Ma kako se j’ lipo spalo pasane dve noći. Bilo j’ kod va raju. Sen osin mojoj matere ka j’ iskala krpatur, kalcetice i ča ja znan ča se ne – najlagje j’ reć – zimsku opremu. Celo j’ jutro namaljala kako ovo vrime ni normalno i kako nikakovo čudo ča su ljudi nemi da nemeji ne moru bit, a do ki’vo dan je skucala da ovakoveh teplin ni bilo od kad ona zna za se. Ča reć leh tipičan primjer z Hrvacke. Još se ni rodil onaj ki bi sen ugodil. A nisan ni ja iznimka. I ja vavek neš njurgan i brontulan – sad mi ovo pači, sad ono, i tako vrime paseva, ja starin, a njurganja su se češća i žešća.

Ki’vo dan san celi dan namaljala i jadila se sama na se. Jutro mi j’ pačila saka druga vijest ku san čula na radio, a zapolne saka ku san videla i čula na televizije, ča zaspraven znači da san pačila samoj sebe. I sad se zbilja pitan da mane opće trebe dat ferije. Vranić me zel ako trebe aš normalni ljudi kad imaju ferije odbave se ono ča ne dospenu doklen delaju. Neki pegla, neki čisti, neki išće paučinu po kuće, neki pospravlja i čisti pikabiti, neki gre na kupanje, neki na kakov izlet ale putovanje, a ča ja? Kako mi ta dela po kuće baš i nisu od nikada srcu prirasla, a morate priznat da su štufa za ponemet, onput se na njih ni ne domislin. Za poć na kupanje san prelena i ne moren ni zamislet da ležin med onimi silnemi ljudimi ki se pohitaju kod mrtve srdele i jedino ča njin dela je zajičina pa se pogovaraju koda sto let nisu jedan z drugen progovoreli. A o dečine ka vrišću, skaču i oceraju se da ni ne povedan, kod ni o tomu da si nekoga vranića žeru pa to cedi na se strane, a osi i čele komać čekaju da ateriraju. Pa, ča to mane rabi? A, po Majku Božju jedino da me neki pištolun natira, inače – ne. Za putovat niman soldi pa mi j’ najlagje bit doma i prespat ti dani doklen mi ni poć na delo. Kako j’ to puno preveć vrimena koga inače provodin doma, to onput, ča bi se po čakavski reklo – eskaliraju i sukobi zmed mane i moje roditeljice. I vranić zel seh oneh ki su odlučili da se po letu ne igra nogomet aš da j’ kakova utaknica na televizije, bil bi mir va kuće, ovako ga ni.

San ju provala prestrašit z koronun aš nje se boji kod črnoga vranića, ma ni uspjelo. Rekla mi je da doklen traje sezona koroni ni i šlus. Ja njoj govorin da ča si ti ljudi i stručnjaci ki govore da raste broj bolnih govore z riti, a ne z glavi, ma ona ne haje i odgovara – govore leh da govore aš nekako moraju zaslužit plaću. I tako van je to. Blažena ona, ona za se ima svoje mišljenje i svoju istinu, i opće ju ne zanima ča drugi povedaju. Provan z raton zmed premijera i presjednika na ča ona leh mahne z rukun i govori da su huji i dosadneji leh bilo ka turska sapunjača i da besposlen plovan i jarići krsti. Onput njoj govorin da j’ njeji obožavani ministar Marić dal ostavku, a ona će – čula san na radijo, a ča će sirota, valjda ni već imel želuca za se te monadi. Tr vidiš da si leh lažu i kradu, a i ča će mi sad to. Niman ja vrimena tambaškat od Marića, moran poć speglat ča kad tebe ruke naopak stoje.

I tu mi nabije grižnju savjesti i po onoj silnoj tepline mašen z peglun kod malo udrena, a ona saki komad ki speglan gre bobić popravit aš naravno da ja to ne načinin dobro. Zato san kad san se peljala na delo namesto kako do sada, a bilo je – kad vidin špag pun robi ka j’ na sušilu, zajedno se razveselin aš me to vrne va djetinjstvo – leh zanjurgala i opće nisan kod inače po robe detektirala ki biva va toj kuće, ča ki dela, kuliko j’ starejeh, kuliko mlajeh i slično. Frknula san z noson i jedino ča mi j’ bilo na pamete je – ki će se to speglat. Onput san zadnji čas videla dvoje mudante na sušilu i počela se kod luda smet aš mi j’ napamet pal Benkovački samanj i jedan prodavač ki j’ zijal – ajde ljudi, jeftino dajem i gaće za kupanje i gaće za kurvanje. Gaći za kupanje su bile one duže kupaće, a gaći za kurbanje tangice.

Zaključak je bil – doklen se pokla pomisli na peglu, moren nasmet, još mi ni Stari Zmaj skrozin mozak speglal. Srića od Boga ča je bilo leh šest slobodneh dan, da j’ poduralo već bin znemljena peglala po kućah.