Oprli smo Pelješki most! Neka smo aš si ti ljudići ki bivaju z obadve bande mosta to čekaju čuda let. Kulika j’ njihova srića more razumet leh onaj ki j’ bil va sličnoj situacije. Morete mislet kuliko roditeljon znači to da njin sad dite ko j’ finilo osmi razred more z domi va srednju školu, da ne mora poć va dom. Kuliko njin znači ča j’ do dohtora lagje, ča će se konačno moć malo ozbiljneje bavit z turizmom, ma da ne navrezan dalje – ta most je čudo. Ča se tiče samoga opiranja,A onput bi nastavili otipat i ovoga i onoga. Tako ću i ja sad reć da su na svečanoste bila dva povjesna trenutka kako bi rekli stari kad bi došli z nekakovoga dogajanja – bilo j’ lipo, bilo j’ čuda poznateh.

. Prvi je spajanje Hrvacke, a drugi to ča su Milanović i Plenković dali jedan drugomu ruku. E, pa lipo od njih ča su se baren za tu večer i oni spojili.

Lipo j’ bilo videt i gospu Šujicu ka namiguje premijeru, ma ja sedno nisan mogla protiv sebe i zajedno san se domislela na on sakramenski kondot ki j’ va Dubrovniku osvanul za vrime njeje vladavine. Govore da j’ bilo lipo videt našu Kolindu ka se j’ posela na most i guštala. Da san bila tamo, ja bin njoj zapljeskala. A zač se ne bi posela ako njoj se sedi? Oni ki se razumeju va takove stvari govore da j’ bilo lipo videt i njeju taškicu Bottega Veneta ka da košta tri tisuć euri. I sad si ja mislin, zač ljudi imaju potrebu rivat nos tamo kade njin ni mesto. Rekli bi – ima se, more se! I to j’ tako. Ča se mane tiče kuliko će gospa Kolinda platit ni ovo, ni ono. To j’ njeja stvar i njeji takujin. Baš su me razjadili aš koga briga za taške, postoli i halje, pa valjda j’ most trebel bit va središtu pažnje. A ako me već pitate čigov mi se j’ govor med onemi govorniki najveć pijažal ću van i reć – od Olega Butkovića. Zato aš je, kako to i inače je, bil jušto takov kakov je – iskren i jednostavan. Ne se prehitit sad kad rečen da smo se mat i ja složile va odabiru najboljeg govornika.

A kada san se već dotaknula materi, naravno da j’ i dalje glavni pogovor okol drv ka još vavek mešaju aš moraju bit mešana pa još nisu došla. Govorin njoj da njoj je jušto sedno kada će doć aš da j’ Vlada objavila smernice za šparanje energenti i da j’ propisano kako po zime va kuće ne sme temperatura bit veća od 21 stupanj, a po lete manja od 25. Skoro se j’ zbatila aš pu nas je i po zime i po lete već od trejset, aš po zime hajca, a po lete ne da takat klimu. Šegavica, kakova je zajedno je zračunala kako će ona letriku šparat po lete, a po zime da si skupa moru va buru puhat aš da se ona tepli na drva, a ne ni na plin, ni na letriku. I ča da njoj čovik na to odgovori, najlagje je prehitit temu, i od Boga srića ča postoji Milanović, aš kad ne znan ča bin leh njega spomenen i ona se zajedno ćapa. Pitan ju da ako j’ morda čula kako j’ Presjednik šundral prst. Još nisan ni finila – a ona govori da j’ bil va rezidencije, da j’ bil lačan, da si j’ šal neš za jist pripravit i da j’ onput šlo po zlu. Posikal se je, a Banožić mu ni poslal dohtora. Naravno da san to se znala, ma me j’ zanimalo kako će ona to povedat. I naravno da j’ njoj logično da vavek uza Predsjednika gre dohtor, aš da zač bi ovi danas bili huji leh ča j’ bil Tito uza koga ne da j’ hodil jedan dohtor leh regimenta njih – celi konzilij. Od smeha ju nisan uspjela pitat ča j’ Presjednik opiral paštetu pa se j’ šundral ale j’ šal malo zimske narezat. Intanto, ona j’ jedan specifičan slučaj aš kuliko se Presjednik i Premijer bodu, tuliko se njoj ni va jednoga, ni va drugoga niki, a pogotovo ne ja, ne sme pačat.

I za kraj jako me j’ razveselila akcija va Španjolskoj ka se odvija pod sloganon – sako telo žene je telo za plažu. To j’ apsolutno točno aš zač se za nekoga debeloga muškoga kad se suče va kupaći ne reče – vidi ovoga nilskoga konja, a za brižnu malo okrugleju žensku se reče – ma, vidi ovoga vepra. Još ako j’ ko leto stareja, onput je stari vepar. Iskreno, mane j’ jušto sedno aš na plažu ne gren, a i ako gren to j’ va dobu kad ni nigdere nikoga ki bi komentiral. Da san bela kod sir – san, ma to da j’ moderno. Ako niš drugo, niki se neće zabunit pa mi, po naputku Presjednika, provat prodat svoju klimu.