Čera je bil dan maturanti, ne samo v Rike leh va celoj Hrvackoj.

Jedan čovik je na društveneh mrežah napisal da to ni dan maturanti leh dan strave i užasa, pa j’ još i z ljuden podelil svoje iskustvo od prvo par let. Mesto radnje je bil Zagreb, a njega, ki se j’ ta dan uputil na placu, pozabivši ki je dan, lipo je jedan od maturanti pocural, a jedan drugi mu je zirigal postoli. Čovik zbilja ni imel srići. Da ni tragično, bilo bi smešno aš zbilja moraš bit teška pegula da ti se to dogodi, kako j’ napisal – va pol ure.

O komentarih ki su mu »društvenjaci« napisali spod objavi, bolje da van ne govorin. Najčešći je bil onaj da j’ imel sriću aš da j’ mogal i huje proć.

Jedan od nadobudneh ga je pital je ga morda kakova tičina još i posrala, a ako ni, da mu j’ to koda nigdere ni ni bil. Jedan ga je pital da ako j’ morda još i va drek stal? Mnogi su podelili š njen svoja loša iskustva vezana za ta dan od maturanti, a najveć je bilo oneh ki su štoriju od maturanti preselili va političke vodi i se je, kako to i obično bude, finilo na partizanimi i ustašami.

Avah je nan sen skupa. Intanto, ono ča mane va celoj toj štorije od maturanti najveć pači nisu ni pijani, ni zirigani, ni pocurani, ni slični maturanti leh to ča su uniformirani.

Koda smo va Kine pa si – isto.

Pod broj jedan zač bi se ta dan zval va celoj Hrvackoj Norijada. Pu nas ta beseda baš niš ne znači. Ako je već neki otel kopirat metropola maturanti, onput su ove maturalne nemotarije va našemu kraju trebele nosit ime – nemijada. Zač si moraju hitat to brašno, a tuliko j’ lačneh, ne va svitu leh njin va susestvu. I zač vavek se fini na lokilu. Tr nalokat se moru saki dan, ako imaju soldi.

Čast iznimkami, pa mi j’ bilo jako lipo čut kako ta svoj dan šegavo odbavljaju maturanti va Varaždinu, Osijeku i pozabila san kade ono još.

Drago mi je i za oni rečki, me par da su građevinari ki ne posipaju brašno ni po ceste, ni po ljudimi leh peku palačinki va humanitarne svrhi.

Eko, vidite da se more ako j’ dobre volji i ako ti se da najprvo smislet, a onda i odelat. Razumen i da j’ mnogemi najlagje ne mislet i peljat se po onoj »kud si, tud i mali Mujo«.

A teh maleh Muj, puna je Hrvacka, i ne mislin tu leh na maturanti. Mislin općenito.

Ja, kod ja, nikada se ni va privatnomu, ni va službenomu životu nisan srela z tun Norijadun. Nisan se nikada našla na Korzu da bi me neki polel, ale nedaj Bog pocural, a bome nisan nikada ni va zadatak dobila pratit to njihovo nemenje. Jedino ča znan je ono ča su mi kolege povedale i ča san videla po medijih.

I sama san nekada bila maturantica, ma va moje vrime ni bilo ni Norijadi, ni brašna, ni oceranja, ni hitanja po fontanah, ni hitanja va Mrtvi kanal, fudrini se nisu punili z vodun, koristili su se va pametneje svrhi, a još manje se iskalo od gradskeh vlasti da ti financiraju i organiziraju ta kraval po gradu.

Kuliko se domišljan, mi smo ta zadnji dan bili va škole, a pokle školi smo se od Rečke gimnazije poprtili do onoga parka kraj Guvernerove, malo si popili, malo zapjevali pa smo se spušćali do Konta, i finili va Palahu. Nikomu niš nismo načinili, a sedno nan je bilo dobro.

Razumen ja i to da sako vrime nosi svoje brime, ma ono ča mi ni jasno zač je to breme vavek destruktivno.

Intanto, ni da me se se to tiče aš ni ovoj sakramenskoj Norijade neću, kako bi se to lipo reklo – nazočit, neću ju ni očešat, ma saki ima pravo na svoje mišljenje pa tako i ja.

Jedino ča se nadan je da hitne službi i policijoti neće imet puno dela i da će ta dečina sa živa i zdrava doć doma. Ono ča me je istinski potreslo je kada san videla da su šibenski maturanti spred suda pušćali va zrak devetnajst beleh baloni i održali devetnajst minuti šutnje za Luku.

I kada se domislin na toga nesrićnoga dečka, onput mi dojde muka i najraje bin se i ja i pocurala i posrala na celo naše pravosuđe aš ča će Lukinoj familje ni ovo, ni ono objašnjenje, ča će njin povedanje da va Hrvackoj postoji kazna od pedeset let kad ju nidan sudac do sada ni presudil.

Badava njin se to kad Luke više ni. Jedino ča se nadan je da će valjda sad nekomu od odgovorneh doć z riti va glavu, da će konačno shvatit da delo za ko su plaćeni moraju i odelat. A onen ki su direktno prozvani za ovu tragediju, ako imaju i malo savjesti, ne bin otela bit va glave, a još manje va srcu.

Za kraj – želin sen maturanton sretan ostatak življenja i bolje i pravedneje društvo od ovoga va komu trenutno živi celi svit.