Komać san dočekala ovu predizbornu šutnju, dan kada si muče, i oni ki se natječu, i oni ki zibiraju aš to j’ već bilo za sen sega preveć. Si su predstavljali sebe, listu, pa i sebe i listu, namaljali i obećivali, leteli od simo do tamo i povedali, povedali i povedali. Me par da su neki bili i va mestimi za ke nikada prvo nisu čuli, a kamo da njin je noga tamo kročila. Delili su sega ljuden, dakako – na besedah, a i jedan drugomu, ma to zaspraven. Ki put mi ih je bilo neugodno i naslišat. O društveneh mrežah da ni ne govorin. One su pak pravo mesto kade moreš sakomu se reć, a da ne odgovaraš.

Ma, se je to niš drugo leh politika. Uostalon, ča su rekli – rekli su, a jutra ćemo znat ki j’ najbolje iskoristil ovo predizborno vrime. Ja bin van sad rekla ča j’ za ovi izbori prognoziral moj vidoviti Dražen, ma ne smen aš je vrime od izbornoga mučila.

Zato ću van povedat kako san bila na Žabarskoj noće i to pokle čuda let. Zakasnila san na prijavu pa se ni ov put nisan natjecala. Ako Bog da ću drugi. Intanto va ta lokvarski Dom Žaba narivalo se j’ čuda ljudi. I fanj oneh ki su se ogledali na žabodromu. A kada smo već pu žabodroma, onput moran reć da san ostala pomalo razočarana aš su se modernizirali pa već ni onoga ča se z plafona spušća dole kad je skakanje, a kad je tanac se sopeta diže gore. Ov moderni je na kolimi pa se po potrebe more vozit po celoj dvorane. Ni bilo ni one ploči na koj su kredun pisali ime žabe i kuliko j’ skočila pa san malo bila na čudu aš ki će se to pomamtit, a bilo bi jako nepristojno nos rivat va harti od gospe ka zapisuje. Na se drugo niman nikakovu primjedbu.

Drago mi je ča j’ žabac Jura najdulje skočil aš san za njega navijala, i drago mi je ča j’ va Lokvami feminizam na visokoj razine. Sad se pitate zač. Pa zato aš kad zmed skoki počne tanac ženskice ne čekaju da njin se muži, dečki ale prijateli odlepe od šanka, one lipo gredu na podij i dobro se zabave. Nisan jila žablji kraki aš to mi moja Žaklina nikada ne bi oprostila, nisan dočekala koncert od Vani aš je mane puno draži »kućni bend« ča će reć Homer i nisan igrala tombulu aš san prelena da stojin i čekan va redu. Verujte, red je bil fanjski. Ono ča san je – lipo se zabavila i organizatoron naklon aš je se štimalo kod švicarska urica.

To ča se žabican ni baš dalo skakat, a još manje dugo, a ča reć leh dojde i čoviku i blagu. Mane j’ važno da su natjecateljice vrnjene va prirodu, odnosno da nisu finile va pijatu.

A sada jedno pitanje – da vi znate zač je pasani četrtak padal daž? Sad ćete si reć – zato aš mu se j’ padalo. Ma ne, ne. Padal je aš je moja roditeljica tuliko digla nos da j’ š njen rasparala si oblaki na nebu. Razlog – za Majčin dan je dobila buke rožic, ni više ni manje leh od njoj najdraže gospe Kolinde Grabar Kitarović. Vi ne morete zamislet to veselje. Retko ona ostane bez teksta, ma ov put je. Ma, ča zaspraven mi je to ona lipa malica poslala? Domislela se je na me?

Čekaj, moran se posest. Pa se j’ i posela i onput je počelo – prepametna, prelipa, predobra, vredna, lipo odgojena, saka njoj je vavek na mestu, pošteno gromiško dite, blazi onomu čigova je… Morete i sami dokončat kako j’ se to finilo. Tako da san ja se ono suprotno aš ja se nisan ni domislela da j’ Majčin dan, a gospa Kolinda je. Uza celi svit ki mora obać, uza se delo ko ima domislela se je na jednu staricu ku nikada ni videla ni. Moren van reć da me j’ malo i sran bilo pa san njoj udovoljila sakoj želje. A želje su bile da najden najlipju vazu i kladen njoj buke va kamaru tako da njoj se ne dimi doklen ova nesnaga – to san ja – fuma.

A i da ga vidi dočin se zbudi i da ju domisli kako na ovomu svitu još ima divneh ljudi. Eto, to van je ta štorija od rožic, a gospe Kolinde velo hvala aš mat, od kada j’ otac umrl, a tomu j’ već sedan let, ni pokaževala nikakovu radost do ov put. I za kraj, vrnimo se na izbori. Nedelju, govore prognozi, moglo bi bit i dažja, ča bi mnogi mogli zvuć kod razlog zač nisu šli na birališta, ma onput ti isti neka nose lumbrelu i š njun se štite od sega onoga ča njin se ne bude pijažalo pokle izbori aš ki ne glasa, ta neka ni ne njurga.