Daž daži, miš prdi. I tako već nekuliko dan. Ki put slini, ki put zleva i poleva, a ki put, kako bi rekli »Idoli« – dobuje u ritmu tam-tama. Mane j’ ta ritam jako naporan aš me si ovi dani glavina tuliko boli da bin najraje šla pu prvoga bekara i zamenila je za teleću. Razlika va inteligencije ni tulika da bi rabilo okol toga bacilat. Ja, i se kosti me bole, a o duše da ni ne govorin. Koda ji strel pukla va me, pa sad već ne cmoljin leh na filmi od Volta Diznija, počela san i na ovi božićni ke naše televizije, ni važno je ona za ku plaćamo pretplatu ale one komercijalne, repriziraju po ne znan ki put. Zaspraven san sa nekako pekmezasta ča baš i ni za me normalno. A ča reć osin – dojde blagu, kamo ne čoviku. Uostalon, ča više cmoljiš, to manje curaš ča i ni tako loše aš je voda skupa, a i na ta resurs se mora jako pazit.

Intanto san ja vavek poznopak aš va ovu dobu su si nekako veseli, smeju se, vole se i najedanput postanu jako, jako dobri, a pu mane je obrnuto – ni smeha, ni dobre volji, ni ho ho ho, ma niš. Jedan veli drek na špice. Rekla san da neću ni jelvić okitit ča j’ doma izazvalo veli šok i nevjericu aš to j’ bil znak da j’ zbilja vranić zel stvar va svoje ruki. Najme, ja bin, još od kada san bila mića krunila šmreki okol kući kad god bi mi palo napamet, pa j’ Božić puno puti užal bit i po letu. A ja, tako j’ bilo, pa nisu me doma zabadava zvali Antuntun.

Kad smo već pu šmreki, ma ča ni bilo lipje nekada kada su ljudi hodili posić šmrekulj i donest ga doma, pa ga okrunit leh danas kad se odbave i gredu kupit jelvić pa ga pokle hitit va smeti, a neki i preko balkona. I sada mi je va nosu miris posičene šmreki, a ako ćemo pravo i manje se j’ mulila leh današnji jelvići. Je da j’ saka gran svoju pulitiku vodila, ma mane to nikada ni bilo bitno. Ča drugačja, mane lipja. Danas ljudi se više i više kupuju bori od plastiki, pa njin jedan dura čuda let. Draži su mi i takovi leh oni ki se brižni siču po šumami.

Ma, ča j’ bolje mašit kad niš ne moreš promenit. Homo mi na najvažneju sporednu stvar na svitu. Nećemo o tomu je jedanajsterac bil ale ni aš saki pošteni građanin ove zemlji zna da ni bil, leh ćemo o tomu kako su ljudi prokljeti. Doklen su naši dobivali i bili nogometno čuđenje va svitu si su se busali va prsa, si su bili kuntenti, si su već govoreli kako ćemo i na idućemu Svjetskomu prvenstvu bit prvaci svita, a kamo ne na ovomu, a onda kad smo zgubili od Argentinci, promenili su ploču. Sad već niki ni valjal, ni Modrić, ni Perišić, ni Gvardiol, ni Lovren, o mulcimi da ni ne govorimo, a Daliću neki ne bi dali ni da njin kokoše trenira. Ma, ni hujega od ljudske prokletinje. Srića od Boga ča j’ još vavek već oneh ki su normalni pa znaju da j’ za zemlju ka nima ni četiri milijuni stanovniki veli uspjeh bit i treti i četrti na svitu. Baš san malo gljedala, pa glavni grad od Argentinci ima skoro pet puti veći broj stanovniki leš naša zemlja. Oni, kod i Brazilci imaju već nogometaši leh ča ljudi biva va Hrvaskoj. Zato ja kad god neki predmanun reče neš grdo za naši vatreni, njega lipo pošaljen tamo skuda je došal i samo mu predočin statistiku.

Intanto, danaska na četire zapolne naši igraju za to trete mesto na svitu. Niman niš protiv Marokanci, na jednu bandu su mi i simpatični, a bit će kako bude. Bili naši treti ale četrti, to j’ za naklon, a ne za povedat nemotarije. Volela bin, naravno da bin volela da budu treti, ma kako bi naši pulitičari rekli – ni mi to imperativ. Znan da j’ najhuje ostat prvi pokle oneh ki su dobili medalju, ma va ovomu slučaju to opće ni bitno.

Moran priznat da san se i nasmela okol jednoga prijatela ki saki put kad naši igraju ima svoj ritual za sriću – sedi i gljeda na istomu mestu, va istomu društvu ko sopeta sedi na istomu mestu, jidu i piju isto i se njin je isto kod kad su gljedali utakmicu va koj su naši dobili. Naslišan ga ja i pitan – dobro, isto si obučen, ma valjda se to ne odnosi na donju robu. Pogljedal me je i mrtav hladan odgovoril – na se, od šetokalci, preko mudanti i kanotjerice do gornje robi. Ostala san paf i leh rekla – pa ti onput smrdiš. A on mane – bolje j’ i smrdljiv pobjednik, leh naparfuman gubitnik. Čovik ima pravo, ma ja samo znan da š njin nikada neću gljedat utakmicu. Srićno naši!