Va našemu zaselku mjesnoga odbora ale ZMO-u ovu j’ šetemanu bilo čudesa. Bilo j’, da j’ teško reć česa ni bilo. Počelo j’ štracasto. A ča ste misleli da će va našoj maloj zajednice ta gaf od kardinala proć prez besedi. Bonđorno! Ni se znalo ka j’ ženska već ponemela. Jedina ka j’ bila suzdržana je naša presjednica drugarica gospa Mičica. Doklen su druge navrezale i beštimale se va šešnajst, a bome i va više, Mičica j’ rekla – ja najprvo vidin ki reče, a onput, ovisno o tomu bacilan ale ne bacilan o tomu ča j’ rekal. K tomu, sakomu se dogodi da ki put pljusne bedastoću, pa i plovanu. Jedino ča mi ni ćaro, zač se j’ šal pačat va seks, kad crikva i seks ne bi trebeli bit va sinergije. Onput je Pere ki ne govori pital da ča j’ to sinergija, da j’ on čul leh za sangriju pa su si prasnuli va smeh. Intanto štracasto zapolne va našemu ZMO-u mi j’ čuda toga dalo znat. Najprvo da gospa Fana i ni tako fina kakovun se dela aš san z pogovore nje i Jakomine doznala da su va mladoste bile pravi vrazi. Altroke Vudstok. Isto tako san doznala da su Nadalu si zvali Nedala aš je ona mladost preživela jušto po kardinaloven urdinu. Ma i da j’ od ženidbi do današnjeh dan bila se samo ne uzorita. Pa sad si ja malo mislin, ča ne bi bilo bolje da j’ šviketala okolo prvo leh se j’ oženila nego ča j’ to delala oženjena? Kako god da obrneš dala al ne dala, po mišljenju uzoritoga kardinala štraca si i bog.
To z štracami ni finilo leh tako. Z privatneh štrac moje se j’ susedstvo prehitilo na one političke. E, tek je tu nastala barufa i pol. Šjor Dalmatinac i šjor Berto samo ča se nisu pokosmali, a da bi radi česa. Najme, šjor Dalmatinac je rekal da j’ manje štrac sedi va sadašnjoj vlade leh ča ih je sedelo va onoj prvo ove. Bertu j’ na te njegove besedi samo ča ni para z ušij šla vanka. Počel je zijat huje leh Mičica zijala doklen ju j’ pral klimaks.
– Mona dalmatinska ča ne promisliš prvo leh blebneš? Oni prvo baren su na delo dohajali. Imeli su kvorum za se ča su oteli izglasat, a ča ovi sada? Da trebe odlučit ako će va saborskomu kondotu bit karta za rit otrt va dva le tri sloja, z dihon lavandi ale marelice, okol toga bi se pojidali, kvoruma bi bilo, ma za pitanji od državne važnosti, ne bacilaju. Pu, tri put pu, na tu sramot. Briga njih, plaća kuri, a oni doma leže. I na Blajburgu, ča njin je od krucijalne važnosti su se osramotili. To su političke štraci par ekselans, i basta:
Šjor Dalmatinac mu j’ rekal da j’ on jedan obični provokator ki bi se tako lipo uklopil va saborsku oporbu. Zaspraven da j’ provokatorska štraca koj je jedino poslanje rušit ovu vlast. I tu bi mu, garantiran, šjor Berto zabil matafun, da ni uletela drugarica gospa Pepa i rekla da j’ počel Eurosong.
Ni njoj rabilo ponavljat. Va našemu ZMO-u uza su politiku ku brstimo od jutra do sutra, ipak je zabava na prvomu mestu. Pa j’ se ča j’ počelo va karu, finilo va smehu. Narivali smo se va ta naš dom, poseli spred televizije, pa bi nekomu ki ne zna ta prizor sličil na nekadanje predstavi partizanskoga teatra Dobriša Cesarić. Komesar Mičica je zela daljinski, naštelala sliku i ton. Iskreno nismo baš puno pjesam čuli, ma doklen san živa neću pozabit ono ča j’ Milić rekal. A rekal je – mogal san umret va neznanju. Celi život mislin da j’ Australija sedmi kontinent, a ona j’ zaspraven del Evropi. Ja, čivik uči doklen je živ.
