Evo me nazad! Kade san bila? E, pa skoro četire šetemani na kauču, ma ne pu psihijatra, mada bi mi i to rabilo, leh na vlastitomu. Ča j’ bilo? Najlagje i najročneje je reć – zub vrimena. Stisnulo me j’ va hrbatu i Bogu dušu, Bog ju neće.

No, ni sako zlo za zlo. Se to skupa, a sega vranića san čula i videla pohajajuć po ambulantah, dalo mi j’ za mislet i dobro razmislet, a iskreno ću van reć, da mi j’ puno stvari došlo z riti va glavu. Gremo od Hitne na koj san najprvo finila. I to drito z dela tamo aš kad je moj glavni urednik videl da nima koga videt leh je zazijal – pakuj se i vozi na Hitnu. Nisan ni dospela reć – neću, a već san bila na onoj trijaže. Znate ča, sen ten ljuden ki delaju tamo trebelo bi dat najveću moguću plaću ka postoji aš ležeć dve uri va Hitnoj čula san i videla s čen se se ti ljudići bore. Od silnoga broja pacijenti kemi se ne vidi kraj, preko mora zahtjevi i molbi do jezične barijeri. Ako j’ sudit po tomu kuliko j’ stranci bilo tamo toga dana onput zbilja stoji ono da smo po broju turisti prešišali 2019. leto. Dobro za turizam i gospodarstvo, ma muka Isusova za dohtori aš dobro je kad pacijent govori ingleški ale taljanski, ma ča ćeš z onen ki ume leh češki, ale z onen ki poveda leh kineski. K tomu ćemo dodat i si oni ki su senilni pa ne znaju ni zač ni poč smo došli pa sami vidite ka j’ to tlaka. A posada od Hitne se to nekako, kako bi se to po modernu reklo – hendla, a po našu odbavlja staloženo, z puno pacijenci i tekuć. Zač tekuć? Zato aš da normalno hode nikad ne bi odbavili celu onu curmu ljudi ka j’ došla po pomoć.

Pokla Hitne dospela san pu svoje dohtorice na Krasicu. Tu van niman niš novoga zan reć aš si znaju da ljubaznejeh osob od dr. Janje i sestre Suzi ni. Zato i je vavek gnjeta aš i oni kemin niš ni dojdu tamo na čašicu razgovora. Mane j’ isto bilo super – utaknula san vagun ljudi ke nisan i po trejset let videla. Sega vranića čula i doznala, a i bome, kuliko mi j’ bol va hrbatu dozvolila, i nasmela se. Ja, ma kad dojde vikend ni već domaće ambulanti – moraš poć v Riku, va dežurnu. Tamo san oba dana bila prva na redu, ali ni sako veselje za veselje. Sobotu mi j’ jedna gospa medicinska tako spičila injekciju na stojeć da san komać do auta došepala. Dobro da nisan počela plakat i svoju Suzi dozivat. Verujte, mane j’ to bil tuliki civilizacijski šok da nisan dospela ni njurgat. Kad san došla do auta i paronu rekla – to j’ strašno, osoblje va bolnice va Alan Fordu je mila majka, pa mu povedala na to davanje injekcije kod kad veterinar cepi kravu leh mi je rekal – muč, sad te bar hrbat manje boli, aš te rit da više. Nedelju j’ bilo se OK, a onput san se opet vrnula va moju ambulanticu na Krasicu i moja j’ rit odahnula aš niki nima tako nježnu ruku kod Suzi. To ča mi j’ rit bila plaveje leh je ijednomu Štrumpfu, i to ča su me doma mogli porabit kod zalevalnik – znate ono, naleju me z vodun, ja sučen gaći, stanen pu rožic i zalevanje odbavno – to j’ drugi par rukavi.

Kako san morala mirovat, moj se j’ život te, već od tri šetemane svodil na poć dohtoru i sedet spred televizije. Na kauču j’ škulja, a ostatak familje je na antidepresivimi. Kad san došla od dohtorice i rekla da pundeljak gren delat, leh san čula va glas – Bogu, hvala. A kad san šla tenesice zut čula san i kako mat govori – fala ti Bože da smo ovo preživeli. Iskreno, ja se opće ne domišljan da san ja bila nemoguća. Ono ča mi najprvo napamet pada je da su oni bili štufni, da san z materun morala gljedat se reprizi serij, nogomet i se vijesti i da su me stalno tirali jist i spat. Koda san kakova praščina, a ne bolan čovik. Nažalost, gljedajuć te vijesti leh san se štufevala i sovala.

A kad san dokončala da san počela sanjat plameni jazavci, državni neprijateli, lipog Baneta i slični samo j’ sebe san rekla – dosti je, kad vijesti počnu ti briši va kamaru. I bil bi to dobar plan da nisu susedi malo nagluhi pa j’ ton na najače. Ovako san va kuhinje imela sliku i ton, a va kamare je bilo koda naslišan radio. A ko za vraga slušalice nisan mogla nać. Skoro da san klala sir va uši kod si kad bi Edith z Alo Alo zakantala, ma do toga nismo arivali aš san na vrime šla delat. A ča se tiče drv – pospravna su. Bog dal zdravlja Dariju i Marku.