Ča se tiče rata va Ukrajine, nažalost i ovu šetemanu ono ča moren reć leh je – traje i dalje. Brižni ljudi biže va slobodu i mir pa je va tomu bižanju fanj njih finilo i va našeh kraji. Jako san kuntenta z semi onemi ki su njin dali krov nad glavun, a takoveh je fanj pa mi j’ se to skupa velo ufanje kako čovik još ni pozabil da je čovik.

O našen političaron i njihovemi karanjimi mi se ne da. Štufneji su mi od oneh najštufnejeh turskeh sapunjač ke čak ni moja roditeljica već ne gleda. Ona ih je preko noći zamenila z informativnemi emisijami, i va jednomu danu postala najbolji svjetski vojni strateg ki postoji. To ča nima pojma ni kade j’ Ukrajina, ni Rusija, ča nima pojma ki, ča i komu, niš to nju ne pojida. A tek da van je čut kako govori o glavnemi protagonistimi cele situacije. Kad se ne more domislet kako se ki zove onput za Putina reče – on Rus, za Zelenskoga – on Zeleni, a za Bajdena – on stari, nemi Merikan. Intanto, pojida ju ča j’ se poskupelo. Kuliko i ča, nima pojma aš se već ni ne domišlja kada j’ zadnji put bila va butige. Ma, moran priznat – stala je z namaljanjen o ratnemi rezervami, a i ima pravo – se j’ poskupelo jedino je ljudski život pojeftinel.

Na, ki’vo dan san bila na Trsatu va jednoj oštarije. Kako me j’ želudac ubijal namesto kafa san popila čaj od menti, a kada ja pijen čaj, to saki onaj ki me pozna, zna da j’ ozbiljno. Došla j’ simpatična konobarica i donesla čajnik, kikaricu, med, lemuncin san njoj vrnula i čaj va nekakovoj vrećice ka j’ bila va još jednoj. Ćutila san se koda pijen čaj pu ingleške kraljice. Moran priznat da mi j’ najprvo rabilo jedno pet minuti da dokončan kamo i kako ča gre. Pripravljan ja ta čaj i govorin paronu – ben ti miša, nisan znala da va oštarijah sada sam kuhaš čaj. Fanj san ga dobro skuhala i koda mi j’ jedan sled na želucu bilo bolje. Došlo j’ vrime za poć ća i moja bolja polovica zima račun za platit, gljeda va njega i govori mi – nemoj drugi put naručevat čaj. Zač, pitan ja, a on šaplje – zato aš je tvoj čaj 21 kunu, a moj kapučino 11. Odgovorila san – a, još san ga sama i skuhala.

Srića od Boga ča nisan još i na placu šla, aš kada san čula da j’ kilo šparog od 250 do 300 kun, a ribičine za brodet 140 kun, zajedno san rekla – gren po pečenu kokošu. I san šla, ma drek i ona j’ krešila pa ni već 29 leh 38 kun. Na pumpu san morala poć, ću neću. A ča da van rečen osin onu starinsku – bolje se j’ rodit prez miša leh prez srići. Ja recimo niman ni jedno ni drugo, ali zato prvi put va životu iman auto ki gre na dizel, a dizel je isto prvi put va povijesti skuplji leh je benzin. Ki ume – ume. Zajedno san se domislela oneh vrimen kad ni bilo benzina pa su naveliko krali z rezervoari. Počela san se smet aš san se domislela na jednoga fanj trubastoga komu su prošupili rezervar i ukrali benzin pa j’ saku večer za branik od fića vezal pasa aš da neće njega niki pljačkat. Fanj je bil učinkovit ta njegov alarm, se do jedne noći kada su mu ukrali i pasa i benzin. Pokle toga je ta fićo bil smiron parkiran spred kući, a na staklu mu j’ bila cedulja na koj je velimi slovimi pisalo – škulja na rezervaru je, ma benzine ni.

Da ne bi bilo leh skucanje ćemo se dotaknut popuštanja mer. Lipo j’ čut da oštarije opet moru delat do dve uri zapolnoćun, jedino ča se ja pitan – za koga, aš ljudi već nisu navadni tuliko viset po birtijah, a i da će, žepi su njin šupi, takujini prazni. Sopeta san zbunjena aš broji zaraženih rastu, a mi molevamo špag. Govore mi – sezona gre. Ka sezona? Rat je, nikomu se nikamo ne gre. I baš me zanima ako bude i druga busterica ćete se poć bustat? Ja, ne znan aš ako ovako nastavin mat neće morat kupovat zalevalnik. Dosti će njoj bit da mane napoji i montira kraj rožic, ja ću se odbavit.

A ča se tiče današnje Jožehove, ako ikako arivan, kako nekada – odbavit ću se i poć na Praputnjak. Znan da već neću nać petešića komu se vrit puše, ma ću nać lipe uspomene i morebit utaknut dragi ljudi. Govorin matere za svoj naum, a ona neš krpa i ne diže glavu, ma govori – hodi i nemoj se napit. Nikada mi neće pozabit ta jedan eksces z rane mladosti.