Za početak – srićno van proliće! Baš malo mislin kako pu teh godišnjeh dob ni niš drugačje leh ča j’ pu ljudi.

Ni jedan štajon se ne da tako lako z vlasti, ne bi ni za boga prepustil kantredu na koj sedi. Tako j’ zima bila blaga, dobra, ni delala kumediju se doklen ni proliće pokucalo na vrata i reklo – sjaši Kurta da uzjaše Murta.

E, onput se j’ razjadila pa j’ zabelila se ča je dospela, raspuhala se i sa zakašnjenen poslala marčanu buru, tek tuliko da se zna kako ona još vavek ima i vlast, i naoružanje.

I sami znate, kakov je moj odnos spram zimi – ča se mane tiče potpišujen da traje seh dvanajst meseci, ma da j’ bezobrazna je, aš ča ni po regule – ni. Z oven ča dela ne dela dobro ni prirode ni društvu. Priroda j’ već cveti pušćala, a ljudi su već spravili zimsku robu i skočili takoreć va kratki rukavi. Z druge bandi, ako priroda fasuje će i ljudi aš neće imet ča za jist.

Sad će oni ča vavek črno gljedaju reć da i sad već mnogi od njih drže zube na police, a ja ću njin odgovorit da njin, ako se situacija okol Bliskoga istoka nastavi ovako razvijat, jako brzo neće rabit ni zubi, ni polica. Pa sad vi vidite ki ima črne misli.

On Naranžasti sigurno ne, aš ni mu dosti ča j’ načinil ov kraval ki je, leh bi ga, prez puno mislet, još i proširil. Ta Naranžasti se grozi celomu svitu. Najprvo bi Kanadu, Grenland i već san pozabila na ča j’ još klal capu, a sada bi i Kubu. Ono ča mane najveć pojida va celoj toj situacije je – do kada?

Kuliko san imela čut, Čak Noris je proslavil 86 rojendan i finil va bolnicu,umrl pa sad zbilja ne znan da postoji još neki ki bi tomu Trampu-Krampu mogal stat na kraj.

A da ga ni rabilo pušćat ni na početak, o tomu bolje da mučin. Intanto, on riva po svomu, a celi svit se trese. Nikada u životu nisan niš grdo rekla starejemu čoviku, a ovoga bin bez imalo grižnje savjesti piknula va koleno. Kod i se one ki se pelju na njegovimi kolimi.

Radi njegovoga švikanja po svitu fasujemo si – od onoga sirotoga seljaka va Slavonije ki mora saki dan na pumpu po skupi dizel, namesto da ore i sadi po njive, preko onoga ribara ki isto mora plavi dizel platit kod svetoga Petra kajganu, pa do svakoga diteta ko je radi njegovoga nemenja, zločestoći i ega ostalo prez materi i oca.

Tuliko ča se tiče makro svita, a on mikro govori da će se naša dva glavna čovika konačno utaknut. Bilo j’ po onomu – kad neće brdo Muhamedu, će Muhamed brdu.

Neka si sami ziberu ki će bit brdo, a ki Muhamed, mane j’ sasma svedno, leh neka se već jedanputa posprave i kod dva odrasla čovika dogovore, a ne da se kod dva mulca, da ne rečen kod dva ovna na brvnu, smiron natežu i bodu.

Tr ni ja ne volin jednako se okol sebe, ma ne delan kumediju. Iman vavek jednu te istu rečenicu ka glasi – nismo mi tu da se volimo, leh da skupa delamo.

No, glavno da su se oni čuli i dogovorili da će se nać, a kada će do toga nahajanja doć ne zna se.

Me par da će brzo, mada mnogi misle da su obadva kod stara divojka – ona bi, ma kako, kada i kade, to će još malo razmislet, a celo vrime neće ni znat da nikada ne bi bila stara divojka da j’ va životu malo manje mislela i bila hitreja.

Radi spolne jednakosti, aš na to se mora pazit, komotno san mogla napisat i da su kod dva stara mladića, ma nekako mi j’ ovo više pasalo.

Na privratu? A ča reć osin da se cela slika svita jušto va njemu ogleda. Ni na privratu, niš drugačje leh va svitu, samo malo bliže i malo već za razumet.

Rika je va Strazburu pukazala najbolje ča j’ mogla i dokazala da morda nismo prošli va evropskoj lige, ma smo dokazali da smo altroke evropska liga, čestitke sen.

Kapetan Franko će, ako Bog dragi i buričina daju, jutra kruzer upeljat va bakarsku valu ča će bit prvi put va povijeste i kruzinga i vale, i nadan se da će Bakarčani i Bakrani doć na osan jutro pozdravit ovoga dečka ki more bit na sin morima ovoga svita, ma leh jedno va srcu nosi.

Zaslužil je da mu dojde celi bakarski prsten.

Ča ni? Mada mi j’ na osan jutro tek prvi san, ja ću se načinit da buden tamo i da mu pomašen.

A kad smo već pu sani, pred neku šetemanu san van rekla kako san sanjala da san zbaketala glavnu urednicu. Se domišljate? E, pa najnoveji nemi san mi je da j’ precjednik Milanović došal pu mane posudit Ježevu kućicu.

Bolje da ne gren va detalji. I sada se ja pitan – zač ne sanjan da san dobila na loto, pa da mi bar va snu bude lipo, ako ni već na jave leh ja moran vavek imet duplo – i dnevnu, i noćnu moru?