Ki se j’ va Kostrene kupal gol – kupal se je, aš me par da već neće. Najme, na sjednice općinskoga vijeća povel se j’ pogovor o ćudoređu. Aktualni sat i za nasmet se, i za zabrinut se, aš kad čovik malo bolje promisli, ne zna ča bi rekal. Ja se ne kupan ni va kupaćen, ni prez njega, aš se ne kupan, ma nekad san se i zbilja mi ni pačilo ako se j’ na istoj plaže kade san bila i ja, neki sukal va toples. Mojemi muškemi prijatelji još i manje. Sad dohajamo do onoga da se goli ne bi smeli kupat na plažah kade ima puno dece. Nekako mislin da se oni ki se vole pospojit z prirodun ni ne kupaju va mase, leh se maknu na kakovu grotu ale neko osamljeno mesto.

Zbilja, va životu nisan videla da se j’ na javnoj plaže neki kupal gol golcat aš da i je – brzo bi ga ovi obučeni poplašili. Ono ča mane brine već od goleh su oni obučeni ki slikevaju dečicu i pokla šalju te sliki jednako tako va glavu bolnimi kod ča su i sami. Roditelji se trebaju bojat barbi z urun na kameru, oćalimi na kameru, olovkami na kameru, a ne goleh cic i guzic. Cici i guzice njin niš neće načinit, a ovi drugi će.

Intanto, nudizam pu nas ni niš novoga. Kuliko ja znan, još va Jugoslavije smo po tomu bili jako poznati. Imeli smo vagun teh plaž na keh piše FFK, kampi i slično, i pol svita je gole riti banjalo i sunčalo jušto pu nas. I nikada nisan čula da se j’ zmed te golotinje neš grdo dogodilo. Ono ča znam da su se birele misice nudizma i da obučenemi ni bil dozvoljen ulaz va ti kampi. Za plaže ne znan. A kada neki spomene nudisti, prvo ča mi pade napamet je načelnik Primoštena šjor Stipe Petrina koga su razapeli aš ga je neki snimil gologa va barke.

Legendarna j’ bila njegova reakcija. Čovik je lipo rekal – je ovo moja barka, je ovo moja rit, je ovo moja žena i koga briga san ja gol ale obučen va svomu i sa svojun. Nikoga ne ugrožavan.

Mislin i da i ti va Kostrene ča se goli sunčaju po grotah ne ugrožavaju nikoga, a isto tako mislin da Kostrenjani imaju pravo odlučit će goli ale će obučeni na svojemi plažami. Oni su šefi od svoje kući, a si mi drugi moremo i ne moramo dohajat tamo na kupanje. Već sada zamišljan referendum za gole cici i guzici da ili ne va Kostrene.

Tu neki kolege govore da bi rabilo toples dopustit mlajemi od 40, a ja si smiron mislin kako su zaspraven bedasti aš ne određuje lipotu ženskih cic ni genetika, ni starost, leh soldi.

Ki ima solad za plastičnoga kirurga more imet vagun let, a najboljedržeće cici na plaže. Isto vredi i za rit. Tr moj paron uža reć da su ženske najveći zagađivači prirode bar ča se plastike tiče i da će va budućnosti arheolozi po cimiterih nalazit leh plastičnjači pa njin neće bit lahko ocjenit kuliko let imeju, ma da će po broju plastičneh dodatki, umetki i slično znat komu su staležu pripadali. Leh mu odgovorin da j’ morbidan i finimo raspravu.

Ma, da se mi vrnemo na početak.

Ako Kostrenjani dokončaju da će njihove plaži bit va kupaćeh, a ne prez njih, mane zanima kulike će bit kazne za ti neposlušni, a još već ki će te kazni naplaćevat.

Nekako mi se čini da će bit fanj dobrovoljci, a ja se već sada pu glavne urednice bilježin kod ona ka će delat reportažu pod imenon »Jedan dan z kostrensken odredon za ćudoređe«.

Sada kada smo finili z golotinjun, homo na jido. Ki’vo dan se j’ va redakcije povel vrlo zanimljiv razgovor o inovacijami va tradicionalnoj primorskoj kuhinje. Govori moj prijatel Dražen »ma, ča j’ sad pak ovo, da jota va sengviću. Srce Isusovo, pa to bi mane na se strani kapalo i padalo«. Govorin – pa komu ne bi, a onput se jave oni drugi ki govore da j’ to super ideja i za čas – zijanje, nadglasavanje i smeh.

Onput je neki spomenul palentu i finger fud, a Dražen zija da smo mi odavna imeli finger fud, ja zijan da mi ni lipjega od jist z prstimi i da se ča moren tako i jin.

Jedna se javlja da ako nisan znala smo već davno zišli z srednjega vijeka i da ona i palentu ji z pirunon i nožen, Dražen njoj govori – i nonić ti je tako jil, a za kraj sopeta Kostrenjan – Bobo, ki j’ za se one ki prate aferu uspravnoga miša konačno i dobil toga istoga uspravnoga, govori da on ribu ji z pirunon. Va čudu ga pitan – zač? A on odgovara da mu ruki pokle ne bi smrdele. I onput se ja čudin ča Kostrenjani neće golaći, pa očito j’ da su čistunci parekselans.