu ne bi se već na vrateh zbatil kad vidi kuliko riba košta. Ma ča riba – kuliko se košta. Zaspraven, ča j’ bolje skucat, bit će ča bude.

A kako saka nevolja natira mozak da malo brže dela tako će i ova pa san čera imela čut od kolegic i koleg kako će oni provat prezimet ovu zimu va ovoj silnoj skupoće. Jedna j’ rekla da će se ona grijat na mački. Oduševila me je aš do sada za tu vrst grijanja nisan čula, ma intanto kad malo bolje promislin ima ona tri mački, vječito jih pazi i mazi, a mački su tepla bića pa njoj ta ideja opće ni loša. Mladi kolega je rekal da će uložit va dolnju robu, ča će reć da će kupit par dugeh mudanti i jedan dobar skafander pa nek bude ča mora bit. Još je dodal da ako mu ča va takujinu ostane da će provat nabavit namišnjak. I tu se j’ zajedno zbudil on talent koga do ove krizi nikada nisan imela, a to j’ talent za trgovinu. Valje san se domislela na Liku i na sa svoja hluđenja po toj, jednoj od najlipjih regij Lipe Naše. Dakako i na si ljudi ča san jih va svojeh putešesvijah utaknula. Znan kamo ću i pu koga po coklji, znan kamo ću i pu koga po namišnjaki, a bome znan i kamo i pu koga po kopice ali bele vunene kalceti. Valje san se videla – na nogah kopice, na kopicah coklji, a na cokljah papuči dva broja veće pa osin ča će mi bit teplo rešit ću se i one silne potragi za obuvalon broj trejst i pet. A ča ću z namišnjakon? E, pa rabi z nečen i put platit pa ću lipo tu stvar ka čuva onu mušku stvar klast va slobodnu prodaju. I tako z jednen udarcon dve muhi – najprvo san pomogla sebe, onput i malemi proizvođačimi, a ako ćemo pravo i očuvanju tradicije. Vidite kako teta Nevolja na se natira pa i mane na trgovinu.

Morda se hitin i na veletrgovinu aš znate i sami kuliko će bit oneh ki neće moć platit računi za letriku, plin, drva, peleti, naftu i nimaju mački da jih teple. Kad malo bolje razradin ovu svoju ideju o trgovine, javin se z konačnen elaboraton, a do onda morete narudžbi pušćat na mojoj fejzbuk stranice ku ću opret i ka će se zvat JLZ i to ne znači ono ča ste prvi mah pomisleli, a ste, leh je skraćenica od »Jako Lika zgrije«.

I sad namesto da naslišan Milanovića ki hludi kamo rabi i ne rabi, da naslišan ki j’ koga otipal po Saboru, da naslišan o nevrimenu ko j’ šundralo i društvo, i prirodu, zmed sega toga i da naslišan o engeskoj kraljice ku popeljuju po zemlje koda j’ cirkus, a najprvo namesto da naslišan svoju Kraljicu Majku ka opet drvi o nepospravnin drvimi, lipo ću se hitit na razradu ideje o trgovine. Intanto j’ jedan čovik odlučil o sudbine PIK-a pa ča bi mane rabil još ki va donošenju mojeh odluk. Ako j’ ki od volji da uloži va ov moj biznis, leh rabi sest i poslat poruku.

Tr ako su se oni na Dugomu otoku refali prodajuć sretni dreki od magarca, ča se ne bin ja prodajuć coklji, kopice i namišnjaki. A uza se to, ne pozabite – ovo j’ trgovina ka čuva i okoliš i natalitet. Ni van z hujeg malo razmislet o semu ovomu. Priznan, zgljeda fanj nemo, ma danaska najbolje prohaja nemilo.