S kamika i mora

OžMIKani

Slavica Mrkić Modrić

Foto Marko Gracin

Foto Marko Gracin

Kakove sad ima veze natalitet z vlagun i Mikon?

placeholder


Ljudi, MIK je pokla fanj let kad je temperatura bila po meri čovika, a ne kačke i kada j’ bilo lahko dihat, ovo leto – ožMIKan. To si leh pušu i otpuhuju, pote se, lepe jedan za drugoga ale drugu i ta Festival ki j’, davno san rekla – već Festival leh čovik, ima tuliko vlage da se z pravon more reć kako j’ najvlažneji festival va Hrvackoj. Ča i ni loše aš stalno delamo na tomu natalitetu. Kakove sad ima veze natalitet z vlagun i Mikon?


A ima, aš si ki ima kus vrta ale vrtića zna da na vlažnomu se raste. Ekola, ni sako zlo za zlo. A sad dosti tambaškanja o vrimenu, znan ja da vas zanima ki ča, ki kade, ki s ken, ki kako i se tomu slično. A ne da ja moren držat zajik za zubi pa ću i bez da me pitate valje na sa pitanja odgovorit.


Najprvo zdravstveni bilten – kuliko ja znan karavana j’ zdrava. Niki ni prijavil ni koronu, ni majmunske boginji. Ča se psihe tiče – ala dragi vi, ki j’ va ovoj zemlje još psihički zdrav? Ma karavana se i po tomu pitanju zasada još jako dobro drži. More bit zato aš je zbilja sen skupa jušto sedno ki će bit va poretku, glavno je da se zabave. Mladi bi rekli – čista pozitiva. I fala dragomu Bogu na temi mlademi aš su donesli va karavanu svoju mladost i ono mladoste spodobno, a reče se – briga me, leh neka je zabava. Obožavan na pozornice videt presimpatičnoga Dina Gušćića, maloga z Raba ki j’ debitant, pa malu Luciju ka j’ na MIK-u već kod doma aš je kantala z Klapun Hreljin, pa još jedanput va četire, pa sad prvi put solo, onput Teu Vučak ka j’ moja kraljica pozitive kod i seh njih na kupu aš onput znan da MIK more dalje. Lipo mi j’ videt i onu srednju generaciju ka MIK drži sada, kod i onu ka j’ MIK držala nekada, a drži ga i sada. Mane ni problem ča na MIK-u nastupaju Dalmatinci aš i na Splitu nastupaju Primorci i se to skupa je lip način druženja. Tr ne igramo nogomet leh čuvamo tradiciju i kantamo. Radi sega toga ja volin MIK aš on spoji ono za ča bi mnogi rekli da je nespojivo. I ča se tiče ljudi, i ča se tiče glazbe.




A ča se tiče ki s ken? Ča da van rečen – saki saken. Takova su vrimena. Sran vas bilo, ja san mislela na kumpananja. I mislela san reć kako j’ na Miku najmanje važno ki kuliko ima let. Si se skupa kumpanjaju. Recimo, mali Borna i ja. Mane j’ ovo 29. MIK ki pratin, njemu 15., ča će reć da j’ imel 14 let kad je prvi put došal na MIK i kada smo ga, prešeć na domjenak va Kaštel, pozabili spred doma na Čavje, pa j’ vas va strahu zval Bašu, a Baša rekal – maloga smo pozabili, pa j’ moj kolega i prijatel Sergej Drechsler šal po njega. A to j’ MIK. Ki se na prvu ne taka ta se neće nikada i bolje mu j’ da više ni ne prova.


Oni ki su se takali na prvu i ki se Miku vrnjaju su dva z Dalmacije – Tereza Kesovija i Mladen Grdović. Budu, pa jih ni, pa opet dojdu. A MIK jih vavek zame aš, bili oni Dalmatinci ale z Plosne mikovcen je sedno, glavno da su dobri ljudi. A su. Sad ne raspravljamo o njihovoj popularnoste ale slično, govorimo o dobrote. I tu j’ veličina Mika. A kakov bi ta Festival ni mogal bit kad se j’ rodil tu kade je?


Pitate o zvezdami? Ferlin i Mario? Tu van ne moren bit objektivna aš oni su moji prijateli i se izuziman z ovoga pitanja i odgovora. Da sad rečen da su standardno dobri bin uvredila njih aš su oni odvavek nadprosječno dobri, a vi biste rekli da san pristrana. Ovako ću reć da j’ Uršula, ku si va karavane zovemo Rošula (mislin da njoj taj pričvarak gre na živci aš su ga vjerojatno već davno neki drugi zmisleli) najliplji i najpametneji del voditeljskoga trija.


Pratećemi vokalimi obadva palci nazgoru, orkestru isto tako, kod i tehnike i press službe i moran van reć da na Miku, na komu se si prejidu jedini ki zvise su jušto orkestar i tehnika aš ma kuliko na teh domjenki bilo za jist dok oni se posprave, tarme se pojidu. Srićun, domaćini imeju razumijevanja pa ti ke san spomenula ne baš da moru dobit celu paletu delicij ke dobije ostatak karavane, ma beren ne gredu doma lačni.


I za kraj odgovor na pitanje – kade j’ Mirjana Bobuš? E, pa Mirjana je va egzilu, ne političkomu leh zdravstvenomu. Ne pojidajte se, kako j’ bilo – dobro je, ma još ni tuliko da bi bila va karavane. Će bit, a do onda njoj saku večer šaljemo litrati seh nas i uobičajene, za široke masi ne primjerene poruki. Ekola, to j’ od Mika to, a večeras se vidimo v Rike. Ča ne da ši?