Ča se tiče politike – mučimo, a ča se tiče nogometa – još vavek slavimo. Pa ni mala stvar načinit ovo ča su nogometaši Rike načinili va pasanoj šetemane. Ako po bande klademo neke stvari za ke bi bilo bolje da se nisu dogodile, a bilo ih je, moremo reć da j’ celi ta šušur pasal već leh korektno. Ča bi jedan moj poznanik rekal – ta Slaven Belupo je već tu leh je doma, da mi se čini koda su se z Koprivnice preselili v Riku. Intanto, neka njih tamo kade njin je mesto, i neka dva trofeja tamo kade njin je mesto. Sakomu svoje. A ča se tiče same utakmice, ćete one za prvenstvo, ćete one za kup, pu mane doma bila j’ ista atmosfera. Koda se niki i niš va kuće ni pomaknulo teh par dan zmed jednoga i drugoga dogajanja. Ja na isten mestu, mat na isten mestu i nećete verovat – tranzistor na istomu mestu. Ja, dobro ste pročitali – tranzistor! I sad na stran i utakmica, i nemilo moje materi okol sega i sačesa, i čuda grdoga ča j’ zdelila na račun suci, aš i da ona sudi, samoj sebe bi delila gnjusarije, i to ča san sopeta morala od nje maknut se ča se more razbit ale hitit, i bacilajmo leh za tranzistor. Jušto ta mića stvar je ono po čen ću pamtit uspjeh NK Rike 2025. leta. Nisan ni znala, zaspraven – pozabila san da ga opće još vavek imamo, ma moja mat ni.

Najme, ovako smotana kod ča san, nisan ni na jednomu programu mogla nać prenos te sakramenske utakmice, pa se j’ moja roditeljica razjadila, prošla va kamaru i donesla – tranzistor.

– Na, najdi mi tu ukakmicu i da te nisan čula povedat, rekla mi je i rinula mi tranzistor pod nos.

– Pa, dobro j’, moremo prenos naslišat i na radiju, ki zna ako ovo dela, rekla san i va čudu obrnjala ta tranzistorić ki j’ bil najbolji prijatel momu pokojnomu ocu čuda let.

– Na to ću naslihat i šlus, zazijala je roditeljica, posela se i klala šćap blizu aš saki ima svoj navijački rekvizit, pa i ona.

Ni bilo druge leh, pod jedan maknut se dalje od rekvizita, a pod dva takat ta tranzistorić i poiskat Radio Riku. Od boga srića da mi j’ to valje uspjelo, aš da ni, ne znan ča bi bilo. Nas dve smo sedele, tranzistorić je stal na stolu, ona j’ mašila i otpevala, zijala i sovala, a mane j’, kako bi rekal Let 3, tranzistorić – omađijal. Na Rujevice su se odvijale povijesne minuti, a ja san prošla va povijest. Va djetinjstvo, va komu san se naslušala i naslušala i utakmic i sega, i sačesa na očevomu tranzistoriću ki j’ š njen pohajal od vrta va ken je kopal, do sediljki na privratu za vrime teplih ljetnih večeri, do natkaslina na ki bi ga bil klal da još malo ča čuje prvo leh zaspi. Domislel me je na se gradske cesti i parki ki su živeli z tranzistoron. Zaspraven živeli aš kod ča danas saki nosi mobitel, tako su nekada ljudi nosili tranzistori. Jedina razlika je ča su onda grupno naslišali tranzistor, a danaska saki žbalji i nasliša svoj mobitel. Nestala j’ ona društvena nota.

Na njemu san čula i ono legendarno Delićevo »ljudi moji je li to moguće…«, naslišala MIK let i let, saku Primorsku poneštricu… Avah je mane, lipeh li vrimen. I se tako mislin, i na pamet mi pade da san i toga 1978. leta, jušto na tranzistoru čula da j’ Rika osvojila kup. Se ovako smotanoj za nogomet pal mi je na pamet jedan Crnogorac. Ne Đalović, leh Dragutin Spasojević Spaske. Kako nisan bila sigurna va se, i va svoja domišljanja, brzo san ćapala mobitel i uguglala Spasojevića, čisto da vidin san još pri sebe ale san prošla na ocat. I najden. Dobro je, još nisan za hitit – je, Spaske je bil trener Rike toga 1978. leta. Išćen dalje i najden fantastičan tekst pokojnoga Orlanda Rivettija va komu zmed ostaloga piše: »Avramović na vratima, Makin i Hrstić na bekovima, Radin i Juričić na stoperskim pozicijama, Cukrov i Ružić na sredini terena, Durkalić na jednom, Desnica na drugom krilu, Radović kao druga špica koja skuplja Kustudićeve otpatke i pretvara ih u golove. To je bila Rijeka Dragutina Spasojevića. Bez pretjerivanja, najbolja Rijeka svih vremena! Iako će neki kazati da je to možda ona iz šezdesetih – Jantoljak, Milevoj, Mugoša, Radaković, Šangulin, Vranković, Lukarić, Zadel, Veselica, Naumović i Medle. O ukusima…«

I baš mi je bilo lipo va teh mojeh sjećanjeh va ke me je tranzistor otpeljal, a uza sve to još san i dokončala da šjor Mišković ne mora dugo hodit za iskat treneri – leh skoči va Sloveniju ale Crnu Goru. Čestitke NK Rike i momu tranzistoriću!