To ča nan je sopeta pal bruto društveni dohodak, ta sakramenski BeDePe ale kako bi to naš premijer lipo po hrvacki rekal DžiDiPi, nikoga ni hitilo po tloh. Ni oni kemin je delo da do toga ne dojde kod ni oni ki more bit ni ne znaju ča j’ opće to. Zaspraven beseda dohodak pu nas ima nekakovo simbolično značenje za razliku od besedi gubitak. Ma, tako je kako je i bit će kako bude. Glavno da j’ pad toga sakramenskoga BDP-a sopeta dopeljal do kara.

Tuliko puti do sada smo odgljedali i odslušali tu predstavu s tri glavni glumci. Najprvo oni na vlaste govore kako j’ ta pad logična posljedica onoga ča su delali oni ki su prvo njih bili na čelnoj pozicije, aš da su se ti isti ponašali kod pijani milijarderi, da su rashićevali soldi prez plana i programa, dizali krediti i niš ne misleli. Oni ki su prvo oveh bili glavni, a sad su va opozicije govore da ovi ki sada vode državu, nimaju pojma ča njin dela leva, a ča desna, da su aposlutne ćampaloze ča se tiče gospodarstva i da njin je saki potez krivi potez, ča će reć da pod hitno i valje moramo raspisat novi izbori. Kod papagalo ponavljaju vavek jedno te isto, ma niš ne poduzimaju, a kuliko ja znan to o prijevremenemi izborimi leh njin je poštapalica, odnosno po ten pitanju niš ne poduzimaju osin ča prozivaju precjednika.

Precjednik pak govori da on va celoj priče nima nikakovu ni ovlast, ni zaduženje, a to ča ga prozivaju da ni sazval tu sakramensku sjednicu nad sjednicami, to da j’ zato aš da mu odgovaraju ovi ki sad vladaju. On pak odgovara da ča mu j’ bolje sazivat sjednicu kad bi to bil leh simbolični čin. Va prevodu – gubljenje vrimena. Z čen se ja slažen. I tako doklen se predstava igra, publika tj. si mi – spi, štufa od sega toga ponavljanja i prelevanja z šupljega va prazno. DžiDiPi ale BeDePe i dalje gre šoto, a ja smiron mislin kako nan ni dragi Bog već ne more pomoć, a kamo ča drugo, pa mane ta kratica BDP znači – Božiću dragi, daj nan pameti.

   Oni ki su sobotu večer oteli tancat, sost i kantat i tako baren na par ur pozabit i na BDP i na DŽDP šli su va Studenu, kade su pravu letnju maškaranu noć pripravile Studenske maškari. Va gosti su njin, baren kuliko san ja va toj gnjete uspjela videt, maškaroni Škrljeva, Kukuljanski zvončari, Gromički dondolaši i rečka grupa »Lako ćemo«. Bila j’ to prava maškarana fešta kade su se si dobro zabavljali, a Studenjci sopeta pukazali kako su dobri domaćini. Gospa Ljubica, šefica od ove parade rashitala se j’ na se bandi, ne daj Bog da ne bi komu falelo za popit i pojist. A on ki j’ bil glavni animator najprvo za se, a onpu i za si drugi je Toni ale ZlatkoŠebelja.

Istina Bog njegovo j’ zaduženje studenjska maškarana zastava, ma kuliko san ja uspjela videt ta njegov klobuk je sake minute bil na drugomu mestu, a kada ga je gospa Ljubica konačno ćapala i otela poslat da gre pomoć va kuhinju aš da j’ Petra ostala sama, a dela j’ vagun, on njoj je rekal da ne more aš da daje intervju novinarimi. Nač je Ljubica rekla – Tonić, kako ćemo ovako naprvo, a on se j’ obrnul i prston pokazal na jaketu od jednoga maškarona na koj je pisalo »Lako ćemo«. Istoga časa san pomislela kako j’ šjor Zlatko rojen za političara i da leh gubi vrime delajuć va pilane.