Evo na, sopeta san tu. Potrefi se jedan blagdan i dvobroj i zajedno cela frka i panika. Zovu, pitaju, pojidaju se. I ni da mi ni drago ča j’ tomu tako, ma ča ne bi ki put mogli pomislet da me ni radi nečesa lipoga – recimo, kurba se, našla j’ svoga Savršenoga kod Maja Šuput, pa ga j’ već i pušćala i šla z neken bogaten na Sejšeli ale Maldivi, morda da san dobila na lotu i dala otkaz ale ča sličnoga leh vavek – si dobro, si zdrava, je doma se va redu. Drek je va redu, doma j’ se va neredu ma to ni niš novoga i tako je kako je, ma glavno da je. San zdrava? Ne znan aš ne gren dohtoru, a valjda san ako ne gren. Ča se tiče dela, tamo san kade san, ma do kada, iskreno ću van reć – niman pojma aš su mi rekli da iman uvjeti za prvovremenu penziju, pa ću valjda bit dokle mi, neću reć ne dosadi aš to mi nikada neće, leh doklen mi ne pukne film. Ili onemi ki me plaćaju aš znate i sami da na mlajemi svit ostaje. No, dobro, to smo sad rešili – tu san kade san, a do kada to leh Svevišnji zna.

Od kada se nismo pisali i čitali niš mi se lipoga ni dogodilo. Ja, žalosno ma j’ tako. Va par dani pisala san dva inmemoriama, bila na dva sprogoda, a skoro i na tretemu ma nisan dospela. Puno se j’ tuge nakupilo, a kako ja nisan cvilindreta te suzi nikako da poteču i pohitaju to vanka leh ju držin nutre i smiron sobun nosin. Preveć je teh nenadaneh i neočekivaneh rastanki bilo va momu življenju i namesto da već jedanput dokončan da ono ča mora bit – bude, ja i dalje mislin kako jednostavno se te prerane smrti nisu poštene. Kako i mnogo drugeh stvari na ovomu svitu. Tako, moj Mili, ča će reć – moj prijatel i kolega Gromičan i ja stojimo na jednomu od dva spomenuta sprogoda i naslišamo kako plovan govori da j’ ovaj svit leh patnja, muka i tlaka i da se si trebamo smrte veselit, a ne radi nje plakat.

Mučin, niš ne govorin aš na sprogodu ni lipo komentirat, ma dočin je finil, ja Miloga pitan – je tebe pokle onoga govora od plovana došlo da se ne mičeš z cimitera, da tamo ostaneš i čekaš da ta vječnost va koj je se divno i krasno dojde po te? Mili odgovara – jušto tako. Šteta ča se niki od oneh ki su prošli va vječnost ni vrnul i povedal je to za sen sega tako kako j’ plovan mašil ale i tamo ima nepoštenja. Ovako nikada nećemo znat je nan bilo bolje ostat tamo i čekat ale proć. A sada dosti smrti i rastanki, kako bi rekla Irena od Zlobinskoga Brda – homo jedan valcer za pokojnoga. I to za seh. I za one ke poznan i za one ke ne poznan. Valjda će ga neki i za nas odtancat kad dojde vrime za to.

Bila san na MIK-u. Na dve večeri od sedan kuliko ih je ovo izdanje imelo. Prvoj i zadnjoj. Falel mi j’ Baša, jako. Mnogemi je. Neki ga nisu nikada upoznali pa njin ni ni mogal, no se va semu Mikovci su se, z oven festivalon lipo oprostili od svoga direhtora. Mislin da bi bil zadovoljan. Se j’ bilo kod po špage, se j’ štimalo, a ono ča bi njega jako veselilo je da j’ va karavane bilo puno, puno mladeh ljudi. Vavek je govoril da festival ima budućnost ako ima mladost, e pa ovo izdanje je bome imelo mladost.

Stojin tako va Crikvenice i gljedan te divojčice, divojke i mladići i ča mi pade napamet? A ča munjenomu more past napamet ako ne neš munjeno? Pomislela san da j’ ov naš MIK jušto kod Mik Džeger. Sako malo gre na promenu krvi zato još vavek i dura mada i loče i da ne govorin ča se još. Eto, z kakoven san se ja mislimi bavila na festivalu. Bolje i to leh da san zaspala va trećemu redu kod jedan gospodin ki j’ zaspal prvo leh je festivalska večer počela i odspal do samoga kraja. Mene j’ leh bilo strah da ne pade stolice i ne udri se, a to da ga j’ bilo litratat i koristit va reklamne svrhi, isto mi j’ palo napamet. Recite sami – čovik blaženo spi rastegnjen na kantrede, koda j’ va vlastitomu dnevnomu boravku, a ispod piše – leh se uz MIK lipo sanja. Morat ću to Vjeku predložit, a usput tomu istomu Vjeku, novomu direhtoru MIK-a i celomu njegovomu organizacijskom timu se pohvali. Odelali su lavovsko delo i ono ča bi Baše bilo nejvažneje – podignuli dignitet festivala za još jedan skalin. Ćemo mi na Svjetskomu nogometnomu prvenstvu održat dignitet ale ne, videt ćemo jako brzo. Ono ča jedino znan da si muški imaju zagarantiranu zabavu naredneh mesec dan, a oni ki ne štimaju nogomet tuliko slobodneh žen da ako sad ne najdu divojku – neće ju nikada. Sretno bilo sen nan!