Saki put prvo dažja, navala j’ na telefoni, opaka i vražja. Najme, ljudi koda poneme. Zovu na fiksni telefoni, na recepciju od Novoga lista, zovu tajnicu od redakcije, pa ako se dokopaju još i broja od kakovog novinara ale urednika, e, onput je nadrajsal. Ne znan ča njin se vidi ma ta o južine mi nekako ne drži vodu aš čera se ni listić nigdere ni mrdnul, a telefoni su zvonili i zvonili. Zač zovu? A kako ki – neki da njin je mačka pobigla pa da se uključimo va potragu, neki da njin je sused načinil to i to pa da malo se to zabilježimo, neki imaju vanzemaljci va kuće, neki da jih je va butige prevarilo… Ki put, ako san od volji poćakulan, nasmejen se i onomu ki zove bude sled lagje, a ki put ako san va faze zvanoj »pušćajte me na miru« leh rečen – niman pojma kade je kolegica aš ja tu leh čistin. Jedanput san vlastitoj tete, aš me j’ zbudila, pa nisan dobro videla broj, uspjela reć – gospođo, zovite za uru, dve aš ni nikoga doma. Srićon me je poslala tamo s kuda san pred fanj let došla pa san se brzo zbudila.

Jušto ovako kako san van povedala je bilo i čera kada smo čekali ta daž ki nikako da dojde. Celi Božji dan su ti telefoni i mobiteli nemeli. Mane j’ zvala jedna gospa, ka se i inače uža javit i rekla da njoj ne rabe nikakove obavijesti ni upozorenja od Državnoga hidrometeorološkog zavoda aš da ona vavek zna kada će nevera. Pitan ju ja da ča ju kosti bole ale morda glava, a ona onako z visoka odgovara – ni kosti, ni glava, ni bilo ča, i ča bol na me tiraš, mane niš ne boli, ja san zdrava. Onput se ja ispričavan i govorin kako san ja to z osobnoga iskustva i da zbilja niš lošega nisan mislela. Ja, pozabila san van reć da gospa ima osandesetak let pa san si zajik klala zad zubi, a pandžice uvukla. Onput je nastal muk, a ona zija – halo, halo, halo…, ma vidi tu mulu – poklopila mi je. Onput ja zijan – ma, nisan, tu san. A ona će – pa ča me onput ne pitaš kako znan kada će daž i šoprnada? Ja odgovaran – pa čekan da mi rečete. Ona – pitaj me. I ja pitan – gospa Ankica, kako znate kada će nevrime. Ona – nisan ti ja nikakova gospa Ankica, moje ime je Ana. E, da ti pas mater kurbu prasicu i pol, mislin si sama sobun i brojin od deset na nazad da ne bin slučajno blebnula ča grdoga. Opet ja – oprostite. Ona govori – ma, niš, niš, dogodi se. Leh ovako, ja ti znan kada će daž, ne na uru, leh na minut. Najme, ako su mi kokoše već zorun jako uznemirene, past će do osme. Ako su leh neke, a ne se, onput to more bit okol polna. Ako j’ leh Pirga ka se j’ valjda nervozna zlegla, onput more bit neš dažja k večeru. I slušaj ovo… Govorin – slušan i zapišujen. Ona – dobro, a kuliko će bit nevrime, kako to znan? Odgovaran – jušto san vas sad otela to pitat. Ona – drek si, komać čekaš da me se rešiš, znan ja vas mladi, to niki nima vrimena za neš ozbiljno, leh se igrate na ti telefonini.

Već me j’ pot oblel, ma me j’ znatiželja bila jača pa pitan – dobro, kako znate kada će velo, nevrime? Gospa Ana odgovara – ne znan ja, zna Pepica. Ostala san paf. Majko Božja od sedan žalosti i mene brižne osme, ka j’ sad ta Pepica? Pitan – ki j’ Pepica? Suseda? Ona odgovara – ma kakova suseda, to j’ kokoša. E, kada se Pepica uznemiri ja izdajen črljeni meteoalarm. Ča izdajete, pitan je. To ča si čula, odgovara ona. Komać san se fermala da ne prasnen na vas glas va smeh. Srce Isusovo, nisan ni znala da va rečken prstenu postoji kokošji meteorološki zavod pod ravnanjen gospe Ani. San njoj to i rekla, a ona me j’ lipo vrit poslala i još mi rekla da j’ mene celi život bal i da mi j’ vrime da se uozbiljin aš da iman ko leto vrite, a va glavine da niman niš. Obećala san da ću i zamolila ju da se ne jadi, a onput san ju pitala da ča govore njeje meteorologinje. Njihova prognoza, govori gospa Ana glasi – fronta j’ krenula z Đenovi, a o tomu, će kade na putu obrnut nazgoru ale će doć i do nas, još je rano govorit. Nego, lahko j’ za daž, su ti došla drva? E, na to pitanje popizdin, aš naravno da nisu. Verujte, gospe Ane san dala broj od Ožbolti pa neka ih ona malo zazove. Me par da će drva brzun brzinun, bila mešana ale ne.