Bil je daž, pa j’ bilo sunce i da će opet jutra dažit. A ta pogovor o kivodanjen općemu potopu, to j’ bilo čudo. Kamo god zajdeš, koga god da utakneš, si leh o dažju. Saki pogovor je počinjal z rečenicun »ma, si ti videla ono čera…«. Videla san, da ča leh san videla, ma na sriću, nisan bila del teh ni vodotoki, ni jezer, ni rika, ni potoki. Nekako san se na vrime otpeljala delat, a kad san se vrnjala doma, Svevišnjemu je dosadilo plakat nad semi nami pa j’ zel pauzu. Intanto, san ovaj sveopći potop gljedala leh na slikami i ni mi ni malo žal ča se nismo utaknuli. Moja roditeljica ni dažja okusila već je ko leto, ma sedno, dočin meteorolog reče da će daž, ona već pripravlja stolčić za va špajz, aš kade j’ daž tu j’ i grmljavina. A nje se boji kod vranić tamjana. Tako da j’ celo zapolne presedela va špajze i cukar si dignula fanj, aš je od straha pobrstila si keksići i čikulatice ke j’ našla. Kad je videla ča j’ se v Rike bilo, leh se j’ križala i ponavljala – smak svita. Niš drugo leh – smak svita. Ja san skakala okolo nje i pjevala – daž daži, miš prdi. I bilo j’ kod va cirkusu. Znači zabavno, baren mane.

Ma, kad smo već po miši, moran dat objašnjenje okol toga problema ki se j’ pojavil va našoj redakcije. Neki su krivo shvatili pa su me zvali i pitali ako j’ bila deratizacija va Novomu listu. Kako san već pozabila na miši, va čudu san pitala ti znatiželjni – zač? A kada san povezala, dobro san se nasmela. Najme, nisu nan redakciju okupirali miši, leh je već spomenuti kolega Bobo namesto ležećega otel uspravnoga miša, aš da ga jako desno rame boli i šal je pitat glavnu urednicu da mu ga nabavi. Mane j’ bilo dosti čut rečenicu ku j’ izgovoril i nastal je kažin od smeha i zafrkancije. Još više kad su i neki drugi rekli da njin miš ne valja i da i njimin nabavi uspravnoga. A, sada, da ne bi bilo zabuni – dela se o mišu za kompjutor. I za kraj da ne mutimo već vodu leh ča je zamućena, leh izvješće – uspravni miši, njih pet stižu va redakciju, a ki su ti isti ki će ih dobit, ne znan. Valjda oni ki su va najhujoj pozicije ča se toga tiče. Intanto, moj je prijatel Dražen, kad je čul da će i njemu dat uspravnoga, ni ne dižuć glavu od kompjutora rekal – mane ne rabi novi miš, mane j’ moj dobar. Tako da se zna!

Sad gremo na zamućenu i nezamućenu vodu. Kad je veli daž, onput je zamućena voda ku, ako greš pit, moraš prokuhat, normalna stvar. Ma, mnogi su počeli zijat da j’ obavijest za zamućenje došlo prekasno i da su već popili litri i litri ki zna česa, a ja san se leh nasmela i rekla – i kad ste bili mići su van prokuhevali vodu. Bonđorno! Javil se j’ zajedno Arsenić s Zlobina i rekal – imaš pravo, mi smo kod dičina i z bare vodu pili, a najvažneje ti je bilo znat da kade konj vodu popije, moreš komotno i ti, niš ti neće bit. Zajedno san zamislela kako sad po Rike si pomodni konja kupuju i od špine do špine pelju, pa gljedaju kade konj pije, i oni će. Nisan to na glas rekla, ma san Arseniću odgovorila da j’ kad je pil z bare, zajedno i jil. Aš ako popiješ punoglavca, to si se usput i napil, i najil. Ovi z grada su nan rekli da smo odvratni, a mi njimi da će sigurno dobit proljev aš nisu vodu prokuhali i tako smo finili pogovor o zamućenju.

Za kraj leh potvrda onoga ča su šegavi znali i prvo, a glasi da čovik uči doklen je živ. Eto, da ni bilo va Hroljeven Svjetsko prvenstvo va kastingu, ja bin i umrla, a ne bin znala ča j’ to. Besedu kasting san vavek rivala va modu, film, umjetnost, a ni va sto životi ju ne bin spojila z ribičijun. Kad ono, ne leh da se tiče ribičije, leh je to ribičija na veloj razine. Silni kastingaši z celoga svita došli su spod moje kući i »lovili ribu« na trave. Na igrališću, a onput su drugi dan šli na gromički aerodrom, kraj kući od Dražena. Tako da smo nas dva imeli svjetsko prvenstvo spod nosa i to od sporta za koga ni jedan, ni drugi nikada nismo čuli. Šegavi bi rekli – ne hitat biseri spred prasci. Ma, ki prizna, pol mu se oprosti, a ča se tiče ovoga sporta, malo smo se informirali i moren van reć da ni ni malo lahk, i da ne bin rad bila pastrva va Gacke doklen ovakovi kastingiraju uza me.

Neću van reć ča j’ moja mat rekla na se to.