Je finila agresija na Ukrajinu – ni. Je mane prestalo bolet uho – ni. Je konačno došlo »staro normalno« – e, to je. Šjor Vili je slavodobitno oglasil kako se dosadašnje meri gredu mater ženit, a si mi kročimo va svit kako nekada – prez maski. S tun odlukun nan je Vili čestital Svjetski dan zdravlja, na čemu mu jedno velo hvala.
Istina Bog, mane su te maski, a verujen i mnogen od vas postale normalne. Recimo, ne jedanput san se ulovila kako se sama peljen va autu i uredno držin masku na usteh. Jedanput san šla z kuhinje va kupaonu i kladan masku na se. Jedanput san šla klast robu sušit na balkon i sopeta kladan masku. Čak san izumila kako ju stavit, a da mi se oćali ne huču. A to da jih iman seh vrst i va sakomu koloru, to morete pretpostavit. A ja pretpostavljan da j’ i mnogemi od vas ta ista maska postala modni dodatak. Dobro bi bila došla i kad je bura puhala, pa ju leh potegneš i ne rabi ti šjal. A ni bila loša ni kada biš jil češanj i ma kuliko pral zubi nisi mogal eliminirat ta dih.
I tako, čovik kod čovik, pa tako i ja, najprvo njurga na neš zato aš to neš mora, a onput njurga kad to već ne mora. Naslišan neke kolegice ke su odlučile i dalje nosit masku aš da ča j’ siguro je siguro. Mislin si ja, morda imaju i pravo, a i lagje je. Recimo, ča će sad se one ženskice ke su silni soldi trošile na šminku i baš va oveh, neš malo već od dve leta, fanj prišparale. Pitate kako? Pa, tako ča su mazale leh oči i ono ča j’ iznad maski, a ovo ispod ionako niki ni videl. Prišparale su čuda solad i od kozmetičari aš je maska sveta stvar – ne pukažuje su brki narasli, je ka dlačina na brade, a o prišti da ni ne govorimo. E, sad su finili bali pa će takujini sopet fasovat. Mane ni va žep, ni žepa aš ja se ne pituran pa nisan niš ni zašparala, a ča se brki tiče, ne gljedan se va zrcalo, a ako se i pogljedan ne kladen oćali pa san puno puti kod vremešni Kinez, a da ni ne znan doklen me neki od dobreh ljudi ne upozori da malo to poskuben. Jedanput mi je jedan prijatel ki ima brki i bradu rekal da san mu postala jaka konkurencija. Ni mi valje bilo ćaro zač mi to govori aš ja se ne bavin z fotografijun, a kad je rekal da ću ako neš ne poduzmen moć pletenice splest od brki smela san se kod nema i leh citirala mater ka uža reć – ono ča ne vidin, ne postoji. Eto, san van rekla da se već sličin na nju.
Šalu na bandu i za ozbiljno ću van reć kako mi je drago ča se život sopeta vraća va normalu. Ono ča me malo pojida je to ča nisan sigurna je to opće moguće aš, gljedan po sebe, odučila san se poć bilo kamo kade j’ gnjeta, pa tako san va ove dve leta propušćala more koncerti, nisan bila ni va kinu, a ono ča mi nikako ni ćaro je to da san se odučila i od oštarij, a si znamo da san va mnogemi bila kuhana i pečena. O tomu da već ne moren zamislet da ću bit vane do dve uri zapolnoćun ale do kašnje, kako mi se j’ nekada znalo dogodit – da van ni ne govorin. Ni da gren ja spat raneje aš san doma, ma vranića dan, blejin va televiziju ale igran igrice na mobitelu, ma da ću do tako kasno bit vane, a to zbilja ne moren zamislet. Ki’vo dan kolega na radijo govori kako će sad ljudi doć na svoje aš da ovo ča su oštarije i klubi delali do pol noći je bilo koda greš na matineju, a ja si mislin – avah je mane, pa ja san zbilja ostarela, korona nima niš z ovin.
Spomenula san radijo, pa koristin priliku da vas seh podsjetim da nan Mario Lipovšek Battifiaca kod učitelj ale ti ga mentor i Robert Ferlin, kod učenik ale školan, sudjeluju va velebnomu šou hrvacke televizije ki se zove »Zvjezde pjevaju«. Dve su epizode odbavili, a kako bimo ča dulje imeli svoje va metropole, ni nan druge leh glasat za ova dva simpatična čovičića. Dobro j’, morda van nisu sen dragi kod ča su mane, ma sedno su naši. I moren van reć da su dobri, i va odabiru pjesam, i va izvedbe, a o šou da ni ne govorin. Zato, lipi moji porivajmo naši dečki aš ako se mi sami ne rivamo, drugi nas neće siguro.
Videli ste i da j MIK hitil pjesmi, autori i izvođači vanka. Sega je na tomu spisku, a kako san imela čut već da su počele padat okladi vezane za Grdovića. Za ča? To ću van povedat drugi put, kad doznan će Tereza nastupit z Leton 3 ale morda, ov put z Grčon.
