San bila na dopustu, san se vrnula i kako to obično bude, kad dojdeš si pitaju – kade si bil, ča si delal, si počinul…

Moje izvješće nikomu ni moglo bit zanimljivo aš san ko papagalo sen govorila – doma, jila san kod praščina, spala dulje leh najpospaneja maška i z materun gljedala vijesti, dnevniki i utakmice. Pogovor finjen, ma mnogi ni ne znaju da j’ gljedanje utakmic z mojun gospun roditeljicun veli doživljaj, nesigurneji leh se prtit na Mont Everest.

Na toj planine ti se sega vranića more dogodit, ma bome i sedeć na kauču kraj kraljice majke doklen gljeda hrvacku reprezentaciju. Polufinalna utakmica od ki’vo dan za velu većinu ljudi bila j’ vela opasnost za dobit infarkt, za nju ni aš ona svoj bijes usmjeri na seh leh ne na se. Tako san se ja već pojidala za se i za se stvari okolo nje leh za njeje zdravstveno stanje. Najprvo san trdo zaprla se poneštri i vrata od balkona aš ako ja moran naslišat tu bujicu besed ča ona zreče, ne moraju i si susedi. Onput san z njeje blizine maknula si oštri i tupi predmeti aš ž njun nikada ne znaš ča će va ruki popast i kamo će to zakramat. Tabletu za smirenje nisan dala njoj leh san persen popila ja aš i da ni ta utakmica durala kuliko j’ durala i da ni bila napeta kako j’ bila, sedno trebe to potrpet. Kada san načinila se te pripremi, magari san ja mislela da san, počela j’ i utakmica.

Avah je mane, komentator poveda, a ona kljanje sudca i ne fermiva. Dotaknula mu se je ne sedmoga kolena leh sto i sedmoga, a kad je njejemu Lukice dal žuti karton onput mu j’ izrekla smrtnu presudu i to va najgoreh mukah da bi skončal da ga ona ćapa. Prestrašno j’ bilo to naslišat, ma san, poučena dosadašnjen iskustvon, trdo mučala da ju nedaj Bog još već ne razjadin. Ma ni to ni bilo dobro aš mi je rekla da san kod testo, leh da sedin ko mara na kapuzu i niš ne tendin, i da kakovo mrtvo puhalo je ona rodila i ča ja znan ča se ne. Rekla san da ja se proživljavan va sebe i da nismo si isti, na ča je ona leh mahnula z rukun i nastavila karanje z sucon, sen Nizozemcimi, kako z onemi na terenu tako i z onemi na tribinah, a da j’ rasist, to san van već rekla, ma van nisan rekla kako j’ ov put, valjda da ja ne ponemin skroz na skroz, neki igrači od Nizozemske nazivala ne šparhetimi kod dosad leh je govorila »vidi ovu škuribandu«. Verovali ale ne, ja to smatran velen napretkon.

Kod ča moran reć da j’ rasist jedino kad gljeda utakmicu inače nima niš protiv nikoga, baren ne doklen ju ne razjadi, a onput ne abada ni na kolori, ni na porjeklo. More njoj bit najbliži, ona oplete. A za to san ja najbolji primjer. I ntanto, kada smo obadve već mislele da smo dobili, ona bila sa kuntenta, a ja odahnula od silneh strahi, ti sakramenski Nizozemci su dali gol. Majko Božja od sedan žalosti i mane osme, moja kardinalna greška je bila ča san, misleć kako j’ se finilo, njoj dala puding da sled pocukera pobjedu. Kad je zazijala, zakljela, zamahnula – ta puding je finil na mojoj glave. Ne znajuć ča ću, počela san se smet, a ona ne znajuć ča j’ načinila, a misleć da se smejen kako smo ježeve srići, počela j’ tako zijat na me i delit mi ono ča jedna pristojna starica ne bi zgovorila va sto životi. Kada j’ videla, počela se j’ i ona smet i govori – ča ne paziš! Ni na to nisan reagirala, aš kakove koristi, šla san se oprat i vrnula se na poziciju. Ona j’ kod napeta puška čekala produžeci, a kada smo dali gol, njejoj sriće ni bilo kraja. Onput je vane opalila petarda, ma z nekuliko minuti zakašnjenja pa j’ rekla – ov je ili pozabil kade j’ klal petardi ili je bil na kondotu.

I konačno je finila ta utakmica, ma ni ona šla spat. Uredno j’ odgljedala se ča su ovi va studiju imeli za reć, dakako i š njimin se jedan bobić karala, a onput se j’ konačno stala da gre leć. Mane j’ rekla – ča ti čekaš, jutra te dragi Bog do polna neće moć stat i prošla. Jutra j’ nova utakmica, ja delan pa ću se sen silami trsit da ne finin doklen utakmica ne fini aš to je jedini način da preživin. Kada j’ čula da gre presjednik va Roterdam leh je pitala – po ki kljinac?

Naravno da bi ona rado šla namesto njega pa je i on, ni kriv ni dužan pobral i ča ga gre i ča ga ne. Ako mu se avion pokvari, to ga j’ garant ona šundrala.