Čera me j’ baš razveselela štorija od opatijske mačice. Znate ona štorija ka poveda o tomu da još vavek postoje dobri ljudi i potvrđuje onu da kad su ljudi složni se moru načinit. Najme, za one ki ne znaju – ženskica j’ jutro šla na delo va jednu butigu na glavnoj opatijskoj ceste. Čula je da od nekuda neš kriči, mislela j’ da j’ kakova tičica, ma naslišuć dalje dokončala j’ da to mora bit neš drugo. I bilo je – mačica j’ zapela va motoru nekakovoga kombija i ni simo, ni tamo.

Zagnjela se j’ kamo njoj ni bilo mesto i načinila veli kažin. Ženskica j’ zvala drugu, pa j’ došla treta, pa su se va celu akciju spašavanja mačića ale mačice, ne znan koga j’ spola brižno blago, dali i domaći, i turisti i si. Došli su i pompjeri i policijoti i mačica j’ okol ure spašena, otpeljana veterinaru i na kraju i udomljena. Ma, prelipa štorija va koj je jedna, kako ju je nazvala moja kolegica Aleksandra Kućel Ilić »maca šašavica« na kup klala more ljudi ki su imeli leh jedan cilj – spasit blago. Čestitke sen ki su va akcije sudjelovali, a gospode političarimi poruka neka se na nje ugledaju i prestanu se karat i grdo govorit jedni o drugemi.

A kada smo već pu blaga ko se voli va auti zavlačit, mane se j’ jedanput dogodilo da san od KBC-a na Sušaku do Belići isto tako va motoru dopeljala živu mačicu. Kako j’ preživela ni dan danaska mi ni ćaro, a dobro da se nisan zrušila kad san fermala auto, čula da z motora neš mjavče i kada j’ mačica zipuzala na kolo pa vanka. Isto j’ udomljena i isto j’ se bilo dobro. Kada mi j’ pantigana šla va motor onput štorija ni tako dobro finila ni za auto, ni za moj takujin, a bome ni za pantiganu. Pojila mi j’ se ča j’ mogla pojist va motoru, onput se je važgala na akumulatoru, pa j’ zasmrdela kod sto vrazi, a ja san na kraju morala provest dezinsekciju i deratizaciju, pa čekat da dojdu deli z Francuske, pa platit se to i na kraju još i kupit sprej protiv štakori i nasmrdet auto. A se to skupa je niš od onoga ča se j’ dogodilo jednomu momu prijatelu ki j’ z auta moral kačku potezat, ma to mi se gnjusi ni povedat, pa neću. Da ni ne govorin kada j’ jednoj gospe na ceste ka pelje z Meji va Bakar kaška pala na krov od auta doklen je vozila, a poneštra oprta. Dobro da ju ni kolpalo i da ni šundrala, sebe, auto i zmastila koga na ceste. Zato rabi pazit kuliko j’ god moguće kade po lete parkirat auto.

Ma ni blago problem leh za šoferi, veli problem je i za si oni ki imaju vrti, a nimaju dobre ogradi. Recimo, va momu vrtu već ničesa ni. Pojile srnice. Šundrale su i oneh par trsi ča jih je moj pokojni otac pazil kod sveto ulje, a na hrušve ka j’ bila krcata ostalo j’ još par njih na vrhu. Srića od Boga ča se ne umeju prtit po škalah aš ni to mi ne bi bile pušćale. Niš ja blagu ne zameran, ono se snalazi kako zna i ume, ma mi nikako ne gre va glavu zač toga prvo ni bilo, a celi svoj život bivan na selu, a ne va gradu.

Prvo su vrti bili po dolci, i kade god i ni bilo ni ogradi, ni vranića, nikada blago ni zahajalo va nje, a ni da ga ni bilo – i srn, i jazavci, medo j’ ki put užal doć na črešnji, i sega. Jedino ča nikada prvo na Višnjevice nisan videla je divi prasac, a sada da jih je po Dugomu kusu kuliko ti srce će. Užan se našalit i reć da su otkrili golf tereni pa da igraju.

Mat mi govori da kako se menja čovik, a med ljuden da već niki ni normalan – da se tako menja i blago ale nemilo je seprisutno. Govori da j’ još i dobro doklen ne počnu va isto vrime po bajah kopat, aš da se onda zna ki će zivuć deblji kraj. Govori da j’ čovik kriv za se to ča se dogaja aš da blagu šundreva dom i onput se čudon čudi ča mu blago na vrata dohaja. Suše su, govori mat, blago gre za vodun, a ki j’ kriv za suši, pita i kako vavek sama maši i otpeva, odgovara – sopet ljudi. Namalja o požarimi ke podmeće ki ako ne čovik, spominje galebi ki su šundrali krilo od kanadera i zajedno dodaje – to j’ zato aš se j’ brižno blago prestrašilo i na kraju celoga ovoga mašenja pita – a, kada će ta prokljeta drva doć, na ta drugi dan je zima. Nisan mogla verovat da će maša tako finit, pa san njoj leh rekla – odite u miru i namesto nje ja prošla va drugu kamaru razmišljat o bilo čemu leh ne o drvimi.