Pasanu šetemanu sega vranića. Na globalnoj razine ne zna se ki komu već rit bušuje, a drži figu va žepu, a na lokalnoj si su se na zadnje nogi digli i klepeću o prizivu savjesti. Ćete o onomu ki se tiče soldatije, ćete o onomu ki se tiče prekida trudnoći. Va soldati neću aš iman skoro pa dva put Isusove leta, a i da niman nekako mislin da bi ta priziv bil prvi odabir mada, za pravo reć – nisan baš ni od militarije. Ni za rodit nisan, osin za izrodit kakovu oslariju. Mišljenja san da saki ima va životu pravo odabira, onaj ki bi raje nosil metlu leh pušku neka ju nosi, a ča se tiče trudnoći, najbolje bi bilo da te s prizivom savjesti premeste na neki drugi bolnički odjel aš ako oni misle da imaju pravo na priziv savjesti, onput moraju shvatit da j’ druga stran svoga tela gospodar i tu ćemo finit z temi prizivimi.

A sad gremo još sled lokalneje pa ćemo se pozabavit z aferun čikulata, pa z aferun juha. Dakle, Iva. Astrolozi bi njoj prvo šetemanu dan rekli neš va stilu – očekuje vas vrlo intenzivan period, bit ćete u središtu zbivanja i vrlo prisutni na medijskoj sceni. I niš ne bi faleli. Se j’ počelo z čikulatun radi ke je gradonačelnica bila omiljena na društveneh mrežah. Zajedno su ju prozvali Seka, a i još sakako, a zapravo ženska ima pravo. Najme, celi život me uče da nikada ne ziman neš ča ni moje i celi život se toga držin. Vjerojatno su tako vadili i nju, pa nikakovo čudo ča j’ žena ponemela kad je videla da njoj je neki čikulatu sa stola ukral. I nikako da ovemi nekimi okol sebe objasnin da ni tu stvar čikulate i vrednosti leh jušto kako j’ gradonačelnica rekla – povjerenja. Govore mi – tr njoj ni niki muža ukral, tr njoj ni niki zel takujin, tr joj ni niki zel bankovnu karticu, leh čikulatu. Pa, ni stvar va tomu ča njoj je neki zel leh va tomu da njoj je zel, a sad je drugi par rukavi je za to trebela tata prijavljivat etičkomu povjerenstvu ale ne. Da san ja bila na njejen mestu, zvala bin toga istoga i sega mu zdelila, i niki ne bi znal, ali nismo si isti.

Z druge bandi razumen aš kad mane neki zame kemijsku, a još huje – običnu olovku sa stola, ja celu redakciju obrnen doklen ju najden, a kad ju najden jadna palenta onomu ki ju je zel. Ne rabi mane povjerenstvo, leh jedan ki će me držat da ne ubijen sirotu ka j’ zela kemijsku, a da ni ni abadala ča j’ napravila. Kad etičko povjerenstvo obavi svoje, morda ćemo doznat je tomu ki j’ zel čikulatu cukar pal, je mu ta najdraža pa ni mogal odolet, je bil lačan, je more bit kleptoman ale je jednostavno tat. I se ja tako mašin okol toga, a javi se jedna od kolegic i govori da j’ vrlo zanimljivo kako ni Obersnelu, a ni Filipoviću nikada niš ni prifalelo. Trudila san se mučat, ma nisan izdržala pa san njoj rekla – Obersnelu i da j’ neki ukral čikulatu, od oneh deset ke j’ saki dan imel sobun, ne bi primjetil da jedna fali, a Filipović je tuliko retko bil va uredu da mu j’ čikulata i osatala doklen bi drugi put došal bi pozabil da ju j’ pušćal na stolu. Naravno da su mi rekli da san bezobrazna i da san fan od Rinčićke. I na to san imela odgovor – nisan ja ničigov fan, samo mi greste na živci i na faks, kako bi rekal Franci Blašković. Ako me razjade, poslat ću pismo Rinčićke i ponudit ću njoj uslugi čuvanja slatkoga, neće joj rabit više povjerenstvo. Najme, tuliko ne volin se ča ima cukara da s manun more bit sigurna i da j’ vlasnica slastičarni, a kamo gradonačelnica.

Sada Iva – drugi put. Ov put radi toga ča j’ stala na stran roditelji ki su se pobunili aš njin deca va vrtićih ne dobiju juhu. Da brižna lačna doma dohajaju, a oni obed plaćaju. Iva j’ zela stvar va svoje ruki. A, ne ni šla kuhat juhu, aš to ni njeje delo leh je zakuhala sen onen za ke misli da su odgovorni radi nastale situacije. Naravno da j’ sopeta bil pogovor va redakcije i sopeta su bili oni ki su pljeskali Ive i oni ki su rekli da ti roditelji nisu normalni ča se izvoljevaju.

Va vrtić nisan hodila, dece niman pa san se držala dugo od diskusije, ma moran priznat da san se od srca nasmela kad je jedan rekal kako j’ se to za bez veze, aš da deca ionako ne vole juhu, da njin je maneštra zdraveja i da j’ mu j’ već dosti teh zvicijaneh roditelji. Ja bin zabranil vrtić, juhu, decu, roditelji, a Miška bin iselil aš ni mačke mesto va poglavarstvu. E, tek pokle spominjanja Miška nastal je pakal. Tek da se zna, ki j’ na vrhu piramidi.