Pusti su šli va dim, ča će reć da j’ pust finil. Kako j’ ki va pusnomu vrimenu pasal, to saki za se najbolje zna. Ako j’ verovat vlastitemi očijami, one su na veloj povorke Rečkoga karnevala pasanu nedelju videle čuda nasmejanih ljudi, ča će reć da j’ bilo, kako za vrime maškar i treba bit – udri brigu na veselje! Mogla san reć i – pamet na pašu, ma kako pameti baš jako niman, niman ča na pašu pušćat, a ni z paši vrnut. Intanto, ono ča j’ mane dalo mislet na kraju pusnoga vrimena je – rabi nan na ovomu području krematorij ale ne. Zaspraven ću van reć kako mislin da nan altroke rabi. Pusti svoga krematorija imaju, i to ne leh jednoga, a kako iman pročitat i čut – ljudi se se već odlučuju va oganj, namesto va zemlju. Čula san i da se si ti ki se odluče na kremiranje moraju peljat va Zagreb, a kako j’ vela navala da ta vražja peć sako malo otkaže poslušnost, pa mrtvi Zagreba putuju va Osijek i tako mrtvi proputuju ono ča mnogi od njih za života nikada nisu. Ako se to zamemo va obzir, onput Rike, uza se ono ča njoj rabi, rabi i krematorij.

Dakle, krematorij rabi aš ako ga imaju pusti, trebaju ga imet i ljudi. Ma, sad homo korak dalje – i da imamo ta sakramenski krematorij, nimamo ono najvažneje. Ča? Pa grobari. Kuliko znan, to j’ jako deficitarno zanimanje, i niki baš, ako ni vela nevolja, ne bi to delo delal. Razumen ja se to aš ni lahko saki dan va nečigovoj tuge sudjelovat, a njin je tako od početka do kraja radnoga dana. Da ni ne govorin kako već napamet znaju saku plovanovu besedu i komotno moru pokojnomu odmašit namesto njega. Jedanput san z jednen povedala, sega vranića san od njega čula. Tuliko toga ča nikomu ne bi palo napamet da se jednomu grobaru more dogodit. To j’ jako stresno zanimanje. A, iskreno ću van reć, mane ni jasno zač mnogi to zanimanje podcjenjuju, a zapravo je jednako odgovorno kod ono od babice ale, kako se to sada reče – primalje. One nas prime i pošalju va svit, a ovi drugi nas odbave na onaj drugi. A nikada niki ni rekal – uf babica, ma će mnogi reć – uf grobar i raje bi šli kurbe nogi prat leh pošteni ljudi pokapat.

Čudna smo mi sorta. Mislin na ljudsku rasu. Recimo, ja poznan dva legendarna grobara. Jedan je pokojni, a drugi je živuća legenda. Pokojni je šjor Ket z Trsata ki me j’ jedanput tuliko prestrašil da se i sad sa nashren kada se domislin. Škura noć, kratin put preko Trsačkoga groblja kad najedanput osjetin tup tup po ramenu. Zavrisnen i čujen – ne boj se, leh san te otel pitat ako imaš ognja. Strel Božja va te pukla, zazijala san i od straha se posela na prvi grob. Ket se j’ posel do mene pa doklen san čekala da mi se srce vrne z pete tamo kade mu je mesto, smo jednu pofumali za si pokojni. Drugi je moj najdraži barba Miko, ki zaspraven ni grobar leh on ki na sprogodih nosi križ, a va slobodno vrime bolje čuva krasičarsko groblje od seh nadzornih kamer na ovomu svitu. Barba Miko je va penzije pa delajuć to ča san napisala krati vrime i održava društveni život, aš kade ćeš videt više ljudi leh na sprogodu. I kade ćeš čut već novitadi ako ne na takoveh skupi.

Intanto, delat kod grobar je delat kod sako drugo delo jedino ča bin njin ja za tu silnu bol ku saki dan gljedaju dala nekakov bonus na plaće, pa se morebit i ne bi našli va situacije da nas za ko leto neće imet ki pokopat. Ne znan kakov odnos imaju strani radniki spram grobarstva, ma nekako mislin da j’ sagdere isti i da se niki od njih ne bi pretrgal za to delo. Tako da nan ni z te bande ni pomoći. Videt ćemo kako stojimo z robotimi, pa ćemo znat na čemu smo.

Sada homo nazada va život. Va Sabor, aš da se tamo najbolje živeje. I sopeta ću to povezat z puston. Najme, sako leto proučavan ta imena od pusti i sako leto si ziberen najdražeg. Ovo leto je, mane najdraže ime imel novljanski pust Tantala Pantala. To van ga dojde kod da se na ovoj bande pust zove Ćinćira Ćanćara ale neki ki govori leh da govori, puno govori i niš ne reče. E, pa tako ja mislin da bi se saki drugi saborski zastupnik trebel zvat. A ča se tiče šjor Dabra, njegove pjesme i njegovoga ultimatuma, evo mu jedna ka j’ preplavila društvene mreži – u Beogradu grobnica od zlata, u njoj leži vođa svih Hrvata. Popratna fotografija snimljena je va Kuće cveća. Tuliko za danas.