Znan da van prsti još diše po odojku, da van je krcata padela sarmi i da van se slatko pohićeva z leva na desno i poznopak. Znan da ste, kod i ja dobili ki gram, da ne rečen ko kilo i da ste već pozabili da j’ ikada na oven svitu bila 2025. Ono ča ne znan i ča niki ne zna je ča nan nosi ova ka j’ došla, mada se si skupa ufamo va bolje, pošteneje, ljudskeje i zdraveje.

Ča će od sega toga bit, ako Bog da i budemo živi, znat ćemo kad njoj vrit budemo puhali. Ono ča još znan je da mnogi čitaju si mogući horoskopi ne bi li videli ča jih va 2026. letu čeka.

Da van skratin muku, a sebe da ubijen monotoniju šla san malo poćakulat z gospun Umjetnun inteligencijun i pitat ju ča se njoj vidi ta 2026.

Krenula san od zračneh znaki (Vodenjak, Dvojki, Libra). Zač? Zato aš san Vodenjak, a Bog je najprvo bradu sebe storil. UI govori da će zračni ale arijski bit va sred vele »digitalne renesanse«. Za si vodenjaki ovo će bit leto velih suradnji i društvenoga napretka. Baš malo mislin z ken bin mogla va suradnju. Da će bit predvodnici novih trendi i tehnologije. Valje gren vlasi popiturat va si kolori, posest se va raketu i poslat na Jupiter. Ako me ni – tamo san ustala. Dvojkon da ovo lete donaša velu ličnu transformaciju. Ne znan će njin nogi poć vajer, a glava na mesto nog ale ča drugo, ma tako piše. (Gljedan malo va kolegu Bobota, ma zasad mu je se na svomu mestu – baren ono ča se vidi.) A piše i da će imet soldi, mada moraju jako pazit da se ne preračunaju. Libru gospa UI naziva jednen od najsrićnejih znaki va ovomu letu, ča znači da jih čeka nagradno leto, silne šansi za prilike i se tako slično. Va ljubavi će njin isto se cvetat kod i va takujinu. Još da će i putovat. Srce ti, moran paronu kuglu okol nogi zavezat.

Za zemljani znaki (Bičina, Divica, Prč) piše da će konačno bit stabilni. A bit će da su se do sada preveć klatili. Soldi da će imet i već leh njin rabi, mada mislin da ne postoji čovik ki će reć – hvala, neću više, iman dosti solad. A uza to ča imeju da će njin se opret i nekakovi alternativni pravci za zaradu. Leh neka se ne zaigraju i ne fine vrešt. Biki će imet i pun takujin, i punu postelju aš i va ljubavi njin je 2026. top topi. Malo manje da jidu pa će i zdravlje bit fantazija. Za Divice da će ovo bit leto »profesionalne ekspanzije i širenja vidika«. Srce ti, pa moja prijatelica i kolegica Fufi će videt do Biskaja i nazad! Da će vadit neku vještinu ka će bit popularna 2030. leta pa si mislin, sigurno će se bavit poljoprivredun aš do onda nećemo imet ča jist pa će ratar bit najpopularneje zanimanje. Za ljubav baš neće imet preveć vrimena. Prči da će bit fokusirani jušto na ljubav. To da te njin bit glavna preokupacija. Delat će fanj – decu, kući, vikendice i slično. Neće baš bit za društvo. A i kako će ako moraju delat se to ča j’ Umjetna napisala.

UI za vatreni ale gorući znaki (Praz, Lav, Strijelac) govori da njin gre leto za tambaškanja z šupoga va prazno ča će ih dopeljat do intelektualnog proboja. Srce Isusovo, pa oni će si va političari! Ki će to hranit, ionako ih je preveć. Intanto, prazi će bit vječito na putu i vječito na nekakovih pregovorih. Putovanja da će bit kraća ma će donest dobru zaradu. Jedina opasnost je njihova zajičina ka ih more koštat. Lavi da će procvast kroz društvene mreži i tu vrstu komunikacije. (Sad baš zamišljan moju roditeljicu na Tik-Toku.) Ovo leto da njin sinjeva početak dvanajstoletnjeg srićnoga ciklusa. Pa, čestitan! Strijelci da će bit obrnuti partneru, da njin kreativnost doseže vrh i da pripaze na zdravlje da njin se ne bi dogodil burnout, ale po naši – da ne bi šli fuć!

I na kraju voda (Ribičine, Raki i Škorpioni). Njin da će 2026. leto bit, ča bi Crnogorci rekli – iđen, ležin! To znači da će uz malo truda dobit se. Ribi da će doživet duhovno bujenje (moj prijatel Cigo bi najprvo trebel zbudit telo pa onput duh). Od njih se išće disciplina i strpljenje, pa će se bit tip-top. Rakimi da će ovo leto bit leto emocionalnog reseta, profesionalnih priznanji i mogućnost stvaranja profesionalne ostavštine. (Srsi me prohajaju misleć ča će smislet moja glavna urednica.) Predstoji njin i preseljenje ale renoviranje doma, a za zdravlje piše – otpustite strahove. I na kraju škorpioni. E, oni će va sebe zbudit ono duhovno, va takujinu imet fanj soldi, a va srcu retrogradnu Veneru, ma ča to značilo.

To van je to, a vi si zamite ono ča van se pijaža, ono drugo pozabite. Gospa UI, a još manje ja, ne primamo reklamacije.