Čera smo, kod i sako leto od kada ga ni, bili pu Veljka na groblju. Ne znan ča bi on rekal da nas je videl, ma ja san dokončala da su si ti naši novolistovski penzići dobrodržeći, lipo zgljedaju i va glave su si jako bistri.

Si vode aktivan penzionerski život, i nisan nikoga od njih čula da skuca, ni da se na neš žali. Zato, i ja komać čekan da dojden do njihovoga statusa, ma kako mi j’ rekal jedan od njih – mala, još se pati, ni ti vrime.

Smešno mi j’ bilo ča ja s tuliko let san mnogimi od njih još vavek mala, ma razumen aš i mane su neki ki su pet let mlaji od mane isto mali. Se j’ to vezano za neko drugo vrime va komu smo i ja i oni bili mladi, i kada j’ teh pet let bila vela razlika. Intanto, mala bila, mala ostala.

A ča se tiče Veljka, njega ni već 28 let i stojeć tako na tomu Gradu Grobniku i gljedajuć va ta grob, doklen je Branko obnavljal sjećanje na neka druga, kako ja volin reć – Veljkova vrimena, mane j’ smiron kroz glavu prohajala – mladost.

I moja, i seh oneh ki su stali okolo mane. Bil je to baš lip osjećaj, zaspraven nekakov trans va komu ne samo da zorno vidiš scene z toga vrimena leh čuješ i glasi, ćutiš miris nekadašnje redakcije, i smiron misliš – sad će ura, sad će Veljko.

No, snovi su jedno, a stvarnost neš sasma drugo. Uostalon, često se ja popovedan z Veljkon. Kad god mi pade napamet ale me neš muči. I vavek pogovor počnen z istin pitanjen – ča ti misliš…

Već smo mi tako prošli mnoge teme i dileme vezane za današnjicu va koj je čovik čoviku se manje čovik, a se već vuk. Ma, nećemo već o tomu, bitno je da san ja pu Veljka opet videla drage ljude i domislela se najlipjeg životnoga doba ko se zaspravo odvijalo va najgrjim mogućim vrimenima.

Ni ni da j’ današnje vrime sjajno i bajno. Cela zemaljska kugla je vrite. Ako ni rata, tu su sakakove druge opasnosti. Od požari, poplav, potresi i lavin, preko razneh opasneh i smrtonosneh boli do glada i neimaštine.

Ne znan da ja sad sličin sen onen ki su mi odvavek hodili na živci, a zovu jih pesimistimi, ale to skucanje dojde z letimi. Prešla san va onu kategoriju ljudi kemi je se prvo bilo bolje leh je danas.

I svjesna san da je to zato aš san prvo bila mlaja pa me niš od onoga ča me danaska pojida ni pojidalo, nit san abadala bilo ča osin dobre zabavi. Sada ni z od zabavi, a sega dreka preveć.

Kuliko san si već puti klala embargo na gljedanje, naslišanje i čitanje vijesti. Milijun, ma ne moren aš mi je to delo. Pa ni dosti ča san na delu zagnjetena va vas ta informativni šrot leh još i kad dojden doma jašen po vijestimi, da mi ne bi ken slučajen neš promaklo.

Kako bi mi mat rekla – vranić zel i tebe i te tvoje štorije, tr se san to već videla na televizije, ne moran još sada i tebe naslišat. Va skladu s ten, dojden ja ki’vo večer doma, leh ča san prag pasala, ona govori – se poneštri i vrata san trdo zaprla.

Stanen i va čudu ju gljedan. Mislin si da j’ sopeta umislela da se on štakor koga j’ na privratu videla još doklen je privrat videla, prti po fasade da bi došal pu nas na drugi kat va stan na kafe.

To njoj je noćna mora, a od toga susreta z štakoron pasalo j’ skoro osan let. Ma, ona sopeta ponavlja o zapiranju poneštri i vrat. Konačno pitan – zač si se to zaprla? Zato aš su rekli na televizije da mole si grajani da čvrsto zatvore prozore i vrata, odgovara već pomalo nervozno gospa mat.

– Ali z koga razloga su to rekli, pitan opet.

– Valjda biš ti to trebala znat. Ki j’ novinar ti ale ja, zija ona.

Leh san odgovorila – dobro i šla večerat. Ona j’ šla spat, a ja san oprla se ono ča j’ ona trdo zaprla da malo zraka dojde va kuću. I već pozabila, kad na zadnjemu Dnevniku čujen da j’ va »Svetoj Nedjelji izgorila tvornica guma i moli se stanovništvo da zbog gustog dima zatvori prozore i vrata«.

Počela san se smet i komać dočekala jutro da se stanen. Pitan ju – mama, znaš ti kade j’ Sveta Nedelja?

– Vrite kod i ti, ne znan ni kade j’ sveta sobota, ni petak, zač?

– Pa tamo j’ bil požar i preporuka za zapiranje.

– Leh je rekla – ča j’ sigurno, sigurno je.