Zazimelo je. Vane j’ jušto onako kako ja volin i kako bin potpisala da bude stalno – škura bura, bela brda okol grada i dimnjaki s keh se dimi. Si mi govore da baš i nisan normalna ako volin se to ča san rekla, ma ne hajen – tr kamo bi dospeli da smo si isti. Tuliko ča se tiče klime va zraku, a ona ka j’ na, odnosno va zemlje, je fanj zagrijana. Zgorel je Vjesnikov neboder, gorel je hotel va Plovanije, nekakov dimnjak va ulice spod mane, a vjerojatno još puno toga za ča ja ne znan. Ki j’ zapalil žito va kultnomu »Salašu u malom ritu«, znamo aš je Vasa napisal »student nije zapalio žito«, a ki j’ važgal Vjesnikov neboder još ne znamo, mada se tamo spominju nekakovi maloljetnici, polu punoljetnici, ale kako se to već sada zove, pa instalacije, pa ovo, pa ono, tako da kalkulirat nećemo aš od kalkulacij do rešta je kratak put. Uostalon, se se dozna pa će se i to.

Tuliko ča se tiče ognja i popela, a sad da ja van malo povejen kako san pasaneh dan pokla puno, puno vrimena sopeta sedela va školskoj klupe. Ma, ne pojidajte se, nisan se upisala ni va večernju, ni va dnevnu školu, a još manje na fakultet, dosti j’ toga bilo, leh san na poziv profesora povijesti z Osnovne škole Trsat šla poćakulat z osmašimi na temu kako j’ to bilo bit prvi hrvacki novinar ki j’ ušal va okupirani Vukovar i o još puno toga vezanoga za Vukovar. I moren van reć, da mi ni bilo lahko vrnut se va ta dan i domišljat se sega toga. Ma, dočin san videla te mlade glave spred sebe, tu decu pred kun je budućnost, te žive i radoznale oči, sa ona pitanja va stilu i ča ću ja tamo, i ča njin šegavo ja moren reć, i morda bi bilo bolje da su zvali koga normalnejeg, pala su va vodu. Ča bi se reklo – razoružali su me na prvi pogled. Jedna tako šegava i simpatična mladost sedela je spred mane.

Skoro san prasnula va smeh aš mi j’ palo napamet kako sigurno sami sobun misle – pa ča ovo je novinarka, pa ča ta je ušla va Vukovar, ma moreš si mislet. I onda san ja bila niš drugo leh ja – su tu tugu i jad, so to črnilo i strah san njin predočila z dozun smeha i podsmeha na svoj račun. Led smo probili, a onput je bilo se lagje. Oni su zapisali pitanja, provali su pitat, ja san njin zajedno razbila koncepciju aš ki bi me fermal kad počnen povedat, a onput je došal i Marko, kolega ki j’ toga davnoga 1995. leta ušal s manun va Vukovar i škerac z moga računa je prešal na njegov. Intanto je školski sat brzo pasal i bilo mi j’ super. Kako j’ bilo njin, ne znan aš je zazvonilo za drugi i nisan jih imela vrimena pitat, pa njin se ovin puten zahvaljujen na pozivu i na ugodno provedeneh 45 minuti.

To ni jedini put va zadnjeh desetak dan ča san bila z školanimi. Bila san se nać i svojemi, odnosno z onemi s kemin san prvo 47 let finila malu maturu – moj osmi razred z ondašnje Osnovne školi »Božo Vidas Vuk«, današnje Osnovne školi Hreljin. Mi se nahajamo bez reda i poretka, onako spontano – kako nan dojde. Već smo si pomalo stari i pomalo bambiniti pa te večeri nikako da pobrojimo kuliko nas je zaspraven bilo va razredu. A koga briga. Dobro dok se prepoznamo, mi ki na druženje dojdemo. Ča da van rečen, lipo smo se pokumpanjali, najili, napili, nasmeli, zakantali, zatancali i kuntenti doma šli. Neki prvo, neki pokla, ma smo se dogovorili da ćemo se sopeta nać.

I to ča prvo, pa je naš jedini pomorac va razredu rekal – najbolje zajedno va prvomu mesecu, doklen san još doma. Se j’ zaspraven bilo isto koda smo sopeta mulci od četrnajst let jedino ča sad nismo omladinski razred leh penzionerski aš od seh nas leh nas tri dela, si drugi su penzići. Naravno da smo njin nas tri rekli – i kako ova zemlja more poć naprvo kad nas tri »hranimo« celi razred.

Ono ča sako leto gre naprvo, odnosno teče pred rudo je advent. Va butigah Božić, po trgeh Božić, si povedaju o tomu ki od pjevači će kade pjevat za Novo leto, već se dogovaraju i skijanja… Ma se j’ zaspraven šlo mater ženit i moran van reć da se va velen postotku slažen z plovanon z Broda na Kupi ki j’ prozval vas ta konzumerizam. Niman niš protiv Orašara, ma sedno već volin krunit jelvić na Badnjak i to z onen š čen san ga krunila još va djetinjstvu. Nikada ni bil savršen ma je bil pun ljubavi. A sad ću finit da Mate ne bi moral i mane pisat, pa se ja pokle ispričavat. Delajte ča ćete i kad ćete, leh se volit