Za saki slučaj, ako se j’ nedaj Bog našal ki ofenđen, da se ispričan stanovnikimi Trampovoga brega, za prvoaprilsku šalu. Namjere su mi bile leh se dobro zabavit i nasmet, nikako nekoga uvredit. A zaspraven, ne znan ni zač bi se stanovniki ofendili kad nisan niš grdoga napisala, a i ča bi njin falelo da su nekada va nekomu prošlomu vrimenu imeli za suseda jednoga kod ča j’ bil moj zmišljeni Frane Host. Š njen bi se leh smeli i veselili, a kako j’ imel zlatne ruki i vavek bil od volje za pomoć i bližnjemu, i daljnjemu, dobro bi pasali. Ne bi morali iskat ni tišjeri, ni zidari, ni bilo kakovi majstori, a i va ono vrime, kod i danas, bili su skupi kod sam vranić, jedino ča ih je onda bilo više. Danas ne znaš ča više čekaš tišjera, keramičara, dimnjačara ale magnetsku rezonancu. Kamo god da se obrneš vavek si na nekakovoj liste čekanja, va nekakovomu redu. Ki put mi se čini da čovik od kada se rodi doklen ne umre, vavek nekoga vranića čeka. Tr i da. Si skupa čekamo ono neminovno, a zove se smrt. Ma pustmo to sada po bande, da se ja nastavin ispričavat. Drugi na redu su se one kolege, a tičica mi j’ rekla da ih je bilo, ča su zamalo šli na Trampov breg. I treti, kemi se moran ispričat su si oni ki se morda zovu kod moji zmišljeni likovi pa su radi toga imeli neugodnosti.

Na kraju se ispričavan i samomu Franu Hostu koga san, bez da ga pitan bi otel oživet ale ne, na svoju ruku oživela. A van sen moran priznat da se davno nisan tako zabavila pišuć neš, kod ča san se zabavila pišuć ovu prvoaprilsku šalu. Va mojoj glavine su zbilja oživeli i Fran, i njegov prapravnuk, i se četire njegove ženi i celi Trampov breg. A sada ću zamolit seh oneh ki znaju i kemi se da da me zazovu ale mi napišu kako j’ to mesto dobilo baš to ime. Seh ke san do sada pitala nisu mi umeli reć.

Tuliko o prvoaprilskoj šale, a sada homo malo o kulturi ponašanja, za ku san va manje od dve uri shvatila kako se j’ i ona odselila z našega kraja. Primjer prvi – stojin va jednoj bekarije va prigradu va redu, a kade drugde, i čekan tu naručenu janjčevinu. Z pol uha naslišen ča ljudi kupuju. I tako, dojde na red jedna šesna mlada ženskica i govori bekaru da j’ naručila pet i pol kil odojka. Pomislin si, srce Isusovo, kuliko j’ ovih va familje. Bekar pita da njoj nasiče ale će va komadu, ona odgovara – ne znam. On govori da će njoj za saki slučaj nasić, će na manji ale veći komadi, nač će sopeta ona – ne znam. I čovik načini kako misli da bi i ona rekla da zna, ma ona ne zna. Za kraj ju pita ako će još ča, a ona odgovara – kilo mljevenoga mesa. On pita će mešanoga ale ne. I kada san pomislela da ne znan ki j’ od njih dva nemeji, on ki ju pita, a zna da ona niš ne zna ale ona ka niš ne zna. Ma, drek, eto njejega odgovora ispaljenoga kod z topa – to znam. Va bekarije je nastal muk, si prisluškujemo i čekamo, a ona će – eto, to mi je sasvim svejedno, meso nije za mene nego za svekrvu. Neki su prasnuli va smeh, a ja san pomislela – mala moja, i ti jednoga dana moreš bit svekrva pa kako siješ tako ćeš i žet. Ja dece niman pa moren ča god blebnut, ma ja za svoju svekrvu moren samo lipe besedi reć. Zaspraven moren reć da san po svitu feralićen hodila i iskala takovu, teško da bin ju bolju našla.

Primjer drugi – bekar odbavljen, gren va butigu. Bolje j’ reć va jedan trgovački lanac. kako ste i mogli pretpostavit – gnjeta, koda j’ pred sudnji dan, a ne pred Vazam. Ujden nutar i zaputin se na verduru. Jedino poč san došla je bila glavica lila kapuza aš mi rabi za popiturat jaja. Od lila kapuza ni l, ni k pa se obrnen i gren iskat črljenu kapulu i iman ča videt. Kod paunica, namrčena va seh koloreh, diši da ju j’ bilo čut do druge županiji raširila se j’ jedna gospa i lupi kapulu po kapuli pa ono lišće klada va najlon, a one ćelave kapuli nazada na policu. Verujte, ostala san bez teksta. Nisan mogla verovat da vidin to ča vidin. Niš njoj nisan rekla, leh san se obrnula i šla na info punkt povedala žene ka tamo dela ča san videla. A ona mi j’ odgovorila – vi zaista nemate pametnijeg posla nego tužakati. I opet san ostala na sekundu, a onput san joj rekla – ja nemam pametnijeg posla, a vi nemate pameti. Primjer tri – gren po sengvić i slušan kako nekakova ženska masira prodavačicu ka joj uporno objašnjava da oni nikada nisu imeli kruh od oreha, a ova njoj tvrdi da ga je baš čera tu kupila. Ča j’ bilo dalje čitajte va sljedećen nastavku, do onda srićan van Vazam!