Ljudi užaju reć da j’ čovik mlad doklen god se tako osjeća. I ja si sad mislin, kako ljudi govore leh da govore aš ja poznan čuda njih za keh mislin da su se stari rodili. Za se moren reć da san fanj dugo vukla tu mladost i da mi se j’ puno puti dogodilo da nisan znala san va pubertetu ale va klimakteriju, a najprvo da su mi se pospojili. Ma, pasalo j’ to vrime i verovali ale ne, trenutno se jako staro ćutin. Koda iman tristo let. Grintava, njurgava, se mi i si mi gredu na živci, namaljan leh da namaljan, sama mašin i otpevan, niš me jako ne zanima i nikamo mi se ne da poć. Još da počnen gljedat sapunjači, z naglaskon na turske, aš drugeh na teh našeh televizijah takoreć ni ni, i bila bin stareja od svoje materi. Zaspraven već sad san aš ona bi šla sakamo da ju nogi služe. A ja, eto – nikamo.

Srića da delan to ča delan pa ću neću znat ča se va svitu i okol njega zbiva. Glavno i jedino pitanje ke postavljan va redakcije kolegan je – kako j’ bilo. Aš si oni za razliku od mane nekamo gredu – na koncerti, na predstave, va kino, na kafe i slično, a ja nekada kurijoža nad kurijožami, ča bi susedi Bosanci rekli kuća – pos’o, pos’o – kuća. Najveć nastrada moj cimer Perović ki stalno nekamo landra, a ja ga spićevan. Huja san od policije. Leh čekan da mi reče – vadi nos z moje intime. Niš bolje ne pasa ni Baukica, to van je ona šesna mala ka dela nedeljni Novi list. I ona je jedno velo klatilo pa i to širokoga spektra pa mi j’ zaspraven vodič od kulturi do hortikulturi. Recimo, čera j’ bila na Cinehillu, ale da preveden – na filmskomu festivalu va Fužinah.

Prvo leh je šla odslušala je kako mora zet tenesice, jaketu i obavezno kabanicu. I kako mora na vrime krenut da bi se mogla parkirat. Pa da nisan stara! A kad se j’ vrnula morala mi je do u tančine povedat, ne leh kakov je bil film, nego i kako j’ bilo se skupa. I moran priznat da me j’ do suz nasmela. Najme, kuliko j’ dobra slovimi i recimi, tuliko j’ loša va orjentiranju va prostoru. Ako ste misleli da se va Fužinah niki ne more zgubit, e faleli ste aš se j’ to njoj dogodilo. Išće ona Rakov potok i namesto da pita nekoga, današnja mladež gugla. I tako ju je gugl popeljal na krivu stran pa se j’ fanj nahodila i na početak filma zakasnila. Ali da tomu ni tako, ne bi videla ni tako lipo zvjezdano nebo, ni kresnice ke smo mi kod mići zvali – črvi kemi rit sveti. Se va semu, film je bil super, večer je bila super, a to ča j’ pri povratku zakasnila na vlakić pa j’ još malo »pedalirala«, leh će njoj popravit krvnu sliku. Dakle, preporuka je – si va Fužine i ne guglat, leh pitat.

Kimberli, ale Kim Cuculić mi je »poneštra« za va kazalište. Ona mi poveda kako j’ bilo na priredbah toga tipa, tako da i to iman pokriveno pa sad baš malo mislin kako ta starost i ni tako loša stvar – se znaš, a nikamo ne greš. Ja, tješi se, tješi, moj golube beli. Intanto, ako opet postanen mlada, aš z manun se nikad ne zna – javit ću van ale će te to i sami dokončat ako me uspijete negdere, na nekomu događanju videt.

Ono ča ja vidin je televizija, i to većinon vijesti i dnevniki. I ča? Avah je mane – se katastrofično. Čini mi se koda pol svita ratuje ale bi moglo zaratit. Čini mi se koda pol svita putuje nazdolu, a druga polovica nazgoru i da se trefe jušto pu nas i začepe nan se cesti i si puti. Sad već ne govorimo o turističkomu valu, to su vali ki nikada ne staju. Kamo si ti ljudi stanu, ne znan i ni me briga. Srića da nikamo ne gren pa ne moren i da ću upast va čep. Jedino va kuhinje ale hodniku kad moja sporovozna roditeljica krene simo ale tamo. A ta ista ku san spomenula, zadnji dani leh namalja kako j’ svit lačan, a mi saki dan hranu va smeti hitamo. Ne spominje da j’ to najčešće zato aš ona neće da ji, a nedaj bog joj reć da je zvicijana aš da se ki put more za večeru pojist ono ča j’ ostalo od obeda, a ne hitat koda smo pijani milijarderi. Znan da bi mi odgovorila kako ona ima svoju penziju i kako š njun more delat ča će, pa i kupljevat jido da bi ga hitila. Znan i da bi njoj ja odgovorila kako njoj ta mižerija ne bi bila dosta ni za hartu s kun se rit tare i znan da bi izbil još jedan rat na ovomu ludomu svitu, pa zato premučin. Ča j’ još jedan dokaz da san ostarela.