Kako god - novi ritam grada je, a ki mi j’ kriv ča ga ja ne razumen
Ki’vo dan čitan da j’ ukupna težina kopnenih sisavci ki žive va divljine, ča će reć divoga blaga kod ča su sloni, bizoni, jeleni, tigri i ča ja znan ki se ne, leh deset posto ukupne težine soga ljudskoga roda ki biva na svitu. Gljedan va ta tekst i sama sobun mislin kako su se ljudi pretvorili va praščine i to one tovljene aš kako drugačje objasnit ovo ča su izraelski znanstvenici dokončali, a ti ljudići z Weizmannova znanstvenoga instituta dokončali su da divi kopneni sisavci imaju ukupnu masu od 22 tone, a da ljudi imaju 390 milijun ton.
Srce Isusovo, kako j’ se to skupa jedan veli sistem spojeneh padel ale zdel. Kako? Pa vrlo jednostavno – ljudi ubijaju divo blago da bi ga požerali, ča će reć da j’ blaga se manje, žerila se već, a debelih ljudi koš i još. Me par da za ko leto će mršavi bit leh oni ki špartaju po modnemi pistami i da će si oni ki budu prodavali zrcalo ko suzuje zaradit brdo soldi. Rabi pod hitno donest strategiju za mršavljenje ljudskoga roda i to na svjetskoj razine.
Za početak za Vazam malo manje jist, a malo već šećat. Bit će nan zahvalni i takujin i telo. Takujin sigurno aš kako god obrneš ti euri su se poskupeli za 20 do 30 posto i sad opće ni bitno greš po špežu va kakov trgovački lanac, miću butižicu ale na placu. Kamo god da pojdeš brdo euri projdu. A janjčevina da j’ po silni soldi i to da još moraš bit srićan ako ju najdeš, a da ta ista ni z Novoga Zelanda. Ča se mane tiče ne rabi mi ni ta spomenuta, ni bilo ka druga, ma mojoj matere bi bil smak svita da na Vazam namesto janjčevine poji recimo kakovu patku ale puru ale nedaj Bog prasca.
Verujte, nebo bi palo na zemlju. Kako već niš ne kuha, ni ne mesi, a jedinoj i najdražoj joj hćere ruki stoje poznopak (valjda znate da citiran gospu mamu) onput je kako ona voli reć se na stolu jedno velo niš koristi, žali Bože solad. To ča govori opće ni istina aš pogačice sprobeva već dva meseca i nijedna ku donesen njoj ne valja. Jedna da ni dosti slatka, va drugoj da j’ preveć cukara, treta da j’ prepečena… Ni jaja ne smen sakakove kupit aš ona će leh one z slobodnoga uzgoja. Kad san ju pitala ča ni isto ako su z podnoga otresla me je kako muhu – pitaj kokošu ka j’ zaprta i onu ka kljuca po vane pa se vrni nazada i povej mi ča su ti rekle – ka j’ od njih dve srićneja. I tako ja ta sakramenska jaja, ka usput budi reć ne moreš kupit baš sagdere zoven »srićna jaja«. A koštaju kod svetoga Petra kajgana. To da se za Vazam ne smeju farbat sakako, to ne rabi ni govoret. Dakle, moran iskat bela, a ako ih ni, onput leh sled žuta i moran jih klast kuhat va kori od kapuli, va špinat ale va ciklu. Kurkumu ne prizna aš da to pu nas ne raste i da ča će njoj to.
Da j’ to leh popiturat jaja, ma ni aš morete mislet srama kad va butige moran opret saki paket i pogljedat su bela ale leh sled žuta. Ča se tiče kapulice tu ne njurga, dobra j’ i ona z place, i ona z marketa. A znate zač? Zato aš ju ne ji. Da njoj žgaravicu načini. Šunkicu sama skuha aš da ja ne umen, koda se tu ima ča za umet – kladeš va padelu i neka kuha, a bakalaj more »leh onaj od onoga gospodina z Istre«. Pa se ti mala misli. A da pol od sega toga ča kupin kašnje fini va smeti, to znate bez da van rečen. Tako da zaspraven se to skupa dva put platin – prvi put va butige, a kašnje i Čistoće ka pelje smeti ća. I dakako da san ja za to kriva aš ne umen zračunat kuliko ljuden rabi za pojist. Ma, neka mane gospe Njurgalice, dobro j’ doklen njurga.
Ono ča mane pojida je to ča san dokončala da ča san stareja se već sličin na nju. Kako bi moj pokojni sused užal reć za nekoga ki j’ bil špičast – od ove ne rabi jaricu držat. E, jušto to san, doklen san se peljala sama va autu i lamantirala koda nas je sto pomislela za se. A ča me j’ razjadilo da san mašila i otpevala sama sobun? Nećete verovat – razjadil me j’ luna park va srcu mane najlipjega grada. Nemojte me krivo shvatit, niman ja niš protiv luna parka ma ča baš je moral bit na Gatu Karoline Rečke?
Ča ga nisu mogli klast na Deltu, na Preluk, ma kade god leh ne tamo kade su ga stavili. Ča mi ni dosti da kad pasan po gradu čujen ta sakramenski trep ki krešti z sakoga kantuna, sad moran i lunić gljedat na Rive. Koda gren po Bačkoj Palanke, a ne po Rike, uz jednu malu ogradu – more bit da grešin, more bit da san Bačku Palanku uvredila, aš tamo nisan nikada bila. Kako god – novi ritam grada je, a ki mi j’ kriv ča ga ja ne razumen.
S kamika i mora
Od ove ne rabi jaricu držat
Slavica Mrkić Modrić
08. travanj 2023 10:09
SNIMIO : SERGEJ DRECHSLER
Kako god - novi ritam grada je, a ki mi j’ kriv ča ga ja ne razumen
Ki’vo dan čitan da j’ ukupna težina kopnenih sisavci ki žive va divljine, ča će reć divoga blaga kod ča su sloni, bizoni, jeleni, tigri i ča ja znan ki se ne, leh deset posto ukupne težine soga ljudskoga roda ki biva na svitu. Gljedan va ta tekst i sama sobun mislin kako su se ljudi pretvorili va praščine i to one tovljene aš kako drugačje objasnit ovo ča su izraelski znanstvenici dokončali, a ti ljudići z Weizmannova znanstvenoga instituta dokončali su da divi kopneni sisavci imaju ukupnu masu od 22 tone, a da ljudi imaju 390 milijun ton.
Srce Isusovo, kako j’ se to skupa jedan veli sistem spojeneh padel ale zdel. Kako? Pa vrlo jednostavno – ljudi ubijaju divo blago da bi ga požerali, ča će reć da j’ blaga se manje, žerila se već, a debelih ljudi koš i još. Me par da za ko leto će mršavi bit leh oni ki špartaju po modnemi pistami i da će si oni ki budu prodavali zrcalo ko suzuje zaradit brdo soldi. Rabi pod hitno donest strategiju za mršavljenje ljudskoga roda i to na svjetskoj razine.
Za početak za Vazam malo manje jist, a malo već šećat. Bit će nan zahvalni i takujin i telo. Takujin sigurno aš kako god obrneš ti euri su se poskupeli za 20 do 30 posto i sad opće ni bitno greš po špežu va kakov trgovački lanac, miću butižicu ale na placu. Kamo god da pojdeš brdo euri projdu. A janjčevina da j’ po silni soldi i to da još moraš bit srićan ako ju najdeš, a da ta ista ni z Novoga Zelanda. Ča se mane tiče ne rabi mi ni ta spomenuta, ni bilo ka druga, ma mojoj matere bi bil smak svita da na Vazam namesto janjčevine poji recimo kakovu patku ale puru ale nedaj Bog prasca.
Verujte, nebo bi palo na zemlju. Kako već niš ne kuha, ni ne mesi, a jedinoj i najdražoj joj hćere ruki stoje poznopak (valjda znate da citiran gospu mamu) onput je kako ona voli reć se na stolu jedno velo niš koristi, žali Bože solad. To ča govori opće ni istina aš pogačice sprobeva već dva meseca i nijedna ku donesen njoj ne valja. Jedna da ni dosti slatka, va drugoj da j’ preveć cukara, treta da j’ prepečena… Ni jaja ne smen sakakove kupit aš ona će leh one z slobodnoga uzgoja. Kad san ju pitala ča ni isto ako su z podnoga otresla me je kako muhu – pitaj kokošu ka j’ zaprta i onu ka kljuca po vane pa se vrni nazada i povej mi ča su ti rekle – ka j’ od njih dve srićneja. I tako ja ta sakramenska jaja, ka usput budi reć ne moreš kupit baš sagdere zoven »srićna jaja«. A koštaju kod svetoga Petra kajgana. To da se za Vazam ne smeju farbat sakako, to ne rabi ni govoret. Dakle, moran iskat bela, a ako ih ni, onput leh sled žuta i moran jih klast kuhat va kori od kapuli, va špinat ale va ciklu. Kurkumu ne prizna aš da to pu nas ne raste i da ča će njoj to.
Da j’ to leh popiturat jaja, ma ni aš morete mislet srama kad va butige moran opret saki paket i pogljedat su bela ale leh sled žuta. Ča se tiče kapulice tu ne njurga, dobra j’ i ona z place, i ona z marketa. A znate zač? Zato aš ju ne ji. Da njoj žgaravicu načini. Šunkicu sama skuha aš da ja ne umen, koda se tu ima ča za umet – kladeš va padelu i neka kuha, a bakalaj more »leh onaj od onoga gospodina z Istre«. Pa se ti mala misli. A da pol od sega toga ča kupin kašnje fini va smeti, to znate bez da van rečen. Tako da zaspraven se to skupa dva put platin – prvi put va butige, a kašnje i Čistoće ka pelje smeti ća. I dakako da san ja za to kriva aš ne umen zračunat kuliko ljuden rabi za pojist. Ma, neka mane gospe Njurgalice, dobro j’ doklen njurga.
Ono ča mane pojida je to ča san dokončala da ča san stareja se već sličin na nju. Kako bi moj pokojni sused užal reć za nekoga ki j’ bil špičast – od ove ne rabi jaricu držat. E, jušto to san, doklen san se peljala sama va autu i lamantirala koda nas je sto pomislela za se. A ča me j’ razjadilo da san mašila i otpevala sama sobun? Nećete verovat – razjadil me j’ luna park va srcu mane najlipjega grada. Nemojte me krivo shvatit, niman ja niš protiv luna parka ma ča baš je moral bit na Gatu Karoline Rečke?
Ča ga nisu mogli klast na Deltu, na Preluk, ma kade god leh ne tamo kade su ga stavili. Ča mi ni dosti da kad pasan po gradu čujen ta sakramenski trep ki krešti z sakoga kantuna, sad moran i lunić gljedat na Rive. Koda gren po Bačkoj Palanke, a ne po Rike, uz jednu malu ogradu – more bit da grešin, more bit da san Bačku Palanku uvredila, aš tamo nisan nikada bila. Kako god – novi ritam grada je, a ki mi j’ kriv ča ga ja ne razumen.