Finile su Zimske olimpijske igre va Italije, a za me koda ih ni ni bilo. Baš malo mislin da osin neš sitno samoga opiranja, par večeri klizanje i ono ča bin čula na kakovomu Dnevniku ale vijestimi, drugo niš nisan ni znala, ni abadala. A ča j’ najžalosneje, oveh »zoic« ću se spametit leh po jednomu bizarnomu podatku koga san čula, sopeta va nekakovoj informativnoj emisije va koj su rekli kako su Talijani nespremni dočekali olimpijci. Mislin si – eto ti opet dreka okol toga da nisu dobro zračunali kuliko vrhunski sportaši moru pojist pa su i ov put ostali lačni i već mislin kako su njin preveć dali pašti salse, a premalo mesa, kad ono – šipak. Problem je bil sasma druge naravi – nisu računali da vrhunski sportaši imaju i vrhunske seksualne potrebi pa su nabavili premali broj kondomi. I onput je nastal veli problem aš i va sportu vredi ona – kad telo pita, daj mu. Najsmešneji mi je bil jedan prijatel ki j’ rekal da bi mu najbolje bilo zet godišnji, kupit kondomi i odbavit se va ta olimpijska sela. Rekla san da bi on sigurno bil osoba ku se najveć išće tamo, a da bi va povijeste ostal zapisan kod prvi diler kondomi. Altroke hašiš, marihuana i se ono ča uza to gre. Zaspraven, ideja mu i ni bila loša, ma kakov je, vjerojatno bi su tu zaštitu sam potrošil. Intanto, ako za devet meseci va sportskomu svitu nastane veli »bejbi bum«, onput će za to bit zaslužna Italija. Ni dugo, pa ćemo videt.

Finil je i pust. Već se ni ne domišljan da je bil, ma on isti ki bi dilal kondomi, rekal je da bi i na pustu, sakoj grupe uz tabelicu rabilo dat i kondomi. Mišljenja san da bi sakoj grupe, prvo leh krene va povorku rabilo dat da puše, pa ako alko-test pukaže već od 1,5 onput šnjun na kraj povorki doklen se ne otrezne. Jedino ča me j’ strah da bi va tomu slučaju povorka namesto devet ur durala devet dan, a morda i već od toga, pa na ovoj ideje još moran podelat. A ča se tiče maškaroni i kondomi, još davno su naši stari rekli – pusni špasi katarinski faši. Poznan fanj njih ki su »deca« te poslovice, i kad malo bolje razmislin – saki od njih je na svomu mestu – dobri, simpatični, vredni i veseli ljudići. Zato, maškare, množite se, to j’ znak da ćete imet dobru dečinu, a i garancija da nan ta običaj neće poć mater ženit i zgubit se va globalizacije.

Finila je i zima, me par. Gljedan ljudi po ceste, već su napol sučeni i mislin si kako on moj spomenuti prijatel, čovik poduzetnik od kondomi, z veseljen trlja ruki, aš njegova pjesma života je »Djevojke u ljetnim haljinama volim«. Takoveh još ni bilo videt, ma vjesnici ljeta va kratkeh rukaveh bome je. Će nan marač zapaprit ale ne, hodi ga znat. Nadan se da ne, ma ne radi onoga ki voli letnje halji, leh radi oneh ki imaju voćnjaki i vrti aš ni hujega od toga kad se stabla počnu budit, a marač oplete. Govori mi svekrva, da već davno ni na place videla tuliko ljudi. I oneh ki prodaju, i oneh ki kupuju. Da su banki bili puni sega, se da j’ bilo va lipeh kolori, ljudi da su bili nasmejani, a rožic… Seh vrst. Da se tako lipo proliće ćutilo da va zraku. Još kada j’ videla šparogi… I tu san ju prestala naslišat aš mi je zajedno napamet palo se ono ča me čeka do petoga meseca. Ča? Avah je mane, ki će sad saki dan naslišat onu novolistovsku Družbu od šparog. To će bit govora leh o tomu, kakovo će vrime, kade ih je, kade ni, ki j’ videl kašku, ki j’ pal, ki se popiknul, kuliko j’ ki nabral, ča j’ ki od njih pripravil za obed, večeru… A o tomu kuliko j’ ki na sebe našal krpuš i š čen se j’ najbolje našpricat, namazat ale obadvoje da te ne napadu, o tomu da ni ne govorin. Majčice Božja, ki će to zdurat. Najprvo da ću poć va prvu ljekarnu kupit čepići za uši, neće bit druge.

I na kraju, homo dve – tri od korizmi. Ovo leto se manje j’ oneh od keh san čula da va korizme neće ovo ale ono. Jedan kolega je rekal da se j’ va životu već radi oveh ale oneh razlogi, ča zdravstveneh, ča financijskeh, tuliko toga odrekal, da ne zna ako bi mu telo podneslo još ko odricanje. A moj kolega Bobo, to van je on isti ča stalno ima problem z mišon, on ki j’ od glavne urednice iskal da mu nabavi uspravnoga, pa usput rečeno – ni ta mu sada ne valja, on je imel najbolje odricanje. Ma, ne neće se va korizme odreć miša leh je rekal da tri dana neće ni podihat alkohol. I to 29., 30. i 31. febrara. Ča reć, leh – ne moreš protiv Špažićara, ta se vavek snajde.