Pasana dva dana su bila jušto po mojoj mere, ča se vremenskih prilik tiče. Kuntenta san dočin je škura bura. Ja, poznopak san, to znan i sama aš ki normalan voli pohajat doklen šviče bura, a kapi dažja mu se va obraz zabijaju? Eto, ja dan. Ma dočin ju čujen kako zavija vane, mane j’ već srce na mestu. I nemojte mislet da mi va življenju ni zapaprila. Avah mane, kuliko put me je po staromu krasičarskomu igrališću, skupa z oprćenun školskun torbun nosila i raznašala! A koliko puti va gromaču zakramala! O tomu kako to zgljeda kad te kod zadnji smeti zabije va kontejner, bolje da van ni ne povedan. Ma ja ju sedno volin. Južinu ne aš doklen mi bura se loše z glave odnese, južina mi to loše još i podeblja. Ne znan ako san van povedala jednu štoriju z davnine ka se j’ dogodila na tancimi va čavjanskomu domu kulturi, a vezana j’ za, onda, dvoje mladeh ljudi. On je bil mladić va najboljeh leteh, pomalo, zaspraven fanj sramežljiv i komać ga je kumpanija natirala da gre š njimi z halubajskoga kraja na tanci na Gromik.

I, govori on mane:

– Odbavili smo se i šli. Došli, malo popili za hrabrost i stali uza zid. Oni kuražneji su već tancali, a ja san cucal ta svoj gemišt i kako nisan baš neki tancur, a i nisan neš hrabar poć do divojki i pitat ju za tanac, činilo mi se je da ću celu večer tancat zidon i bićerinon va ruke. Bi bilo bolje i da san, ma kako j’ vrime prohajalo, a ti bićerini su dobijali na broju, okuražel san se i ja, pa san se od zida odlepil i šal do jedne maletine ka mi j’ za oko zapela dočin san va salu nutar šal. I dojden ja do nje, pitan ju za tanac, a molin Boga da reče da neće, kad ona odgovara – homo. I sad se domišljan da j’ sviralo Ke Sera, Sera. Pjevušil san i pazil da njoj nogi ne pomastin. Se j’ bilo va redu, doklen ona ni rekla kako j’ vrime da se i upoznamo, kad već skupa tancamo. Govori kako j’ ona Vlatka Bura, ja kod z topa odgovaran – drago mi je, ja san Vlado Jugo, a ona na to mane takovu ćepu da mi j’ va glave zazvonilo. Obrnula se je i prošla, a mane kod drek pušćala na sred sale. Ne znan ka mi j’ strana obraza bila već črljena, ona na ku san flisku dobil ale ona druga ka se j’ črljenela od srama. Tr znaš i sama ča su oni ki su videli pomisleli da san načinil. Va najmanju ruku da san ju za rit ćapal. Kako da ja i njoj i celomu svitu objasnin da j’ do ćepe došlo leh zato ča j’ ona mislela da njoj se špotan okol prezimena, a ja san sirota leh istinu rekal. Intanto, opet san se zalepil za zid, nisan već ni pogljedal kade je, leh san Boga molil da me ne stuču njeji prijateli, aš znaš i sama kako j’ to va ono vrime bilo na gromičkeh tanci. Komać san dočekal da partimo doma, ma ovu štoriju nisan nikada pozabil.

Ekola, to j’ bila zavrzlama okol dva prezimena ka su dobivena po vetrimi z našega kraja, a ku mi je povedal moj obožavani, već odavno pokojni kolega barba Vlado Jugo. Domišljan se i kako smo se kod dva diteta smeli kad san mu rekla – Jugić, more bit i bolje da j’ ta tanac tako finil aš da ste se ken slučajen oženili, i da j’ ona pušćala oba prezimena, sirota bi se zvala Vlatka Bura Jugo. Ako j’ ista još vavek živa i ako slučajno ova štorija dojde do nje, bit će mi drago da pokla tuliko let dokonča kako te i te davne večeri, on sramežljivi dečko z Halubja, ni bil bezobrazan leh se j’ samo pošteno predstavil. Intanto, ja se te štorije domislin za sakoga juga i za sake buri.

Ova, ku niki ni očekival, bar ne va tulikoj jačine, sobun je dopeljala i sneg i čuda problemi va prometu. Ćeš onomu na kopnu, ćeš onomu na moru, ćeš onomu va zraku. Gorani su već spravili lopati i so to protusnježno naoružanje, ma su ga sopeta morali znet, a kuliko čujen i se su Gorske službe spašavanja imele pune ruki dela. Ogulinska da se j’ celu noć probijala da bi spasila va snegu zametenu familju – oca, mater i četvero miće dečice. Koristin priliku da još jedanput istaknen kuliko j’ lipo imet takovi ljudi kod ča su HGSS-ovci. A da smo si skupa bezobrazni – smo, aš da mi drugi poslušamo ono ča nan stručnjaci reču, a to je, va prvomu redu – ne krećite na put, ne hote va sneg z letnjemi gumami i slično, onput bi i ti HGSS-ovci imeli manje dela. Prvu sebe prozivan aš ja nisan čula ni alarm od 112, a kamo pročitala upozorenje. Intanto, zima još ni finila, kod ča nisu finili ni oni ki kradu i lažu ov napaćeni puk. Bilo i bit će.