Od kada je čula da su va Hormušken tjesnacu na zarobljenomu brodu i naši dva pomorca, moja mat nima mira. A kada ga ona nima, onput ga ja iman još manje. Do maloprvo smo učile zemljopis, odnosno ja san morala nać atlas, povećalo i strpljenja pa njoj pokazat kade j’ to aš se ča j’ dalje od Zadra, bilo na moru ale kopnu njoj je nepoznanica. Prvo i osnovno pitanje glasi – kuliko j’ to dugo od nas? A mjerilo dužine nisu kilometri leh kuliko ti vrimena rabi da z auton ale avionon dojdeš do tamo. Kad ja rečen kuliko, na njoj je da ocijeni je dugo ale j’ blizu, i moren van reć da me te njeje procjeni ki put do suz nasmeju. Recimo kad reče – ja prvo pet put hodeć dojden do Hreljina i nazada leh ti z auton va ta Zabok. Intanto, kad smo dokončale udaljenost Hormuškoga tjesnaca za koga j’ rekla da i ni tako dugo od nas, ma kuliko joj ja tvrdila da ni ni blizo, onput je počela štorija o ta dva jadna čovika ki jidu kruh sa sedan kor i jadnemi njihovemi familjami ki jih na more odbavljaju, pa čekaju će njin jih more vrnut. Pa se j’ domislela na naši Višnjevarski pomorci i na sako Pomorsko večer ko smo po pundeljku naslihali kako bi znali kade su i kamo gredu. Od Boga srića da j’ jedan va penzije, a drugi na platforme na sjeveru pa nisu va Hormuškomu tjesnacu. Kad san njoj rekla da ne znan skuda su ti dva naši zarobljeni pomorci, rekla mi je da kakov san ja to novinar kad niš ne znan. Va njeju glavu ne gre i ne gre činjenica da naši ljudi plove na stranemi brodi aš njoj još vavek postoje leh naši brodari.

No ča je – tu je, a tu je ta drugi dan njejeh 90 let, a va moju glavu nikako da ujde stvarnost ka govori da j’ ona se veće dite, a ja se veća starica. Ki’vo dan se karamo aš ona neće i neće za obed niš leh juhu. Ja njoj objašnjavan da čovik mora jist i meso ki put, i verduru, i voće, a ona me gljeda i govori – ki j’ komu mat, ti mane ale ja tebe? Neću meso i šlus! Počela san se smet aš mi j’ spred očij proletela slika od prvo pedesetak let kad je situacija bila obrnuta i kada j’ ona mane silila da pojin bilo ča zelenoga, aš da ne moren jist leh meso. I to pohano. Govorin njoj česa san se domislela, a ona mane govori – vidiš kako ti Bog vrnja, samo nemoj ti mane sad po rite kod ča san ja tebe. Onput smo se obadve nasmele, ona od srca, a ja fanj kiselo. Još mi govori kako san odvavek za jido bila zvicijana i nevaljata. Ni pozabila ni spomenut kako j’ pokojni otac dva puta moral posejat blitvu i špinat aš dočin je nikla ja bin se po noće stala i se popukala. Kad su dokončali ka to štetočina dela, štetočina j’ dobila po rite i još više mrzela se ča j’ bilo zeleno va pijatu. Za salatu da san vavek govorila – nosi to Ivovoj Jagode, aš travu jidu krave, a ne deca. I se tako dokle j’ lamantirala kako ni Iva, ni Jagode već ni ja san njoj komadić po komadić mesa rivala va pijat, a ona je va žaru povedanja pozabila ča klada va usta i lipo smo imeli jedan zdrav obrok bez karanja. Aš ako ju ne moren po rite, još vavek ju moren prevarit. Ne uspijen saki dan, ma nekako već da leh ne.

Ono ča j’ bitno je da ja uz obed vavek moran imet i pripravnu štoriju. Verujte da j’ lagje pripravit obed leh štoriju aš neće se na saku upecat. I kako normalni ljudi po internetu išću recepti aš ki će saki dan mislet o kuhanji, ja išćen štorije, pa san na fejzbuku našla da j’ prvo 67 let, ča će reć točno 12. četrtoga 1959. z šilarske luki put Crikvenice isplovil prvi trajekt va ondašnjoj države i da se j’ zval Bodulka. Kad san se ja rodila, znači 1964. leta uspostavljena je i druga trajektna linija. Ona Črišnjeva – Voz. Na prvoj se nikada nisan vozila, na ovoj drugoj san i toga se domišljan, ma ja san manje važna. Važna j’ mat ka se j’ peljala z obadve i z obadve ima svoja domišljanja ka će, doklen bude rogoborila da neće niš leh juhu, podelit s manun, a ja ću njoj dok mi bude povedala kako j’ jedna ženska z Bodulke skoro va more pala i kako san ja na Črišnjeve na vas glas pjevala »Hitala je Mare pešćaci va more« opet va pijat klast ono ča neće, a ona će pojist da ni ne primjeti. I da ni Tito kad je rekal – snajdi se, druže – bil va pravu. Drek ni. Jednoga dana, kad prestanen bit lena, sest ću, napisat ću i izdat kuharicu. Ma ne recepti leh štorij za decu čigovi roditelji se već postaju deca.