Stala san se va velomu strahu, kako i na saki Prvi maj va zadnjeh desetak let. Razlog tomu strahu je jedan i jedini, a sveden je na pitanje ko glasi – majčice Božja, ki zna ako j’ moja Gordana ovo leto dobila maj. A maj je, za oni ki ne znaju, mada mislin da si znaju – nekada prvo bila zelena gran ku su mladići ki bi bili infišani va nekakovu maletinu kladali toj maletine na krov, dimnjak ale nekakovo drvo na privratu, a kašnje i jorgovan. Se ovisi o komu dobu pasanega vrimena povedamo. Intanto, moja Gordana j’ ta maj počela dobivat pred kakoveh pedesetak let i evo, va šezdesetimi ga još vavek dobiva. Sada se vi pitate va čemu je problem. Pa, va tomu aš kako j’ starela Gordana, tako j’ starel i njeji tajni udvarač, pa j’ ta maj z krova mic po pic hodil nazdolu i sad njoj bude zataknjen na kvaku od vrati od garaži. A, ja leta su, ni udvarač već mladić pa se nima ki prtit ni po krovu, ni po stableh. Si znamo da ta isti postoji, a niki od nas ne zna ki je. Ni Gordana. Ki put pomislin da ih je za ova silna leta more bit bilo više, ma se brzo predomislin aš ov isti ima prepoznatljiv, ča bi se reklo – ručni rad. Ča j’ najbolje, nekako mi se čini da ni ona, ni si mi okol nje ki znamo za ovo njeje prvomajsko iščekivanje, zaspraven ne bi ni oteli znat ki j’ ta uporni nekada mladić, a sada već barbić. Da doznamo, se bi to zgubilo draž i postalo banalno, a banalnosti je nan sen skupa puno i preveć.

I tako, zbudin se i prvo ča načinin popaden mobitel pa drito na Gordanin fejzbuk profil. Napetost, napetost, a onda olakšanje – moja je Gordana litratala vrata od garaži i objavila da j’ mladić-barbić noćas bil va akcije. Bakarski kraj je mogal odahnut aš čovičić je živ, a Gordana i si mi skupa š njun kuntenti. Zajedno san se nasmela i va komentar napisala – Bog mu dal zdravlje! Neka nan i on i Gordana još puno let požive i po Prvomu maju kortejaju. Morda ćemo jednoga dana i doznat ki j’ ta čovik bil, a ako i ne – ni važno, bitno je da j’ on i tako nepoznat obilježil i našu mladost, i naš početak starosti. Ekola, sad znate da ja Prvi maj ne pantin ni po budnicah, ni po fažolu, ni po roštilju, mada j’ sega toga bilo leh po »čoviku maju« ki j’ tuliko misteriozan da bi se po njihovoj prvomajskoj ljubave mogla knjiga napisat. Ne znan ča Gordana čeka.

Ono ča ja čekan su izvještaji z teh prvomajskeh govorancij i požerancij, da jih pročitan, opremin i kladen va novinu. Eto van moje srići – novinari jidu, a urednici čekaju da se novinari najidu, podrignu, napišu i pošalju tekst. Najlipše na svitu je bit novinar, verujte onomu ki j’ proval i jedno i drugo. Pokle ću još i naslihat kade j’ fažol bil najbolji, kade malo manje, kade ga nisu uspjeli dobit aš su ga pojili prvo leh su novinari došli i slično. A ki j’ ča od političari rekal, ki ni, e, to j’ bolje da mi ni ne povedaju aš mi floskuli već na uši zihajaju. Leh da van rečen – ki’vo dan san malo omladinu ka j’ okol mane pitala da ako znaju zač se slavi Prvi maj i zač se baš fažol ji na ta dan i moren van reć da j’ ta mladež, uza su tu mašineriju od mobiteli, tableti, interneti, umjetne inteligencije i slično, se bedasteja i bedasteja. Leh su retki znali za veli i krvavi radnički protest va Čikagu 1886. leta, o tomu ča znači osan – osan – osan, o ranjenemi i mrtvemi na tomu štrajku i slično – niš. A za fažol su rekli da se ji aš da j’ to jido za siromahi. O tomu kulika mu j’ energetska vrednost ale va prevodu da daje puno snagi delavcon, nisu nikada čuli.

I za kraj ove štorije od Prvoga maja, leh neš ča me j’ jako nasmelo. Govorin ja da će danaska podivljat si stroji za merenje čistoće zraka, da će metana va atmosfere bit va neizmjernemi količinami i slično. A oni bleje va me kod telci va šarena vrata. Blage veze oni nimaju ča ja govorin, a da su ikada malo ča pročitali bi znali da su baš kravi najveći zagađivači zraka aš se nažeru travine pa podriguju i prde tuliko da metan leti na se strani, se bi njin bilo ćaro. Evo, ni matematiku ne moraju znat, a moru na primjeru krav dokončat da ako se j’ va sakomu delu svita žeral fažol, i prdelo se je i da j’ saki leh jedan vetar pustil, a pustil ih je tuliko da j’ bolje ne brojit, znali bi da j’ zemaljska kugla bila va jednomu velomu omotaču od metana. Srića od Boga da svemirci ne puše aš ode mast va propast. I ne pitajte me sada kako znan da svemirci ne puše. Srićan van Praznik rada, odoh ja dalje delat – pu mane ne vredi ono osan – osan – osan.