Zlo i naopako, ča drugo reć. Pasanu san šetemanu mislela kako će do današnjeg dana rat va Ukrajine finit, ma nažalost – krivo san mislela. Ne da j’ finilo leh je se huje i huje.

Na sakomu koraku mrtvi ljudi, ruvinane zgradi, važgana postrojenja, strah i neizvjesnost od onoga ča nosi jutra. Najkraće j’ reć – tuga. Mane osobno se te snimki vrnjuju na 1991. leto i sa leta do 1995., iman »pitiespi«, i puno puti mi padu napamet si oni ča tu bol vuku još od rata – kako se tek oni ćute. Aš ako ja ne moren spat, moren mislet kako j’ njin. Z druge bandi naslišen mnoge ki z čuđenjen gljedaju na oni ki su šli Ukrajincon pomoć z puškun. Ja va takove ne gljedan z čudon leh se molin da se i vrnu, aš nikada neću pozabit si oni ki su bog zna s kuda došli pomoć nan. Neki je za pušku nosit, neki za pomoć otpeljat, neki je za prijet siroti izbjegli ljudi, a neki leh za filozofirat i, oprostite na izrazu, srat po semu. Niki rat ne želi. Nismo ga želeli mi, ne žele ga ni Ukrajinci, a verujen ni pol Rusi. Vavek se najde nekakova nema i zločesta glava ka se zakuha i mnogemi uništi životi. Kući će se popravit, tvornice će se načinit ma nikad niki već neće moć vrnut matere sina, žene muža, ditetu oca. Komotno moren reć i mater pa se to ponovit aš oružje ne pozna spol. Oružje ubija.

Naslišen ča ljudi okol sega toga povedaju. Ne političari, ne vojni strategi leh obični ljudi. Kako i za se, tako i za rat saki ima svoje mišljenje, ma nekako seh skupa najviše pojida to ča će radi sega ča se va Ukrajine dogaja se poskupet. Pa tako jedan barbić ki j’ va butige na kase stal spreda mane z kasirkon raspravlja da su se ceni već krešile i da na tomu nećemo stat. Ta pogovor se j’ protegnul na fanj dugo pa se j’ i red za kasu protegnul. I ki zna kuliko bi se to skupa duralo da ni neki dečko z kraja reda došal do njih i na tiho rekal – ala sad se lipo pozdravite aš će rat va Ukrajine finit, a vi ćete još mašit. Moran priznat da san se od srca nasmela, a ta paron i ta ženska na blagajne su me pogljedali, me par, huje leh ča bi Putina da njin se je ukazal. Ne govorin ja da oni nisu imeli pravo ča se tiče teh cen i poskupljenji, jedino ni bilo vrime i mesto za takovi pogovori.

Mane recimo već od poskupljenja muče ti napadi Rusi na nuklearne elektrani. Zaspraven, dočin se spomene beseda nuklearno mane srhi pasaju. To mi j’ valjda ostalo još od vrimena Černobila. Uza se to ča se bojin i same pomisli na to ča bi se dogodilo da jedna od mnogeh ke ima Ukrajina odleti va nebo, još vavek iman tuliko prisebnosti da ne pohajan po apotekah i ne išćen jod. Ča ne moren reć za neki poznati. Recimo, jedna od takoveh je obašla se ljekarni v Rike, pa kad ni našla ta sakramenski jod, protegnula se j’ i na celi rečki prsten i kad ni tamo ni našla pal njoj je napamet internet. Poveda ona kako smo mi si skupa vrite, kako se olako shvaćamo, kako niš ne znamo i se tako namalja aš prvo biš zidu dopovedal da ju, ako rokne nuklearka va Ukrajine, nikakov jod neće spasit, ona se i dalje drži svojga joda i šlus.

Ta put san zaključila da ni moja mat najtvrdoglaveje stvorenje na svitu. Njoj je zajedno bilo jasno da od joda ni koristi, ma ju ni sprečilo da mi izda befel da kupin tuliko i tuliko ula, tuliko i tuliko muki, tuliko i tuliko kumpira, da kupin paštu, cukar, pišćenice i nećete verovat – toalet papir. Kad san njoj rekla da ako dojde do Tretega svjetskoga rata će me najmanje pojidat š čin rit taren, odgovorila je da j’ ona svoje rekla i da ča ja znan od rata, a ona da j’ već dva preživela. Da ča ja znan od rata? Srce Isusovo! Doklen san ja potekivala po ratu, ona j’ na Krasice sedela i kod ča sad daje urdin mane, tako ga j’ prvo pokojnomu ocu. Verujen da gren sada va konobicu, da bin sigurno našla ostatki zalih z 1991. leta.

Ja, neki skuplja oružje, a moja mat cukar, muku, sol i slično.Nas kraju san njoj rekla da j’ počela korizma i da bi bilo najbolje da se ona odrekne toga svoga hrčak sindroma. Odgovorila mi je da se neće ona ničesa odreć pa ni toga ča san njoj rekla, a ona nima pojma ča j’ to aš da si ionako tanko seremo, a da ćemo još tanje.