Ako mi neki leh još jedanput spomene ta sakramenski dron, bespilotnu letjelicu ale kako se već zove i počne palamudit je imela naoružanje ale ni, verujte, ako mi bude blizu ruk ale nog, neće pasat dobro. Ma, briga me, je i ako je, ča je nosila, objasnite vi nan običnen ljuden kako se j’ opće moglo dogodit da dojde do Zagreba. Mrzin kada me neki dela monun veću leh san, a si ovi naši stručnjaki i političari jušto to delaju celoj nacije aš to z naouružanjen ale nenaoružanjen, ta njihova nazovi karanja nisu niš drugo leh – obrni pilu poznopak pa narod neće puno pitat.

Ono ča ja pitan je ča se j’ dogodilo zdravstvenomu sustavu kad ljudi dva dana nisu mogli do recepti, pregledi, dohtora. Jedino ča znan je da san dva put zabadava bila va apoteke, da me uho boli za krepat i da prez recepta ne moren ni do kapi, ni do antibiotiki. Pu dohtorice mi ni napamet ni palo poć, aš moren mislet ki j’ njoj i semi dohtorimi bil kažin. Eto ti ča j’ tehnika, ma ni ga do lapiša i karte. Uho me i dalje boli kod sam vrag, ma baren se j’ sustav digal pa ćemo nekako. Ono ča se opet diže su broji oneh ki su oboleli od korone. Ta vranić nikako da pomola, a kuliko iman videt i čut, baš ju jako ne pojida ni ki j’ kuliko put cepljen, ni docepljen, a ni to je već ale ni imel koronu. Intanto, nikada kraja š njun.

Dižu se i ceni sega i sačesa. Čitan da će pinka beloga kruha bit petnajst kun. Avah je nan, to zgljeda katastrofično, koda ni kruha nećemo imet, a kruh, nema veze je beli ale je črni, osnovno j’ jido za sirotinju. A ne bi me začudilo ni da se črnomu i belomu kruhu dogodi ono ča se j’ dogodilo dizelu i benzinu pa da črni bude skuplji leh je beli. Ne moran van ni reć da osin ča vozin dizela, volin i črni kruh. Kako stvari stoje, vozit neću niš aš govore da će bit nestašica dizela pa ću pokla ki zna kuliko let dokončat zač ljuden služe nogi. Kulika mi j’ to trauma najprvo ću van objasnit ako van rečen da san ki’vu noć sanjala da se ukrcevan va bus, a da ne umen ni kartu kupit. Sa san se potna zbudila aš se to ča san sanjala je živa istina. Sran me je reć, ma ja zbilja ne znan okol busa niš osin na prva vrata poć nutar. Znan da bin se brzo navadila, aš gospa muka na se nauči, ma sedno… Mat mi je, kada san njoj povedala san rekla da san nesnaga bahata aš da mi j’ pokojni otac celi život na delo i z dela, i kamo god hodil z buson i da nikada ni zanjurgal ni zato ča ga čeka, ni zato ča bus kasni, ni zato ča j’ poskupela karta, ni zato ča pokle po dve smeni ča j’ va Luke odelal mora va busu stat od Riki do Krasice… Zaključak njoj je bil da san niš koristi, a to san zato aš su mi auto kupili dočin san finila srednju, i zato aš nju ni niki naslišal kad je govorila da neka mi ga ne kupljevaju, neka si ga sama kupin kad za njega zaradin. Niš nisan rekla, baren ne na glas, a va sebe san zahvalila dragomu Bogu ča mi j’ dal oca kakovog san imela.

Rekla san da ću poć na Jožehovu, ma nažalost nisan mogla aš san imela delo. Čula san da j’ bilo lipo. Morda dospenen va Takale na onu radionicu od suhozidi, ma neću niš napred govorit aš san otela i va Dolčinu poć tići naslihat i gljedat pa san drek šla. Rado bin navadila ti zidi gradit aš kuliko san videla fanj mi ih se po Višnjevice zrušilo od kada ni oca, Iva i barbića ki su saki kamik dočin bi pal nazad kladali. Govorin i to matere, a ona onako sa srdačna i tepla kakova je odgovara – namesto ča si okolo klatila i mlatila mogla si zidi š njimin delat, ma tebe ruki od dela poznopak stoje. A kada smo već pu Takal, kuliko si već puti tamo bila za napisat mogla si ča i navadit, ma lagje j’ dignut olovku leh je kamik. Zato ne matači nego hodi popeglat on vagun robe. Rekla san njoj da se danaska roba ne pegla leh se dobro rastrese, šegavo obesi, a onput kad se znimlje još šegaveje posloži i da ako njoj se ne pijaža to ča govorin zame peglu i pegla. Njeji odgovor ne želite čut kod ča ja ne želin ni čut, ni pročitat niš z črne kroniki aš črnila mi je ionako već preko ušij. More bit me i bole uši od toga ča čuju leh grdo, a niš lipo. Hm, se j’ moguće. Pogotovo kada san ja va pitanju.

Ča se tiče menjanja kun va euri, baren z ten niman problem aš kun niman pa niman ča ni menjat. Eto, sad mi j’ lagje – jedan problem manje.