Na Bliskomu istoku niš novo, na dalekomu zapadu isto, a na istoku va susestvu šef je pozabil popit terapiju, ale je more bit popil krivu, pa sopeta šamplasti o vanjskomu neprijatelu, a jako se dobro zna da na toj liste smo mi na prvomu mestu. Siroti čovik nikako da dokonča kako mi o njemu mislimo jednako kako i o lanjskomu snegu, ma ako mu j’ napeto bit sam sebe važan – neka mu bude. Pu nas? A ča pu nas? Va istomu smo dreku kod i celi svit – benzina kreši, a kad ona kreši da i se drugo. Sopeta cveta međugranična suradnja, a komotno moren reć da si puti ne vode va Rim leh va Bosnu i Hercegovinu. Doklen će to tako, teško je reć. Za piramide va Visokomu znan, ma nikako da dokončan kade su njin ti nepresušni izvori nafti. Kad otkrijen – javit ću van. Ča se tiče naše nutarnje i vanjske pulitiki, ni to baš jako niš novoga. Ovi dva glavni su i dalje kod dva ovna na brvnu. Da j’ drugačje bin se zabrinula, a precjednik je i dalje pun humora. Moran bit iskrena i reć da me j’ opet uspjel nasmet i to kad je rekal da su ovi EU-ovci kod leglo domaćeh mačak. Zajedno san počela razmišljat ki mi na ku vrst sliči. Neću se izdat, ma provajte i vi i javite da usporedimo.

Sad politiku van z našega kantunića, homo mi na život. A ča se života tiče, moren van reć da gradnja školi va Rešetarih lipo napreduje. Miniranja još ni bilo, a moja Roditeljica saki dan čeka sireni da klade padelu na glavu i skrije se spod postelji. Ta škola njoj je sad silno napeta. Ne znan ča njoj to tako jako znači – nit će ona poć va školu, bogme ni njeje dite, a unuki nima. Ma, neka joj bude. Kad zanjurgan da bi bilo bolje da se gradi starački dom ale dom za pasi aš da ja po ceste vidin leh starci keh šeću pasi, namesto obrnuto, reče mi da san telica i da ako ne znan da su deca budućnost sake nacije pa i naše, onput zbilja niš ne znan. Ona me j’ po pitanje školi prva oprala, a drugu mašu san dobila od mladoga kolegi Brnelića ki mi j’ zmed redi rekal da san kod si stari ljudi, da ne dan napretku mesta i da zabezvezi njurgan. A leh san rekla da san ja va školu hodila i jutro, i po zapolne i va međusmenu, i da ča mi fali. On me j’ pital da ča ja mislin kuliko dece bi moralo bit samo doma pojutru ako gredu zapolne va školu aš njin obadva roditelja delaju. I ima pravo, a iman i ja ka san uvjerena da će za dvajsetak let te školi zjapit prazne aš ljudi već ne delaju decu, ljudi kupuju kućni ljubimci. Onimi ki imaju i jedno i drugo – saka čast. I tako smo Brnelić i ja razmenili mišljenja, ča bi se po modernu reklo – dijametralno suprotna aš je on zastupal delanje škol, ja delanje domi za stareje da bi se na kraju va jednomu složili, a to je da načinili mi školu za mladi ale dom za stari – na isto nan dojde kad nećemo imet kadra ki će va ovoj ale onoj ustanove delat.

I za kraj jedna prolitnja. Javil mi se je kolega Marin Smolčić z Gospića. Marin je jedan divan kolega i divan čovik. Na dugo i na široko znan kod vrsan lovac na poskoki. Još od rata se pojida za me i jedini na ovomu svitu me zove »biće«. Kako j’ vrime od kačak, a Marin zna da ih se ja užasavan poslal mi je jedan simpatičan mejl pa ću ga podelit z vami, aš more i van koristit. Dakle, Marin piše:

– Poznati su mi neki zmijolovci koji su se ubijali od pušenja. Budući da zmije bježe od mirisa nikotina, takvi su zmijolovci rijetko doživljavali ugrize. Zato bi ti bila idealna za lov zmija. Također su notorne besmislice da poskoci vole vodu i plivanje. Najbolji način da otjeraš poskoka jest poprskati ga s nekoliko kapljica vode. Zbog načina grijanja tijela (ektotermi), taj postupak kod njih (kao i većine zmija) izaziva nelagodu i bol. U ove tople dane događa se da poskoci prekidaju zimsku hibernaciju koju provode u zajedničkom snu. Tada iz podzemnih skloništa deseci poskoka nahrupe van. Nikada nisam imao tu sreću da svjedočim tome, ali znam dečke (izletnici) koji su se našli u dosta nepovoljnom položaju. Ja sam svega jednom svjedočio sceni kad se minirao kamen uz rijeku Liku u rano proljeće. Jedna mina je podigla u zrak dvadesetak poskoka izbačenih iz skloništa. Znaš da o ovoj temi podosta znam, samo sam te htio besplatno educirati. Ekola, Marin mene, a ja vas.