Ki bi rekal da se potres va Zagrebu more osjetit tako dugo. Najme, kad je zatreslo Metropolu, zatreslo se j’ i moj ZMO ale zaselak mjesnoga odbora ki j’ 145 kilometri dalje. A ča j’ bilo? Avah je nan. Jušto kad smo pomisleli kako su nan i ovi izbori za Vijeće mjesnoga odbora pasali kako i saki do sada – prez ikakovoga problema i z stopostotnun izlaznošću, ča će reć da j’ glasalo seh dvajset ljudi ki va našemu zaselku imeju pravo glasa, i jušto kad smo doznali da su nan rezultati isti kod i zadnjeh četrdesetak let, i kada smo to lipo šli proslavit ča će reć da j’ saki dobil jedan batak od kokoše, landicu kruha i žmuj vina, dogodil se j’ Dnevnik i se j’ šlo mater ženit. Da pojasnin – naše j’ vodstvo veli obožavatelj zagrebačkoga gradonačelnika, a neki se kladaju i med oneh 113 kumi ča jih Bandić ima.

Pa kad su na Dnevniku rekli da j’ svemogući Milac, kako se prvi čovik Zagreba pu nas naziva, finil vreštu, naša j’ predcjednica drugarica gospa Mičica zamalo finila na Hitnoj. Probledela je, ruki su njoj se počele trest, oblel ju j’ mrzli pot i komać je prošapljala – slatke vodi. Kako pu nas se podliježe lančanoj reakcije, istoga časa kad je Mičice pozlilo, pozlilo j’ i njejoj desnoj i levoj ruke, ča će reć drugarice gospe Pepe, njejoj zamjenice i drugarice gospe Jakomine, šefice od blagajni. Pol uri nan je rabilo da prestanemo bit obezglavljeni, da vodstvo dojde na se, a onput je, još vavek zmučena Mičica rekla: 

– Sad je dosti! Ovoga časa gren zvat oni USKOKI i POSKOKI i će me čut. Kakova j’ ovo država va koj tati slobodno šeću, a pošteni ljudi zapiraju. Da se j’ Titu stat istoga bi časa pobigal nazada. 

Zela j’ telefonin, zaprla se va kondot, koga smo, usput budi rečeno, načinili z Bandićevun donacijun i ni je bilo već od uri. Za to vrime je Pepa povedala ča nan je Milac se pomogal načinit, pa j’ rekla da nan je popravil krov od Doma, da nan je dal popravit cestu, da nan je Zagreba poslal smetlaricu za veli otpad, da j’ poslal soldi da kupimo knjigi za oni dva školana kuliko jih imamo, a o semenu od rožic, kompiru, kapule, šegljinu, merlinu i semu onomu ča nan po vrtimi raste da ni ne govorimo. Jakomina j’ dodala da bi nan kasa bila prazneja od one državne da nan ni bilo Milaca i njegovih donacij, i da od Boga srića ča Mičica voli skijat i ča j’ šla na to Sleme gljedat Janicu, aš da tomu ni tako nikada se ona i Milac ne bi trefili. Va to se j’ vrnula Mičica i podnesla izvješće. 

– Zvala san seh, od Milanovića, preko Karamarka do Josipovića. Sakomu od njih san očitala bukvicu, a najhuje j’ pasal on naš policijot ki j’ upravljal z akcijun privođenja. Milanoviću san rekla da ki pod dugen jamu kopa sam va njoj fini. Karamarku da ne dela račun prez oštara, a onomu našemu da se po nedelje gre na mašu, a ne hapsit ljudi. Van raspust, a mane j’ poć mislet kako mu pomoć, rekla j’ Mičica nač se j’ oglasil, a ki drugi ako ne šjor Dalmatinac i pital ju da ča ako se pokaže da j’ Milac zaspraven tat. Boh nas očuvaj ča j’ onda bilo. Zazijala j’ huje od Kalinića i da mu pas mater kurbu prasicu, da j’ kvisling, da j’ drek od čovika, da j’ poturica, da j’…, ma ne znan ja to se ni ponovit. 

– Bil kriv ale prav on je bil i ostal naš prijatel, a prijateli se ne poznaju va veselju leh va nevolje. Ti, kod Dalmatinac trebel biš prvi stat na njegovu stran aš ti je sused. Da si imel ono ča saki pravi muški trebe imet ne biš došal semo leh biš šal va Zagreb kako i saki pošteni Dalmatinac i Hercegovac, a da si ča valjal i ovde biš bil ako niš drugo bar precjednik ZMO-a, a ti nisi dorasal tomu ni da budeš precjednik od Bandićevoga kondota.