Nisan od oneh ki poneme dočin se spomenu blagdani. Iskrena ću van bit pa reć da ja zaspraven ne znan ča ću sama sobun ako va ti dani nikamo ne gren, a k tomu ne delan. I jako mi gre na živci vas ta šušur ki dohaja ruku pod ruku z blagdanimi. Načisto ponemejen kad već krajen desetoga meseca vidin okrunjeni jelvići i čujen zvončići, a ljudi koda njin je neki petardu vrit hitil, va niskomu startu spravni za potrošit se ča imaju. Koda j’ sudnji dan, a ne još jedno leto ko, ćeš nećeš, po kalendaru mora doć. Užan reć da j’ mane saki dan kada se zbudin novo leto aš, nažalost provala san i to kada ni bilo sigurno kuliko dani ću se još zbudit, i ako ću se opće zbudit. I sad bi neki šegav rekal da ako j’ tomu tako, da bi trebela saki blagdan vriskat od sriće. Tr i vrišćen, ma ne leh na blagdan leh na saki novi dan.

Tako se pred malo vozin i sama sebe provan odgovorit na ono psihijatrijsko pitanje ko glasi – a, kad je kod vas sve to počelo? A me par pri rođenju aš mi je rojendan padal vavek kada su nekada padale školske ferije pa ga nikada nisan mogla kod i si drugi slavit va škole, a silno san otela. A ča se tiče oveh drugeh zimskeh blagdani nekako su mi do dandanaska bil najdraži sv. Mikula i Tri Kralji. Zač? Mikula aš su mi vavek se čižmice, postolići i papučice bile pune dari, a Tri Kralji aš san znala da prvu sobotu kad oni pasaju gredu maškari. Sami znate da njih, ča bi se po modernu reklo – naprosto obožavan. Zato se i maškaran seh 365 dani va letu (opaska moje materi).

Kako kalendar ne moren promenit, ni mi druge leh potrpet doklen vas ta šušur ne pasa. Ma sedno se vavek pitan – kako ljudi moru bit dobri leh za ta i ta datum, isto tako i veseli? Kad dokončan kade j’ greška ću van javit. Užaju mi reć da ne volin blagdani zato aš ne volin slatko. Baš, tr ne volin ni kuhano vino pa mi ga niki ne spominje. Neki to pripišuju tomu ča se ne volin bušat. Baš, tr ki mi j’ drag, bušan ga već od one ljubilice z crtanoga filma z moga djetinjstva. Je i oneh ki tu moju falingu, kako oni to pristojno nazovu, objašnjavaju s ten da vavek moran bit drugačja. More bit da se to ima neš, ma nikad nismo bili i nećemo bit si isti, jedino neki prizna, a neki glumi. Ja ne govorin da neću i ja jedno leto obuć blagdanski veštid i hopsat po adventimi, ma za sad je tako kako je.

A tako je da moja gospa mama i ja planiramo skupa dočekat Novo leto. I već znan da će bit rat okol obeda, daljinskoga, lampic, petardi i da ne nabrajan. Dala j’ urdin za odojka i to tri kila, a nas leh tri s ten da odojka niki baš ne voli. I sarmi moraju bit. Da mi j’ znat za koga. Kolači san morala poć kupit, a to van je koda onoga z pustinje Gobi pošaljete da bude učitelj jedrenja va Puntu. Znate da ne volin slatko i nikada ga ne jin. Sega će mi zbrojit. Da lahko ča ne umen zamesit, leh da ne umen ni kupit. A petardi njoj nisan otela kupit. Ala recite sami, je normalno videt staricu od 87 let ka z bakona hita petardi? Kuliko jih se ja bojin i kuliko mi se grusti se to, tuliko j’ ona srićna. Prskalice će njoj bit dosti. Znan već – ja ću otet gljedat HTV1, a ona Novu aš da su njoj tamo si oni njeji »prijateli« z pitaj Boga keh se serij. Onoga kiča od lampic njoj nikada ni dosti pa će mane, vjerojatno, još mesec dan, ako prvo toga ne oslepin, oči žmigat i trest. Ma, bit će kako ona će, to san odlučila i ću nekako potrpet tu jednu noć. Srića na Novo leto delan pa ću baren tu troturu doma preskočit.

To j’ ča se tiče našega dočeka, a ča se tiče onoga po gradimi, općinami, selimi, želin sen vrime bez dažja, z malo petardi, bez vatrometa i ča već euri va takujinu aš kuna gre va raj, a euro nastupa. Nemojte mislet da gospa mama ne zna ča i kako – leh je oprla takujin i rekla »ala kladi tu nutar 50 euri za frizuru«. Govorin njoj pa ne greš na fejslifting leh na frizuru i to kada ti se i ako ti se bude dalo. A ona će mane – gljedaj, mane j’ već dosti te igraljke. Pitan ju da ke. Govori – Milanovića i Banožića. I sad si smiron mislin ka san ja va toj igre? Avah je mane, a ča iman mislet. Tr znan. Intanto, se najbolje va 2023. van želimo nas dve. Zija – zdravlja najveć i da imate jedan sled bolju hćer leh je moja. Gren se ranit!