Čestitke Irene, i ovako napismeno i javno. Ta maletina ne da ima stas, ima Irena i altroke glas
Ja, dobro govorite – ova se j’ pasanu šetemanu odjavila i napisala da gre na ferije, a sopeta nemi. Ča van reć osin da čovik snuje, a Bog određuje. Intanto san tu, napol živa aš trebelo j’ preživet to mikovsko kampananje. Saki onaj ki j’ jedanput bil na MIK-u ale blizu mikovci zna ča j’ to. A to je – nemilo do pakla i nazada. Da ne bi bilo zabuni – kad rečen nemilo, to j’ va pozitivnomu smislu. To van znači da se kanta, sope i tanca od 24 ure baren njih šešnajst. Va ono preostalo vrime neki sled zažme, a oni mlaji i va snu hopsaju. Fala dragomu Božiću, ovo leto je va karavane bilo vagun mladeh – i oneh na pozornice, i oneh zad pozornice. Da j’ va Lipoj Našoj takov prosjek, kade bi nan bil kraj. Tuliko ča se tiče starosne dobi na MIK-u, a sada gremo na konkurenciju. Sopeta ću počet z mladosti i reć da j’ ova mikovska bila i ča se tiče izvedbenog dela na visokoj razine. To si, doklen jih naslišeš, imel dojam koda su se rodili na pozornice, a ne da su debitanti. To dokažuju i nagradi. Onu od publike, i to va četiri grada, dobila je Irena Grdinić. Čestitke Irene, i ovako napismeno i javno. Ta maletina ne da ima stas, ima Irena i altroke glas. Kako bi mali Borna rekal – raskošna pojava, a ja dodala – raskošna pojava z raskošnen glason. Moran samu sebe pohvalit i reć da san njoj još va drugen mesecu, kad san prvi put na komisije čula pjesmu, prognozirala pobjedu.
Ma da će dobit va četire od pet mest, to nisan predvidela. Intanto, san na drugoj večere, onoj rečkoj, utaknula Marija. Govorin mu ja – Marijeto, si ti videl Irenu, njoj će uspjet na prvomu MIK-u ono ča si ti čekal let i let. Mario me gljeda i govori – ča? Ja odgovaran – pa, pobijedit. Sad ću premučat se ono ča mi j’ rekal, napisat ću leh zaključnu rečenicu ka glasi – ja san ju zmislel! Ča reć osin da je Mario najuspješneji tragač za talentimi aš do sad san od njega čula da j’ zmislel Šajetu, Jurkotića, Ferlina i Irenu. More bit je još koga, ma nisan zapamtila. Čekan da red konačno dojde i na me.
Drago mi j’ bilo sopeta na MIK-u videt i malčića z Selca ki j’ va Slovenije izgradil vrlo uspješnu karijeru, a pokla 27 let se j’ vrnul na MIK. Naravno da povedan o Werneru Brozoviću. Baš mi ga j’ bilo lipo gljedat va toj karavane. I njega, i njegovu prelipu Andreju, a još lipje prekrasnu hćer, ka j’ već divojka, a ja nisan ni znala da ju imaju. Intanto, Werner se j’ MIK-u vrnul i kako mi j’ rekal – ćutin se koda nisan tuliko let pauziral. Ni me briga za plasman, ja san se tu došal opustit, kumpanjat, i kampanat z dragemi ljudimi. Smo se domisleli i na pokojnoga Brdara i njegovu »Ah, smiluj se Marice« ku j’ na MIK-u pjeval Werner. Zač baš na tu? Pa zato aš se odvavek smejemo okol onoga stiha – »ah, smiluj se Marice, kot Boga te molin, tri zlatne mi reci – Ive, ja te volin«. Kako va ljubavi četire besedi moru bit tri, a da nikoga ni briga!
Zaspraven, bilo mi j’ na ovomu MIK-u lipo videt seh, o Karin i Vesne da ni ne govorin aš da njih ne vidin, to bi mi bilo koda ne vidin Bašu i bin mislela da san žbaljala Festival. Žal mi je ča na MIK-u već ni Bobušice, aš kažin ki j’ ona užala načinit ne more niki. Bar se neki takov još ni pojavil. A ona i Polić va duetu, e na takov ćemo par morat dugo, dugo čekat. Želin pohvalit seh oneh ke ne vidite kad dojdete gljedat Festival. Ne vidite jih aš su odozada – delaju. To su dečki z tehnike, oni ki broje glasi, oni ki nameštaju prvo leh drugi dojdu i pospravljaju kad si projdu. To su van oni ki su vječito lačni aš nikad ne dospenu na domjenki. Zač? Pa, sad san van napisala zač – zato aš snaže zad seh nas. Ja ih zoven Vjekotova deca. A kad smo već pu dece – se pohvali mikovskoj dece. Koj? Pa voditeljon – Lene i Borne. Lena j’ na MIK z pokojnin ocon i materun dohajala još kod mića mala, a Borna j’ z 14 let prvi put ušal va mikovsku karavanu. Sad bi on zajedno rekal – i pozabili ste me na Gromiku pa san vas moral zvat da dojdete po me. Nikada nan to pozabit neće, mada nan je već davno oprostil. Srićun Lena nima takova traumatična domišljanja na MIK. I da finin – MIK je pasal, bilo j’ fantastično i ni ča leh čekat drugi.
Ča se moje matere i MIK-a tiče, ona j’ komać doškala da fini aš se njejoj hćere ne priliči da dohaja zorun doma. Ča te susedi reć!
Slavica Mrkić Modrić
Da van povejen dve-tri o MIK-u
Slavica Mrkić Modrić
14. lipanj 2025 07:54
Foto Vedran Karuza
Čestitke Irene, i ovako napismeno i javno. Ta maletina ne da ima stas, ima Irena i altroke glas
Ja, dobro govorite – ova se j’ pasanu šetemanu odjavila i napisala da gre na ferije, a sopeta nemi. Ča van reć osin da čovik snuje, a Bog određuje. Intanto san tu, napol živa aš trebelo j’ preživet to mikovsko kampananje. Saki onaj ki j’ jedanput bil na MIK-u ale blizu mikovci zna ča j’ to. A to je – nemilo do pakla i nazada. Da ne bi bilo zabuni – kad rečen nemilo, to j’ va pozitivnomu smislu. To van znači da se kanta, sope i tanca od 24 ure baren njih šešnajst. Va ono preostalo vrime neki sled zažme, a oni mlaji i va snu hopsaju. Fala dragomu Božiću, ovo leto je va karavane bilo vagun mladeh – i oneh na pozornice, i oneh zad pozornice. Da j’ va Lipoj Našoj takov prosjek, kade bi nan bil kraj. Tuliko ča se tiče starosne dobi na MIK-u, a sada gremo na konkurenciju. Sopeta ću počet z mladosti i reć da j’ ova mikovska bila i ča se tiče izvedbenog dela na visokoj razine. To si, doklen jih naslišeš, imel dojam koda su se rodili na pozornice, a ne da su debitanti. To dokažuju i nagradi. Onu od publike, i to va četiri grada, dobila je Irena Grdinić. Čestitke Irene, i ovako napismeno i javno. Ta maletina ne da ima stas, ima Irena i altroke glas. Kako bi mali Borna rekal – raskošna pojava, a ja dodala – raskošna pojava z raskošnen glason. Moran samu sebe pohvalit i reć da san njoj još va drugen mesecu, kad san prvi put na komisije čula pjesmu, prognozirala pobjedu.
Ma da će dobit va četire od pet mest, to nisan predvidela. Intanto, san na drugoj večere, onoj rečkoj, utaknula Marija. Govorin mu ja – Marijeto, si ti videl Irenu, njoj će uspjet na prvomu MIK-u ono ča si ti čekal let i let. Mario me gljeda i govori – ča? Ja odgovaran – pa, pobijedit. Sad ću premučat se ono ča mi j’ rekal, napisat ću leh zaključnu rečenicu ka glasi – ja san ju zmislel! Ča reć osin da je Mario najuspješneji tragač za talentimi aš do sad san od njega čula da j’ zmislel Šajetu, Jurkotića, Ferlina i Irenu. More bit je još koga, ma nisan zapamtila. Čekan da red konačno dojde i na me.
Drago mi j’ bilo sopeta na MIK-u videt i malčića z Selca ki j’ va Slovenije izgradil vrlo uspješnu karijeru, a pokla 27 let se j’ vrnul na MIK. Naravno da povedan o Werneru Brozoviću. Baš mi ga j’ bilo lipo gljedat va toj karavane. I njega, i njegovu prelipu Andreju, a još lipje prekrasnu hćer, ka j’ već divojka, a ja nisan ni znala da ju imaju. Intanto, Werner se j’ MIK-u vrnul i kako mi j’ rekal – ćutin se koda nisan tuliko let pauziral. Ni me briga za plasman, ja san se tu došal opustit, kumpanjat, i kampanat z dragemi ljudimi. Smo se domisleli i na pokojnoga Brdara i njegovu »Ah, smiluj se Marice« ku j’ na MIK-u pjeval Werner. Zač baš na tu? Pa zato aš se odvavek smejemo okol onoga stiha – »ah, smiluj se Marice, kot Boga te molin, tri zlatne mi reci – Ive, ja te volin«. Kako va ljubavi četire besedi moru bit tri, a da nikoga ni briga!
Zaspraven, bilo mi j’ na ovomu MIK-u lipo videt seh, o Karin i Vesne da ni ne govorin aš da njih ne vidin, to bi mi bilo koda ne vidin Bašu i bin mislela da san žbaljala Festival. Žal mi je ča na MIK-u već ni Bobušice, aš kažin ki j’ ona užala načinit ne more niki. Bar se neki takov još ni pojavil. A ona i Polić va duetu, e na takov ćemo par morat dugo, dugo čekat. Želin pohvalit seh oneh ke ne vidite kad dojdete gljedat Festival. Ne vidite jih aš su odozada – delaju. To su dečki z tehnike, oni ki broje glasi, oni ki nameštaju prvo leh drugi dojdu i pospravljaju kad si projdu. To su van oni ki su vječito lačni aš nikad ne dospenu na domjenki. Zač? Pa, sad san van napisala zač – zato aš snaže zad seh nas. Ja ih zoven Vjekotova deca. A kad smo već pu dece – se pohvali mikovskoj dece. Koj? Pa voditeljon – Lene i Borne. Lena j’ na MIK z pokojnin ocon i materun dohajala još kod mića mala, a Borna j’ z 14 let prvi put ušal va mikovsku karavanu. Sad bi on zajedno rekal – i pozabili ste me na Gromiku pa san vas moral zvat da dojdete po me. Nikada nan to pozabit neće, mada nan je već davno oprostil. Srićun Lena nima takova traumatična domišljanja na MIK. I da finin – MIK je pasal, bilo j’ fantastično i ni ča leh čekat drugi.
Ča se moje matere i MIK-a tiče, ona j’ komać doškala da fini aš se njejoj hćere ne priliči da dohaja zorun doma. Ča te susedi reć!