Ki o čemu, Rika o »Galebu«. Sopeta je top tema va sakoj oštarije, kancelarije, va busu, na place i kade god. I sopeta su mišljenja podelena – jedni su za to da se ta brod-muzej, kako ga nazivaju, obnovi, zaveže negdere na Molo longu i da saki ki poželi, a pruži mu se prilika, bar na jedan dan zamisli da je Tito.
Drugi smiron namaljaju da j’ »Galeba« trebelo potopit i silni soldi dizat od oneh ki bi ga rado šoto gljedali va ronilačkoj opravice. A treti, to su oni keh već ni za niš briga, e, oni govore da njin je već puna pipa i Tita, i »Galeba« i socijalizma, i povijesti, i umjetnosti, i ove vlasti i one, i tako dalje, i tako bliže. Iskrena ću van bit, ja ne znan koj bi strane ja pripadala. Mepar četrtoj, ka bi ta brod, kad smo ga već kupili, klala na suho. I ča bin onput š njin? To još nisan razradila, ma moje kolegi imaju sakakove ideji. Jedna govori da Rike fale vrtići i da bi ona na »Galebu« oprla vrtić. Rekla san joj da bi to bilo preopasno za decu aš brod, bil na suhomu ale ne, ni za takove stvari. Jedan drugi govori da j’ Tito bil svjetski bonvivan, da ne reče hohštapler i veli zavodnik, i on bi na njemu oprl kupleraj aš da od vrimena »Barba Ruda«, ki se j’ pukazal kako elitno mesto za dobru zabavu i provod, Rika nima takovoga ča, a ako mislimo razvijat turizam, da bi jedan kurberaj, neovisno bil na moru ale na kopnu, dobro došal. Tu se j’ zajedno javila treta i zazijala da to ni pošteno aš da ne moru ženske vavek Riku spaševat. Na to je ov isti od kurberaja rekal da zač zajedno spominje ženske, tr da j’ danaska to zanimanje jednako profitabilno i za muški, i za ženske, i za neopredjeljene.
Tu san jih prestala naslihat i počela računat. Ma kuliko ja bila loša z matematikun, ni mi rabilo puno da zračunan kako zotin »Galebon« pušimo tuta forca. Aš, ne rabi bit posebno šegav pa dokončat kako neš ča j’ va startu trebelo koštat niti šezdeset milijun kun, a sada kad renoviranje ni na pol puta, troški su krešili preko sto milijun kun – neće na dobro. Zač je krešilo? Pa zato aš su prvotne procjene bile takove kakove su bile, a kad se j’ počelo delat, oprla se j’ škuja beznađa, aš ona sakramenska tikovina za ku su misleli da će ju moć malo poluštrat i da će bit dobra, pukazala se j’ kod jedno velo niš koristi. I ča sada? S pol puta se ne moreš vrnut, a naprvo je teško. Intanto, morda stvar spase zakupci teh komercijalneh prostori, ma me par da to moru jedino oni sa stranun adresun aš pu nas da, osin njih par, celo stanovništvo poznopak obrneš, ne bi skupil za deset kubanskeh cigaret kakove j’ Tito fumal. Tako san, ću-neću, morala priznat da on kolega od kurberaja ima najbolju ideju pa san šla do njega da ju malo razradimo.
Recimo, moj predlog je bil da, kad »Galeb« i ako »Galeb« jednoga dana bude finjen, na njemu bude muzej »galebarenja«, aš nisu galebi postojali leh va Opatije i tako to, postojali su oni i v Rike, i duž cele obale i ondašnje i sadašnje državi. Ma, znate na ki galebi mislin. Ne na oni ča nan po glave da ne rečen ča, leh na oni zgodni dečki ki su frajali z Švabicami, Čehinjami i sličnemi malicami aš va bivšoj države se j’ znalo ča j’ prostitucija, a ča robno-novčana razmena.
Glavno da su obe strane bile zadovoljne i zadovoljene, a vranić me zel ako na račun teh tepleh letnjeh večeri na našemu moru, ni fanj Evrope našeh koreni, a da to ni ne zna. Intanto, videt ćemo kako će se štorija od »Galeba« dalje razvijat, va komu će smeru poć, ma ova ideja od kurberaja i to onoga z kulturnen predznakon ni za hitit, aš recimo uz muzej galebarenja, mogla bi bit i kinosala. Si znamo da j’ Tito obožaval film i glumice. Istina Bog, volel je vesterni, ma i ovi drugi filmi ki bi pasali uz on spomenuti muzej su akcijski, leh je akcija malo drugačja.
Neću već o »Galebu«, a bome neću ni o Obersnelu i još jednoj funkcije ku je dobil. I nemojte me već pitat ča ja o tomu mislin, aš ne mislin niš. Neka misle oni z Ginesove knjige rekordi, mane baš nimalo ne zanima brojit ki kade dela i zač. Za kraj leh još beseda-dve o, kako bi presjednik rekal, »lepom Banetu«. Srića od Boga ča mu j’ povjerenstvo izreklo kaznu leh od sedan hiljad kun. Tuliko Bane ima, pa se neće morat poć zadužit.
S kamika i mora
Moj »Galebe«…
Slavica Mrkić Modrić
21. svibanj 2022 08:53
Foto S. Drechsler
Ki o čemu, Rika o »Galebu«. Sopeta je top tema va sakoj oštarije, kancelarije, va busu, na place i kade god. I sopeta su mišljenja podelena – jedni su za to da se ta brod-muzej, kako ga nazivaju, obnovi, zaveže negdere na Molo longu i da saki ki poželi, a pruži mu se prilika, bar na jedan dan zamisli da je Tito.
Drugi smiron namaljaju da j’ »Galeba« trebelo potopit i silni soldi dizat od oneh ki bi ga rado šoto gljedali va ronilačkoj opravice. A treti, to su oni keh već ni za niš briga, e, oni govore da njin je već puna pipa i Tita, i »Galeba« i socijalizma, i povijesti, i umjetnosti, i ove vlasti i one, i tako dalje, i tako bliže. Iskrena ću van bit, ja ne znan koj bi strane ja pripadala. Mepar četrtoj, ka bi ta brod, kad smo ga već kupili, klala na suho. I ča bin onput š njin? To još nisan razradila, ma moje kolegi imaju sakakove ideji. Jedna govori da Rike fale vrtići i da bi ona na »Galebu« oprla vrtić. Rekla san joj da bi to bilo preopasno za decu aš brod, bil na suhomu ale ne, ni za takove stvari. Jedan drugi govori da j’ Tito bil svjetski bonvivan, da ne reče hohštapler i veli zavodnik, i on bi na njemu oprl kupleraj aš da od vrimena »Barba Ruda«, ki se j’ pukazal kako elitno mesto za dobru zabavu i provod, Rika nima takovoga ča, a ako mislimo razvijat turizam, da bi jedan kurberaj, neovisno bil na moru ale na kopnu, dobro došal. Tu se j’ zajedno javila treta i zazijala da to ni pošteno aš da ne moru ženske vavek Riku spaševat. Na to je ov isti od kurberaja rekal da zač zajedno spominje ženske, tr da j’ danaska to zanimanje jednako profitabilno i za muški, i za ženske, i za neopredjeljene.
Tu san jih prestala naslihat i počela računat. Ma kuliko ja bila loša z matematikun, ni mi rabilo puno da zračunan kako zotin »Galebon« pušimo tuta forca. Aš, ne rabi bit posebno šegav pa dokončat kako neš ča j’ va startu trebelo koštat niti šezdeset milijun kun, a sada kad renoviranje ni na pol puta, troški su krešili preko sto milijun kun – neće na dobro. Zač je krešilo? Pa zato aš su prvotne procjene bile takove kakove su bile, a kad se j’ počelo delat, oprla se j’ škuja beznađa, aš ona sakramenska tikovina za ku su misleli da će ju moć malo poluštrat i da će bit dobra, pukazala se j’ kod jedno velo niš koristi. I ča sada? S pol puta se ne moreš vrnut, a naprvo je teško. Intanto, morda stvar spase zakupci teh komercijalneh prostori, ma me par da to moru jedino oni sa stranun adresun aš pu nas da, osin njih par, celo stanovništvo poznopak obrneš, ne bi skupil za deset kubanskeh cigaret kakove j’ Tito fumal. Tako san, ću-neću, morala priznat da on kolega od kurberaja ima najbolju ideju pa san šla do njega da ju malo razradimo.
Recimo, moj predlog je bil da, kad »Galeb« i ako »Galeb« jednoga dana bude finjen, na njemu bude muzej »galebarenja«, aš nisu galebi postojali leh va Opatije i tako to, postojali su oni i v Rike, i duž cele obale i ondašnje i sadašnje državi. Ma, znate na ki galebi mislin. Ne na oni ča nan po glave da ne rečen ča, leh na oni zgodni dečki ki su frajali z Švabicami, Čehinjami i sličnemi malicami aš va bivšoj države se j’ znalo ča j’ prostitucija, a ča robno-novčana razmena.
Glavno da su obe strane bile zadovoljne i zadovoljene, a vranić me zel ako na račun teh tepleh letnjeh večeri na našemu moru, ni fanj Evrope našeh koreni, a da to ni ne zna. Intanto, videt ćemo kako će se štorija od »Galeba« dalje razvijat, va komu će smeru poć, ma ova ideja od kurberaja i to onoga z kulturnen predznakon ni za hitit, aš recimo uz muzej galebarenja, mogla bi bit i kinosala. Si znamo da j’ Tito obožaval film i glumice. Istina Bog, volel je vesterni, ma i ovi drugi filmi ki bi pasali uz on spomenuti muzej su akcijski, leh je akcija malo drugačja.
Neću već o »Galebu«, a bome neću ni o Obersnelu i još jednoj funkcije ku je dobil. I nemojte me već pitat ča ja o tomu mislin, aš ne mislin niš. Neka misle oni z Ginesove knjige rekordi, mane baš nimalo ne zanima brojit ki kade dela i zač. Za kraj leh još beseda-dve o, kako bi presjednik rekal, »lepom Banetu«. Srića od Boga ča mu j’ povjerenstvo izreklo kaznu leh od sedan hiljad kun. Tuliko Bane ima, pa se neće morat poć zadužit.