Mane više niš ni ćaro. Ako čovik dojde va crikvu, tamo popi maše o pulitike, odgoju dece, umjetnoj oplodnje, eksperimentimi nad čovikun i sličnin temami. Potle maši čovik otpre televizor, a tamo se premijer Milanović ćapal za Bibliju.

Ne znan ča su Slavonci mogli dokončat z citiranog biblijskog psalma. Morda su pomisleli da njin više nima spasa kad se premijer jedne državi lovi za Bibliju. Za Slavonci bi to mogal bit sinjal da se Slavonije približava smak svita i da se još jedino moru pouzdat va Sveto pismo. Kad već od Milanovića nisu čuli konkretne meri za Slavoniju, mogli su leh dokončat: »Neka nan Bog pomore«. 

  To j’ stara poslovica ku dobro znaju i Primorci. Do sad smo naslihali leh o novin porezimi, rizanju plaća učiteljimi, smanjenju oveh i oneh prava, a sad nan vladajući poručuju da su nan ustale leh vera i nada. Niki više niš ne obećuje. Moremo leh sklopit ruki i pomolit se da nan bude bolje. I Biblija na Markovon trgu va ten će sigurno bit od pomoći. 

   Poznato j’ da nikemu još z neba niš ni palo, ma ako dovoljno budemo gljedali prama nebu i čitali biblijski citati, Hrvacka će finalmente poć naprvo. Morda naš premijer ima pravo, aš se reče da si odgovori na pitanja ka nas muče moremo nać va Biblije.

Va ten ima istine, ma od biblijskih istina i molitve nima puno koristi ako se v ruki ne zame motika. A problem je uprav va ten ča j’ teh motik se manje, a oneh na zavodu za zapošljavanje se više. Tu ni Bog, zgljeda, ne more pomoć.