Ne znan od kud bin prvo aš tuliko toga bin van otela reć, a sama sebe već sličin na amebu ka nima pamćenja, pa najprvo evo van jedna sličica z moje kuhinje – Ona sedi na trosjedu, okolo nje padelica z črešnjami, pastilja ako ju ne daj Bog ćapa žgaravica, čaša z vodun aš ta ne pije niš osin vodi i čaja kad umisli da je bolna, televizija je na fanj jako, mada ona čuje bolje leh kada j’ bila mlada i ja za stolon ka kljucan niš koristi, kako to gospa mama voli reć.
Jasno van je da ona čeka utaknicu reprezentacije, a ja delan svoje delo sakidanje. Ona ne razume mane i moje »vječito nabijanje po temi slovimi«, a ja ne razumen nju i njeju zanemljenost s ten nogometon. Intanto, dobro je aš muči, ne namalja. A i ča mi ima već za reć kad me još od čera upozorava kako moran pripazit na svoje ponašanje naspram nje aš njoj će penzija krešit, rekli su na televizije, a mane plaća neće, pa da ne bi bilo pokle da nisan znala. I kako sad da njoj ja rečen da to krešenje more jušto maške na rep obesit? I nisan, leh san već sebe va bradu, ne da me bilo ki čuje, tek tuliko da rečen rekla – bonđorno. A ona j’ va sekunde već potrošila se ča ni ni dobila aš ako san nečesa na nju to j’ da ni jedna ni druga ne umemo soldimi. Dobro, ona baš i nima jako ča šundrat, ma ja san za to maher. Ćete se nasmet, mada j’ to već za plakat?
Prvo leh je Plenković dal urdin okol toga benzina i teh silneh soldi kuliko jih je rabilo za natankat rezervar, ja san šla na pumpu. Ne zato aš san ja šparna pa gren doklen su ceni manje leh zato aš su naše ratne rezervi za ovu na momu autu bile mila majka. I tako dojden na pumpu i jušto da ću badnut onu točilicu, neki me zazove. Obrnen se i vidin sebe jako dragu ženskicu ku nisan videla već let i let. Onako z bande vidin črno, ča znači dizel, zarivan ono va ono, stisnen da se samo toči i z gušton počnen ćakulat z tun gospun. Navrezamo mi i od ovoga, i od onoga, lipo smo potambaškale i čujen ja on klik, i govorin da moran poć. Ona govori – avah je mane, mane muž va autu čeka. Lipo se pozdravimo, ona projde, ja pogljedan ki j’ ta broj od točilice i usput vidin kuliko soldi. A, srce Isusovo! Na prvu mi niš ni bilo ćaro – je mi rezervar šup, je stroj ponemel, je… A je, ja san ponemela aš va vrimenu va komu si paze i kuliko voze i kuliko toče, ja san svoga Lujđija, tako mi se auto zove, počastila z premijum dizelom. I neka san, kad je beg bil cicija? Sama sobun san se smela do one gospe na pumpe, a kad je komentirala da ča će reć da točin premijuma leh san rekla – ki nima mozga, ima soldi. I nastavila se smet. A ča san se trebela zićepat? Ma, so zlo i va ten. Za kaznu san sen povedala kakova san ćampaloza. Ma vavek stvar moraš gljedat s više stran. Recimo, ča ne bi bila veća šteta da san namesto dizela Lujđiju za pit dala benzinu?
Pozabimo malo na se muki i homo na karneval. Dečica su oprla sezonu prvoga va povijeste Rike – ljetnoga karnevala. Ma, kade su mićeri nimamo ča kritikat. Bilo j’ lipo i prelipo. Ono za ča se sada pripravljamo je on veli. Valje i naprvo – pamet va glavu aš ni isto popit bocun vina na pet stupnji i na 35. Se drugo je isto osin ča j’ lagje načinit karnevalski kostim za leto leh je on za zimu. Uostalon, po lete je dosti i na golo telo narisat neš pa poć. Uostalon, Rio je pravi primjer semu o čemu ja govorin. A i ako se neki će ofriškat va moru, ni problem – ronioci su spremni, a fala Bogu more imamo. Sedno, ako j’ ikako moguće – kupanje izbjegavajte da se ronioci ne fine. Se drugo, maškaran pridobno – more! Da mi fali Toni? A komu ne fali? Ov novi meštar je šesan i na svomu mestu i opće mi ne pada napamet vuć bilo kakovu usporednicu aš to se more tek kad Meštar Sandi bude imel meštrovanja kuliko i Toni. A to da j’ Toni moj meštar zavavek – je, ma i Sandi će bit meštar za vavek nekoj novoj curice, ka će š njin i karnevalon živet skoro pa 40 let. Intanto, Sandiju držin fige, a Toniju šaljen veli pozdrav. Do maškaranoga rečkoga vikenda trenirajte i to tako da već večeras budete si na opatijskoj Balinjerade, a ne pozabite i da rabi poć na oni tradicionalni ljetni karnevali va Novi i va Senj.
Leh da znate – Ona još sedi na trosjedu, brsti črešnji i čeka reprezentaciju. Da njoj rečen da voda i črešnji tiraju na zahod? Ma, bolje mi j’ mučat.
S kamika i mora
Štajon je od letnjeh maškar parićajte se
Slavica Mrkić Modrić
11. lipanj 2022 10:04
Foto Ana Križanec
Ne znan od kud bin prvo aš tuliko toga bin van otela reć, a sama sebe već sličin na amebu ka nima pamćenja, pa najprvo evo van jedna sličica z moje kuhinje – Ona sedi na trosjedu, okolo nje padelica z črešnjami, pastilja ako ju ne daj Bog ćapa žgaravica, čaša z vodun aš ta ne pije niš osin vodi i čaja kad umisli da je bolna, televizija je na fanj jako, mada ona čuje bolje leh kada j’ bila mlada i ja za stolon ka kljucan niš koristi, kako to gospa mama voli reć.
Jasno van je da ona čeka utaknicu reprezentacije, a ja delan svoje delo sakidanje. Ona ne razume mane i moje »vječito nabijanje po temi slovimi«, a ja ne razumen nju i njeju zanemljenost s ten nogometon. Intanto, dobro je aš muči, ne namalja. A i ča mi ima već za reć kad me još od čera upozorava kako moran pripazit na svoje ponašanje naspram nje aš njoj će penzija krešit, rekli su na televizije, a mane plaća neće, pa da ne bi bilo pokle da nisan znala. I kako sad da njoj ja rečen da to krešenje more jušto maške na rep obesit? I nisan, leh san već sebe va bradu, ne da me bilo ki čuje, tek tuliko da rečen rekla – bonđorno. A ona j’ va sekunde već potrošila se ča ni ni dobila aš ako san nečesa na nju to j’ da ni jedna ni druga ne umemo soldimi. Dobro, ona baš i nima jako ča šundrat, ma ja san za to maher. Ćete se nasmet, mada j’ to već za plakat?
Prvo leh je Plenković dal urdin okol toga benzina i teh silneh soldi kuliko jih je rabilo za natankat rezervar, ja san šla na pumpu. Ne zato aš san ja šparna pa gren doklen su ceni manje leh zato aš su naše ratne rezervi za ovu na momu autu bile mila majka. I tako dojden na pumpu i jušto da ću badnut onu točilicu, neki me zazove. Obrnen se i vidin sebe jako dragu ženskicu ku nisan videla već let i let. Onako z bande vidin črno, ča znači dizel, zarivan ono va ono, stisnen da se samo toči i z gušton počnen ćakulat z tun gospun. Navrezamo mi i od ovoga, i od onoga, lipo smo potambaškale i čujen ja on klik, i govorin da moran poć. Ona govori – avah je mane, mane muž va autu čeka. Lipo se pozdravimo, ona projde, ja pogljedan ki j’ ta broj od točilice i usput vidin kuliko soldi. A, srce Isusovo! Na prvu mi niš ni bilo ćaro – je mi rezervar šup, je stroj ponemel, je… A je, ja san ponemela aš va vrimenu va komu si paze i kuliko voze i kuliko toče, ja san svoga Lujđija, tako mi se auto zove, počastila z premijum dizelom. I neka san, kad je beg bil cicija? Sama sobun san se smela do one gospe na pumpe, a kad je komentirala da ča će reć da točin premijuma leh san rekla – ki nima mozga, ima soldi. I nastavila se smet. A ča san se trebela zićepat? Ma, so zlo i va ten. Za kaznu san sen povedala kakova san ćampaloza. Ma vavek stvar moraš gljedat s više stran. Recimo, ča ne bi bila veća šteta da san namesto dizela Lujđiju za pit dala benzinu?
Pozabimo malo na se muki i homo na karneval. Dečica su oprla sezonu prvoga va povijeste Rike – ljetnoga karnevala. Ma, kade su mićeri nimamo ča kritikat. Bilo j’ lipo i prelipo. Ono za ča se sada pripravljamo je on veli. Valje i naprvo – pamet va glavu aš ni isto popit bocun vina na pet stupnji i na 35. Se drugo je isto osin ča j’ lagje načinit karnevalski kostim za leto leh je on za zimu. Uostalon, po lete je dosti i na golo telo narisat neš pa poć. Uostalon, Rio je pravi primjer semu o čemu ja govorin. A i ako se neki će ofriškat va moru, ni problem – ronioci su spremni, a fala Bogu more imamo. Sedno, ako j’ ikako moguće – kupanje izbjegavajte da se ronioci ne fine. Se drugo, maškaran pridobno – more! Da mi fali Toni? A komu ne fali? Ov novi meštar je šesan i na svomu mestu i opće mi ne pada napamet vuć bilo kakovu usporednicu aš to se more tek kad Meštar Sandi bude imel meštrovanja kuliko i Toni. A to da j’ Toni moj meštar zavavek – je, ma i Sandi će bit meštar za vavek nekoj novoj curice, ka će š njin i karnevalon živet skoro pa 40 let. Intanto, Sandiju držin fige, a Toniju šaljen veli pozdrav. Do maškaranoga rečkoga vikenda trenirajte i to tako da već večeras budete si na opatijskoj Balinjerade, a ne pozabite i da rabi poć na oni tradicionalni ljetni karnevali va Novi i va Senj.
Leh da znate – Ona još sedi na trosjedu, brsti črešnji i čeka reprezentaciju. Da njoj rečen da voda i črešnji tiraju na zahod? Ma, bolje mi j’ mučat.