Prekčera nas je dobro opralo. Baren mane je. Zmočilo me j’ do doljnjeh gać uza su lumbrelu, ka verujte, ni bila mića, a put je bil dug kakoveh tristo metri. Da san znala da će tomu bit tako bin klala malo šampona na vlasi pa jih zajedno i oprala. Šalu na stran, ma sedet tako mokar još pet ur ni baš dobro za zdravlje. Ni za onoga ki j’ va cvitu mladosti, a kamo za me ka se je već ni ne domišljan.

Kada smo već pu mladosti, vela većina nje je ki’vo dan proslavila Noć od vešći. Nikada nisan volela horori, zaspraven, morda san jih va životu odgljedala morda pet-šest i to tako da bin stišala ton, a nikad nisan volela ni uvozni blagdani, tako da ovoga i slični odvavek preskačen. Moji horori su bili za zimskeh večeri povedanja uza šparhet, kada bi se na Višnjevice okupilo celo selo i kada bi krenule štorije od davnine. Se bi počelo z dve besedi. One su »se domišljaš«. I tako se ja i dandanaska domišljan sega ča san za teh tepleh i ljudskeh večeri od davnine čula i navadila. Koda je čera bilo, domislin se šparheta pu tete Vilki, otomana i kantrid i stolčića. Ja san vavek sedela zagnjetena zmed barbi Branka i tete Vilki, majka Marica bi zauzela čelnu poziciju, a drugi kako su dohajali tako su i sedali.

Barba Branko je bil zadužen za nalaganje ognja, a majka Marica za uvodnu besedu i, ča bismo po današnju rekli – ispravljanje kriveh navodi. Te krive navodi užala je imet teta Ivka ka j’ zmed seh njih bila najmlaja, ma j’ bila i vražja pa bi se obrnula na valcer ča j’ jako jadilo majku Maricu. Intanto, to »se domišljaš« najveć bi bilo vezano za njihovi puti va planinu, po drva, na košnju ale kad su z blagon hodili na letnju pašu. Zavavek ću pamtit štoriju od barba Zdravka i magarca ki j’ bil oprćen z drvimi i kada su pasali prugu spušćajuć se z Jelenja ta trdoglavi stvor da j’ zabrenzal, ukopal se i ni naprvo, ni nazada. Barba Zdravko da ga j’ najprvo šćapon tiral, onput ko dragoga Boga molil da se pomakne aš je već bilo škuro, ma magarčina ni čut. Na kraju ni bilo druge leh pušćat i magarca i breme pa lipo nazdolu doma. Magarac da j’ skupa s ten bremenom zorun, kad se j’ razdanilo došal doma.

I onput je krenula rasprava – ča j’ to magarca zabrenzalo. Odnosno ki? Teta Vilka je zastupala teoriju da j’ nekakova mrtva duša magarcu na put stala, a znala je i ka – jedan brižan čovik ki se j’ tamo blizu obesil. Teta Ivka je govorila da j’ neko divo blago siguro bilo va šumarju, a majka Marica bi presikla horor i rekla da niš o toga i da j’ dosti ćamparenja, da j’ magarac jednostavno bil trdoglav i šlus.

Kako bi dokazala da j’ va pravu valje bi povedala još jednu štoriju od magarca, a ta j’ hodila ovako – bila j’ grda zimska noć, z brd je nosilo sneg, puhalo j’ kod si vrazi, ljudi su, kod ča sad mi – sedeli kraj šparheta i teplili se, kad su najedanput čuli nekakovo roštanje, koda se kamenje z brda tače nazdolu i nekakovo grdo oceranje. Potekli su do poneštri, ma ni bilo niš za videt. Jedan se j’ okuražel pa j’ zišal na privrat, da bi se zajedno vas bled i tresuć se vrnul nazada va kuću i zazijal – videl san vranića, videl san vranića. Ima rep, ima kopita i na usta hita plamen z pakla. Najkuražneji su se nabili na poneštru da i oni vide to ča ov isti govori i da su zijali – vidi iskri, vidi iskri. Sen da j’ rabilo vodi z cukaron, a o poć doma ni bilo ni govora. Tako da su do jutra presedeli va strahu. Kad je dan zamenil noć, još vavek si znemljeni zišli su vanka i na dnu progona čuli kako se magarčina glasa. Kad su došli bliže da su videli da gospodin vranić ni vranić leh ta isti magarac ki j’ zasobun vukal lanac z ken je bil zavezan, a kako j’ lanac roštal po kamenju, tako su iskri skakale.

Mada san tu štoriju na stotine put čula, i vavek je magarac bil z nekoga drugoga dela Krasice, ljudi isto, ja se i dandanaska kad je se domislin, baren za dva braja stisnen. Ma sad već ni nikoga od oneh ke san spomenula i niman se va koga zagnjest ni š čigoven tarvezon od straha pokrit ni galvu, ni uši. Ovo su bili moji horori, moje Noći od vešći i da jih moren ponovit se bin dala, ma nažalost niš od toga i to mi j’ zaspraven najveći horor. To ča ne moren vrnut vrime.