Čera smo proslavili Dan pobjede i domovinske zahvalnosti i Dan hrvackih branitelji. Od Oluji je pasalo 27 let, a ja se domislin koda j’ čera bilo. Takoveh se stvari valjda čovik vavek domisli. Večer prvo Oluji bili smo, onako kolektivno kako smo nekada užali – nas jedno šest na nekakovomu izboru za Miss va Crikvenice. Dvoje je delalo, a ostatak je užival. Bili su tamo i Ferlin, a Mario je kantal. Domišljan se – se j’ to bilo fanj va škuren aš se va ratno vrime svitla nisu palila ako ni bilo potrebi. Fanj lipo smo se mi te večeri zabavili, a kada j’ finil ta izbor šli smo kako smo i došli – čoporativno doma. Prvo toga smo se dogovorili da gremo na burek pu »Braći« na Školjić, aš smo bili lačni kod pasi i aš su »Braća« delala celu noć. Kako smo se dogovoreli, tako j’ i bilo. Mastimo mi po tomu teplomu bureku va gluho doba noći, aš već je bilo pasalo dve uri i smejemo se, pitaj Boga okolo česa, zijamo i fanj se dobro zabavljamo, kad eto ti z škurine noći kombi od policijoti. Fermal je, čovik je oprl poneštru, mi borše i takujini aš smo misleli da će bit »daj osobnu«, kad ono – niš, leh dve besedi ke su glasile »ajde RAZGLAS«. Morete mislet kako smo se počeli smet aš je policijot, namesto razlaz rekal razglas. Mane j’ zadnji kus bureka pal na nogu od smeha, ma smo se istoga časa porivali va aute i se tako smejuć šli doma. A kad san se drugo jutro zbudila, ale pošteno da rečen, kad san se kod lena krava okol polna zvukla z postelje, naši su već bili va Kninu. Puno, puno let pokle mi je Ferlin rekal da j’ on tu noć znal da se spravlja vela akcija naše vojski ma da j’ obećal kako nikomu neće reć pa ni rekal ni nan. Morda i bolje aš je ovako bilo veće veselje.

Va slobodni Knin san po delu došla tri šetemane pokla Oluje. Prvo toga san leh jedanput pasala na putu za Split. Ničesa se baš od toga pasevanja ne domišljan, a nikoga z Knina nisan ni poznala. Ta prvi put va slobodnomu Kninu su me spasili od mnogeh problemi dva čovika – barba Slavko i don Luka. Najme, prvi je bil oštar i jedino kade smo va celomu Kninu mogli spat je bilo pu njega, a drugi je bil velečasni ki mi j’ bil veza za si oni ki su mi rabili. Vojske j’ bilo vagun, a nas z Rike, točneje z Novoga lista nisu baš jako štimali, pa j’ bilo fanj teško odbavit se ono po ča su nas poslali. Tu j’ don Luka bil spasitelj. Kada god bi zapelo ja bin zazvala i se j’ bilo rešeno. Barba Slavko je užal z večerun čekat doklen god ne dojdemo aš je znal da cel dan nismo niš jili, a on nan je bil i veza za se ča se tiče kninske bolnici i mirovinskeh straneh snag. A ja, snajdi se aš ako se ne, niki neće namesto tebe. Nikada neću pozabit – gremo kolega Marko i ja, a na zidiću sedi regimenta vojniki. Vučemo nogi aš je bilo teplo za ponemet. Ni baš da smo se izgledon uklapali va celu tu sliku pa j’ nastal muk koga j’ prekinula jedna rečenica. Glasila je – ovu treba j…., a ovoga ošišat. Ni to bilo ugodno čut, ma kako mi j’ jezičina vavek brža leh je mozak, samo san se obrnula i rekla – a, može li obrnuto. Toga časa se prolomil takov smeh da ga i sad čujen kad se na to domislin. Ne moran van ni reć da san nakon toga bila kraljica. Naredneh dan si su zijali – di si mala, što treba., Z Knina san donesla i ratni plen – kornjaču ku san nazvala Knindža aš san ju našla va nekakovomu selu su sirotu finjenu. Dala san ju Dinu aš je već imel jedno dve i fanj let je sretno živela na Višnjevice, a kamo j’ prošla – niman pojma. Leh je jedno jutro ni bilo.

Puno puti pokle toga prvoga san delon finila va Kninu. Vavek bin se javila barba Slavku, a plovani su se menjali pa san i njih čuda upoznala. Na proslave same Oluji bila san jedan jedini put aš bin vavek bila ususret Oluje, a z samoga dogajanja su izvještavali drugi. I kad god bin bila bil je pakal od tepline, tako da san se, gljedajuć čera jutro proslavu potila koda san tamo, aš ki ni po lete bil va Kninu ta ne zna ča j’ bit va kotlu. Fanj su se pristojno ponašali P&P, pa se nadan da će primirje trajat i jutra na Alke, a pokla neka delaju ča jih je volja.