Najprvo čestitke – srićan Božić, i Stipanja, i Ivanja, a za Novo leto ćemo još malo počekat. Ča reć osin da san, kod i si vi – sita, napita i baren kilo teža leh ča san bila prvo blagdani. Kako i vavek, i ov put se j’ jilo koda se nikad ni, i koda se već nikada neće. Nikada mi ni jasno ča to ujde va čovika pa žere, žere i kad ga telo pita, i kada ga niš ne pita. A zna da će ga pokle i žulet, i žgaravičina i se ča već dojde kad se prežereš. Fala onomu ki j’ zmislel sodu bikarbonu, gastal i si ti drugi pripravki za požeruhi. Srića od Boga ča ne volin slatko pa baren se ne natofan z ten, ma da j’ neka utjeha – ni aš se to ja nadoknadin slanin. Si oni ča su se pojidali ako san našla patku, izvještavan – san i već od pol san je sama pojila aš pu mane doma si su već biljožderi leh su mesožderi pa se ne moran pojidat da će mi falet. I mlinci su fasovali, a dokle je se to još putovalo va trbuh, mi smo već povedali o tomu ča ćemo, kako i kuliko za Novo leto.

Dobro, sarma je valje usvojena i tu ni bilo nikakove diskusije aš ča ti je Novo leto bez sarmi, novoletnjega koncerta Bečke filharmonije i četire skakaonice. To koda si ostal va staromu letu. Problem je nastal okol toga će bit odojak ale janjac. Moji baš ne vole odojki, pa bi raje janjčevinu mada ni užanca, a ja bin najraje sopeta patku, ma to je zajedno odbačeno. Provala san i z puricun, ma i ta mi amandman ni pasal. Ni usvojen. Na kraju san bila bezobrazna i rekla da ako neće bit po moju, neće ni po njihovu i da će bit odojak. I šlus! Njurgali su, ma kako smo mi kod va Saboru, za jednu cikulatu san kupila glas i na novoljetnoj trpeze će bit praščina. Mlada, ma praščina! Onput je usljedila debata o količine. Matere se ispod tri kila ne igra, mane j’ jušto sedno, a tretemu mesa ni ne rabi pa j’ bilo po materinu. Kupit ćemo tri kila, kilo ćemo pojist, a one dve će se pohićevat da bi na kraju finile va smeti uz obavezno reć – ma smo objesni, zvicijani, bezobrazni aš kuliko njih nima ča jist, a mi se rashićevamo. Ma, da ja to rečen prvo leh se se to dogodi, a sako je leto – isto, bi mi rekli da se to tako ne dela, aš da nikada ne znaš ki će ti doć i da va našoj kuće nikada ničesa ni falelo pa da neće ni ov put. Zato j’ najbolje znat kad trebe zamučat. A, iskreno – niš slajega leh kad njin buden mast vadila z onun mane omiljenun ka glasi – ča j’ mane bolje govorit kad me niki ne nasliša. Ja bedasta, ja škrtobija, ja niš ne znan, ja ovakova, ja onakova, a vavek dojde na moje.

Na polnoćke nisan bila aš je roditeljica rekla da ju moren i na televizije gljedat, a ne poć med onu curmu ljudi ki va crikav gredu leh za Božić. I poč bin ja šla ako ne njoj gripičinu doma donest, tr da ionako ne bin naslišala ča plovan propoveda pa da mi j’ bolje bit tu kade san. A i da vane puca koda j’ treti svjetski rat pa da si oni ki gredu vanka moraju klast kacigu na glavu aš nikada ne znaš kad ti ča na nju more past. Rekla san njoj da mi, kuliko ja znan, kacige nimamo doma i da ću ja morat njeji bukaln nabandat na glavu ako mislin poć vanka. Poslala me je vrit i počela mašit kako leta su, a pameti ni i kako mi, kako i vavek govori za moje bolje i kako san telica ka nikada ne promisli leh celi život srlja i sega tomu slično. Onput san ja zakuhala pa san njoj rekla da neka slobodno reče zač se to govori, a ona j’ odgovorila – zato aš znan kakova si, najprvo ćeš se z onemi svojemi kod ča si i sama poć pričestit va oštariju, a va crikav ako dospeneš. Zato j’ bolje da ti budeš tu kraj mane, pa san bez brigi. Eto, to van je pogovor zmed materi ka ima 89 let i hćere ka ima 61. I kako ja moren bit normalna?

Uglavnon, nas smo dve imela tv polnoćku, onput smo još odgljedale i se vijesti na HRT4 da bi ona na kraju sega zaključila, citiran – se j’ to jedno velo niš. Si povedaju leh da povedaju, si skucaju da nimaju, a vidiš da se ima ako se tuliko za blagdani potrošilo, si se leh naslikevaju i se to skupa mi se niš ne pijaža. Nekada se j’ znal red, a danaska j’ jedan veli nered i ako tako nastavimo jadna nan palenta. Za pedeset let nas već neće bit.

I ča da joj rečen osin da ju volin. Se drugo nima smisla.